Azərbaycana qardaş Türkiyə investisiyalarının yeni axın dövrü başlayır... Azad rayonlarımızın geniş imkanları...
Azərbaycanın 30 ilə yaxındır ki, işğal altında olan əraziləri artıq azad edilib. Həmin ərazilərdə yenidən yaşayış məntəqələrinin salınması, iş yerlərinin, məcbur köçkünlərin öz yurd-yuvalarına qaytarılması üçün "Böyük qayıdış" planı hazırlanmaqdadır.
Qeyd edək ki, dövlət başçısı İlham Əliyev də bu istiqamətdə vacib mesajlar səsləndirib. Prezident İlham Əliyev bir müddər öncə İtaliya Deputatlar Palatasının sədr müavininin başçılıq etdiyi nümayəndə heyətini qəbul edərkən də bu istiqamətdə fikirlərini səsləndirib: “Bütün dünya indi gördü ki, Azərbaycan hansı vandallarla üz-üzə qalmışdı. Və bu vandallara qarşı təkbaşına müharibə apararaq öz ərazi bütövlüyümüzü bərpa etmişik. İndi bərpa dövrü başlayır. Genişmiqyaslı quruculuq işləri aparılacaq. Əlbəttə ki, Azərbaycan şirkətləri, ilk növbədə, bu işlərdə iştirak edəcəklər. Bizim üçün dost olan ölkələrin şirkətlərini də biz dəvət edəcəyik. Daha doğrusu, artıq dəvət etmişik”.
Qeyd edək ki, artıq yerli və xarici şirkətlər Qarabağda müəyyən işlər görmək üçün Azərbaycan hökumətinə müraciət ediblər. Artıq Türkiyə şirkətləri işğaldan azad edilmiş ərazilərdə tekstil fabriklərinin qurulması üçün ilkin mərhələdə 50 milyon dollar investisiya qoymağı nəzərdə tuturlar. Bu barədə Bakıda səfərdə olan Türkiyə Cümhuriyyətinin Tüm Kalkınma İş Adamları və Girişimcilər Dərnəyinin İdarə Heyətinin sədri İlhami Öztürk media nümayəndələrinə açıqlamasında deyib.
O qeyd edib ki, rəhbərlik etdiyi qurum bir çox sahədə fəaliyyət göstərir, lakin ilk mərhələdə tekstil sahəsinə yatırım etmək nəzərdə tutulur.
- “...təbii ehtiyatlara əsaslanan sənaye istehsalının formalaşmasında da iştirakı mümkündür”
Türk şirkətlərinin Qarabağa investisiya yatırmasının əhəmiyyəti haqqında danışan iqtisadçı Kamran Məmmədli qeyd etdi ki, ilk növbədə, infrastrukturun formalaşmasında həmin xarici şirkətlərin iştirakı gözlənir: “Çünki böyük infrastruktur layihələri olacaq və göründüyü kimi, işğal müddətində Ermənistan silahlı qüvvələri tərəfindən, praktik olaraq, bütün infrastruktur dağıdılıb. Ona görə də, ilk növbədə, bu istiqamətdə quruculuq işləri aparılacaq. Bunun üçün də sərmayə qoyuluşlarına ehtiyac olacaq. Bununla yanaşı, iqtisadiyyatın fərqli sektorları, emaledici, tekstil sektor və turizm cəlbedicidir. Türk şirkətlərinin həm ərzaq məhsulları üzrə emaledici məhsulların hazırlanması, həm turizm sektoru , həm də mineral və təbii ehtiyatlara əsaslanan sənaye istehsalının formalaşmasında da iştirakı mümkündür. Türkiyə şirkətləri, eyni zamanda, aqrar sektora, həmçinin, bir sıra sənaye məhsullarının istehsalına da cəlb oluna bilər. Azad edilmiş ərazilərimizin iqtisadi potensialı böyük olduğuna görə həmin ərazilərə xarici sərmayənin cəlb edilməsi imkanları da genişdir. Bizə dost olan ölkələr üçün həmin ərazilərdə kifayət qədər imkan var”.
Günel CƏLİLOVA
