Günel Fərhadqızı: "İki ölkə arasındakı biznes münasibətlərinin daha da dərinləşməsinə mane olan bütün faktorlar aradan qaldırılacaq"
ADA Universiteti və Amerika Ticarət Palatasının (AmCham) təşkilatçılığı ilə Bakıda ilk dəfə olaraq Azərbaycan-ABŞ biznes forumu keçirilib. Forumun əsas məqsədi iki ölkə arasında biznes əlaqələrinin gücləndirilməsi üçün Azərbaycanı, onun iqtisadi potensialını, imkan və perspektivlərini Amerika şirkətlərinə təqdim etməkdir.
Forumda açılış nitqi ilə çıxış edən "AmCham"ın icraçı direktoru Natəvan Məmmədova ikitərəfli iqtisadi əlaqələrin gələcək inkişafı, yeni əlaqələrin yaradılması və yeni imkanların aşkarlanması istiqamətində forumun əhəmiyyətini vurğulayıb.
İqtisadiyyat nazirinin müavini Sahil Babayev qeyd edib ki, ABŞ Azərbaycan iqtisadiyyatına 10 milyard dollar investisiya qoyub. Təkcə neft sektoruna 9 milyard dollar yatırıldığını deyən nazir müavini ABŞ iqtisadiyyatına qoyulan Azərbaycan sərmayələrinin təqribən 3 milyard dollar təşkil etdiyini vurğulayıb.
Tədbirdə çıxış edən Azərbaycanın ABŞ-dakı səfiri Elin Süleymanov isə bildirib ki, gələn ilin may ayında Amerikada İpək Yolu dəhlizinin inkişafı ilə bağlı forum keçiriləcək.
Forumda Dövlət Gömrük Komitəsi və Amerika Ticarət Palatası arasında anlaşma memorandumu imzalanıb. Sənədi DGK sədri Aydın Əliyev və "AmCham"ın prezidenti İlqar Vəliyev imzalayıb. Memorandum "AmCham"a üzv olan şirkətlər üçün sərhəd-gömrük məntəqələrində malların və nəqliyyat vasitələrinin daşınmasında "Yaşıl dəhliz"in və digər keçid sistemlərinin istifadəsini nəzərdə tutur.
Foruma, həmçinin, ADA Universiteti, Xarici İşlər Nazirliyi, Vergilər Nazirliyi, İqtisadiyyat Nazirliyi, Dövlət Gömrük Komitəsi, Azərbaycanın ABŞ-dakı və ABŞ-ın Azərbaycandakı səfirliklərinin nümayəndələri və digər rəsmi şəxslər qatılıb.
Tarixdə ilk dəfə keçirilən ABŞ-Azərbaycan biznes forumunun ölkəmiz üçün nə kimi əhəmiyyəti olacaq?
İqtisadçı Günel Fərhadqızı qəzetimizə açıqlamasında bildirdi ki, belə bir biznes forumun keçirilməsi hər iki ölkə üçün əhəmiyyətlidir: "Doğrudan da belə forumun ilk dəfə keçirilməsi məni də dərindən təəccübləndirdi. Çünki ABŞ-la Azərbaycan arasında çox gözəl iqtisadi münasibətlər qurulub. Ölkələrimiz arasındakı ticarət dövriyyəsini qənaətbəxş hesab etmək olar. Forumların keçirilməsində məqsəd əlaqələrin daha da dərinləşməsi, tanışlıq imkanlarının genişlənməsi və əlaqədar qurumlar arasındakı koordinasiyanın səmərəli təşkilini təmin etməkdir. Forumda dövlət qurumlarının da yaxından iştirakı çox yaxşıdır. İki ölkə arasındakı biznes münasibətlərinin daha da dərinləşməsinə mane olan bütün faktorlar aradan qaldırılacaq. Səmərəli iş əmsalının alınması üçün nə lazımdırsa ediləcək. ABŞ-ın dünyanın ən qüdrətli ölkələrindən olduğunu nəzərə alsaq, onda bəlli olar ki, belə forumlar vasitəsilə biz onların geniş təcrübəsindən yararlana bilərik. Eyni zamanda belə tədbirlər vasitəsilə hansı sahələrə qarşılıqlı investisiya yatırılmasına dair də zəngin fikir mübadiləsi aparıla, gələcək inkişaf perspektivləri müəyyənləşə bilər".
Məhəmmədəli QƏRİBLİ
