ABŞ Ticarət Nazirliyinin nümayəndəsi: “ABŞ biznesmenlərinin Azərbaycana marağını müşahidə edirik”
"Səfərimin məqsədi Azərbaycanla ABŞ arasında iqtisadi əlaqələri genişləndirmək və dərinləşdirməkdir". APA-nın məlumatına görə, bunu ABŞ Ticarət nazirinin Avropa, Orta Şərq və Afrika üzrə müşavirinin müavini Maykl Lalli deyib.
O, iki ölkə arasında iqtisadi əlaqələrin inkişafı sahəsində müəyyən irəliləyişlər əldə edildiyini, iqtisadi əlaqələrin və biznesin inkişafı sahəsində mühüm potensial olduğunu qeyd edib: "ABŞ-ın və Azərbaycanın özəl sektorunda çalışan şəxslərin fəaliyyəti çox vacibdir və bu, Azərbaycan iqtisadiyyatının diversifikasiyası, qeyri-neft sektorunun inkişafı siyasətinə uyğundur.
Azərbaycandakı Amerika Ticarət Palatası iki ölkə arasında ticarət əlaqələrinin inkişafı üçün vacib olan sənədlə çıxış edib, 16 tövsiyə verib. Bu tövsiyələr Azərbaycanda biznesin inkişafı sahəsinə mühüm təkanlar verə bilər".
M.Lalli deyib ki, son 3 il ərzində 35-ə yaxın ABŞ şirkətinin nümayəndələri Azərbaycana səfərlər ediblər. O, səfərlər zamanı ümumilikdə 200-ə yaxın görüş keçirildiyini söyləyib: “Keçirilən görüşlərin nəticələrini görürük. 2017-ci ilə aid planlardan danışarkən deyim ki, müəyyən proqramlaşdırma işləri həyata keçirilir. Bunlardan biri ABŞ-Azərbaycan Ticarət Palatasının fəaliyyəti nəticəsində martda ABŞ-da keçiriləcək tədbir olacaq. Bu, Azərbaycanda biznes mühitinin yaxşılaşdırılmasına təkan verə biləcək tədbirdir. Azərbaycan artıq məqsədlərini müəyyənləşdirib, bu məqsədlər qeyri-neft sektorunun inkişafı və diversifikasiya siyasətidir. Düşünürəm ki, bu məqsədi əldə etmək üçün müəyyən işlər görülməlidir”.
M. Lalli bildirib ki, Azərbaycandakı Amerika Ticarət Palatasının təkliflərindən ikisi biznes mühitinin inkişafı və qeyri-neft sahəsini hədəfləyən investisiyanın cəlb olunmasıdır: “Bu istiqamətdə Azərbaycanda islahatlar keçirilir. Bu islahatlar sərmayənin Azərbaycana gətirilməsinə təkan verir. Amerika biznesmenlərinin Azərbaycana marağını müşahidə edirik və bu istiqamətdə işləyirik”.
Qonaq qeyd edib ki, ABŞ-la Azərbaycan arasında birbaşa hava nəqliyyatı var, bu isə özlüyündə əlaqələrin inkişafı üçün vacib addımdır: “Azərbaycanla informasiya texnologiyaları və kənd təsərrüfatı sahəsində əlaqələrin inkişafı üçün böyük imkanlar var. Azərbaycan ABŞ-la kosmos sahəsində əməkdaşlıq həyata keçirir. ABŞ-ın ən son texnologiyalarından istifadə olunmaqla, Azərbaycanın öz peyki fəaliyyət göstərir”.
