İlqar Hüseynli: "Bununla bağlı mükəmməl layihələr hazırlanmalıdır ki, ABŞ bu sahəyə sərmayə qoymaqda maraqlı olsun"
ABŞ Azərbaycan iqtisadiyyatına 10 milyard dollar investisiya qoyub. Ancaq bunun böyük hissəsi neft sektoruna yatırılıb. Belə ki, qoyulan 10 milyard dollar sərmayənin 9 milyard dolları məhz neft sektorunun payına düşür.
Belə məlum olur ki, ABŞ Azərbaycanın qeyri-neft sektoruna cəmi 1 milyard dollar sərmayə qoyub. Halbuki, Azərbaycan daha çox iqtisadiyyatın qeyri-neft sektoruna sərmayə qoyulmasında maraqlıdır. Bunu Prezident İlham Əliyev də ABŞ-ın ticarət nazirinin Avropa, Orta Şərq və Afrika üzrə müşavirinin müavini Maykl Lallinin başçılıq etdiyi nümayəndə heyətini qəbul edərkən xüsusi vurğulayıb. Ölkələrimiz arasında iqtisadi əlaqələrə toxunan dövlət başçısı energetika sahəsində əməkdaşlığın uğurla inkişaf etdiyini, mühüm enerji layihələrinin sürətlə həyata keçirildiyini qeyd edərək, hazırkı şəraitdə əsas diqqətin qeyri-neft sahəsində də əməkdaşlığa yönəldilməsinin önəmini vurğulayıb. Həmçinin, ABŞ-la Azərbaycanın qeyri-neft sektorunda daha fəal əməkdaşlığının həyata keçirilməsinin əhəmiyyətini qeyd edib. İlham Əliyev ABŞ-ın Azərbaycanın qeyri-neft sektoruna daha çox investisiya qoymasında ölkəmizin maraqlı olduğunu deyib və daha çox praktiki nəticələrin əldə edilməsinin vacibliyini bildirib. Bu baxımdan Prezident ABŞ-ın orta və kiçik sahibkarlıqla məşğul olan şirkətlərinin Azərbaycanı daha çox tanıması ilə bağlı təqdimatların keçirilməsinin önəmini qeyd edib.
Ümumilikdə, necə etmək lazımdır ki, Birləşmiş Ştatlar daha çox qeyri-neft sektoruna sərmayə qoysun? Bunun üçün hansı işlərin görülməsinə ehtiyac var? Sözügedən məsələ ilə bağlı fikirlərini "Bakı-Xəbər"lə bölüşən ekspert İlqar Hüseynli bununla bağlı bir sıra məqamlara önəm verilməsinin vacib olduğunu bildirdi: "Əvvəla Azərbaycanla Birləşmiş Ştatlar arasında iqtisadi əlaqələrə yenidən baxılmalıdır. İqtisadi əlaqələr sırf beynəlxalq standartlar səviyyəsində qurulmalıdır ki, ABŞ Azərbaycanın qeyri-neft sektoruna maraq göstərsin. ABŞ-ın Beynəlxalq İnkişaf Agentliyi var. Sözügedən agentlik vasitəsilə kifayət qədər bu istiqamətdə faydalı işlər aparılıb. Eyni zamanda, çoxsaylı kiçik və orta sahibkarlıq subyektlərinin inkişaf etdirilməsi üçün kifayət qədər proqramlar həyata keçirilir. Düşünürəm ki, bu proqramlar çərçivəsində Azərbaycanda kiçik və orta sahibkarların sayının artırılması istiqamətində ABŞ-la əməkdaşlığa önəm verilməlidir. Həmçinin, Azərbaycanla Birləşmiş Ştatlar arasında ticarət dövriyyəsinin qeyri-neft sektorunun payına düşən hissəsinin artırılmasına diqqət edilməlidir. İnsan kapitalının inkişaf etdirilməsi ilə bağlı iki ölkə arasında əməkdaşlıq gücləndirilməlidir. Azərbaycanda kiçik və orta sahibkarlıq, eyni zamanda digər qeyri-neft sektoruna aid istiqamətlər üzərində işləmək lazımdır. Bununla bağlı mükəmməl layihələr hazırlanmalıdır ki, ABŞ bu sahəyə sərmayə qoymaqda maraqlı olsun".
Vidadi ORDAHALLI
