Rəsul Cahangirli: "Hesab edirəm ki, indiki dövrdə buna getmək doğru addımdır"
"Dövlət ali təhsil müəssisələrinin sərbəst qalan vəsaitlərinin mənfəət və əmlak vergisinə cəlb olunması məsələsinə baxılacaq". Bunu Hesablama Palatasının sədri Vüqar Gülməmmədov Milli Məclisin Əmək və sosial siyasət, Səhiyyə, Ailə, qadın və uşaq məsələləri, Elm və təhsil, Mədəniyyət komitələrinin keçirilən birgə iclasında 2017-ci il üzrə Azərbaycanın dövlət büdcəsinin layihəsini müzakirəsi zamanı bildirib.
V.Gülməmmədov deyib ki, dövlət ali təhsil müəssisələrinin fəaliyyətinə büdcə müstəvisində deyil, təsərrüfat münasibətləri müstəvisində baxmaq zərurəti yaranıb: "Özəl və ali təhsil müəssisələri əldə etdikləri gəlirləri vergi öhdəlikləri baxımından tam açıqlamalıdır. Hesab edirik ki, dövlət ali təhsil müəssisələri də özəl ali təhsil müəssisələri kimi əldə etdikləri gəlirləri vergi öhdəliklərinin bəyan edilməsi baxımından tam açıqlamalıdır. Azərbaycan Prezidenti İlham Əliyevin müvafiq fərmanına uyğun olaraq, 2010-2011-ci tədris ilindən başlayaraq, mülkiyyət formasından asılı olmayaraq, qanunvericiliyə uyğun şəkildə fəaliyyət göstərən bütün ali təhsil müəssisələri adambaşına maliyyələşmə prinsipini nəzərdə tutan dövlət sifarişinin yerinə yetirilməsində iştirak edirlər. Cari və əvvəlki illərin nəticələrinə əsasən qeyd olunmalıdır ki, dövlət ali təhsil müəssisələrinin maliyyə-təsərrüfat fəaliyyəti üzrə dövlət büdcə gəlir və xərclərinin tərkibinə daxil edilməyən müvafiq göstəriciləri, o cümlədən gəlirləri və gəlirlərin əldə olunması ilə bağlı xərcləri, eləcə də digər öhdəlikləri qanunvericiliklə müəyyən edilmiş qaydada bəyan olunmayıb".
Adətən sərbəst qalan vəsait ali məktəblərdə müəyyən cari işlərin və digər məsələlərin həllinə yönəldilir. Ancaq o da var ki, sərbəst qalan vəsait bütün ali məktəblərdə eyni olmur. Elə ali məktəb var ki, orada bunun miqdarı nisbətən daha böyük olur. Bu baxımdan ekspertlər ali təhsil müəssisələrinin sərbəst qalan vəsaitlərinin mənfəət və əmlak vergisinə cəlb olunmasına necə baxır? Məsələyə münasibət bildirən ekspert Rəsul Cahangirlinin fikrincə, prinsipcə, belə təşəbbüs normal qarşılanmalıdır: "Ona görə ki, mövcud iqtisadi vəziyyət bunu tələb edir. İndiki şəraitdə maksimum çalışmaq lazımdır ki, vergidən yayınma halları minimum səviyyəyə düşsün. Vergi ödəyicilərinin sayı nə qədər çox artsa, bu bir o qədər dövlət büdcəsinin xeyrinədir. Nəzərə aldıq da ki, ölkədə iqtisadi çətinlik var və bu səbəbdən bəzi layihələrin həyata keçirilməsi təxirə salınıb, buna getmək lazımdır. Az da olsa, bu, dövlət büdcəsinə fayda verəcək. Yəni sərbəst vəsaitin vergiyə cəlb olunması işin xeyrinədir. Ali məktəblər bundan itirməyəcək. Ölkədə iqtisadi vəziyyət tam yoluna düşdükdə, o zaman lazım gələrsə, bu məsələyə yenidən baxılacaq. Ancaq hesab edirəm ki, indiki dövrdə buna getmək doğru addımdır". Vidadi ORDAHALLI
