Mehriban Əliyeva: "İslam Həmrəyliyi Oyunlarına ev sahibliyi etmək bizim üçün böyük şərəfdir"
Dünən axşam Bakıdakı məşhur Olimpiya stadionunda IV İslam Həmrəyliyi Oyunlarının çox təntənəli rəsmi açılış mərasimi keçirildi. Müşahidəçilər və analitiklər IV Oyunları Azərbaycanın dünya islam həmrəyliyi tarixində mühüm bir mərhələ açması kimi çox yüksək dəyərləndirir.
Azərbaycan IV İslam Həmrəyliyi Oyunlarını yüksək səviyyədə təşkil edib. "Trend"in məlumatına görə, bunu jurnalistlərə Oyunlarda iştirak edən Türkiyə boksçusu Hakan Doğan deyib.
O qeyd edib ki, burada idmançılar üçün hər cür şərait yaradılıb.
İlk döyüşünü Qayana idmançısı ilə keçirən H.Doğan bildirib ki, mübarizə çətin keçib: "Rəqibim fiziki baxımdan məndən güclü idi, lakin bütün gücümü sərf edib qalib gəldim".
H.Doğan bildirib ki, növbəti döyüşdə Azərbaycan boksçusu, dünya çempionu Cavid Cəbiyevlə qarşılaşacaq: "Azərbaycanlılar bizim qardaşımızdır, ancaq bu bir idman yarışıdır və hər kəs qalib olmağa çalışır".
Azərbaycan IV İslam Həmrəyliyi Oyunları da daxil olmaqla, çox gözəl idman oyunlarına ev sahibliyi edir. Bunu jurnalistlərə Türkiyənin Gənclər və idman naziri Akif Çağatay Kılıc deyib.
IV İslam Həmrəyliyi Oyunlarının açılışında iştirak etmək üçün Bakıya gəldiyini deyən nazir bildirib ki, V İslam Həmrəyliyi Oyunları İstanbulda keçiriləcək: "Çox fərqli bir İslam Həmrəyliyi Oyunları yaşayacağıq. Yüksək şəkildə keçiriləcək açılış mərasimini hamımız birlikdə izləyəcəyik. Daha sonra - 2021-ci ildə isə İstanbulda V İslam Həmrəyliyi Oyunları keçiriləcək".
Qeyd etdiyimiz kimi, dünən Bakıda IV İslam Həmrəyliyi Oyunlarının rəsmi açılış mərasimi keçirilib. Açılış mərasimində Azərbaycan Prezidenti İlham Əliyev və birinci xanım Mehriban Əliyeva da iştirak edib.
Oyunlarda 54 ölkəni təmsil edən 3 mindən çox idmançı, təqribən 2000 komanda rəsmisi və texniki nümayəndə iştirak edib. Bu vaxtadək İslam Həmrəyliyi Oyunlarına bu qədər ölkə qatılmayıb.
Açılış mərasiminin keçirildiyi Bakı Olimpiya stadionuna Azərbaycan bayrağı gətirilib. APA-nın məlumatına görə, Azərbaycan bayrağı 8 nəfər tərəfindən gətirilib və Xüsusi Dövlət Mühafizə Xidmətinin Milli Qvardiyasının hərbçiləri tərəfindən qaldırılıb, dövlət himni səsləndirilib. Stadionun damından Azərbaycan bayrağının rənglərini təcəssüm etdirən atəşfəşanlıq başlayıb. Ekranlarda göstərilən videoçarxda başlanğıc mərasimində Xəzərdən başlayan səyahət və Azərbaycanın böyük təbii gözəlliyə malik müxtəlif yerlərindən suyu toplayan uşaqlar göstərilib. Əllərində mis qablar tutan uşaqlar stadiona daxil olub və Azərbaycan sularını səhnədəki böyük mis siniyə töküblər. Uşaqların arxasında pirotexnika şəlaləsi işə düşüb.
Daha sonra komandaların paradı başlayıb. Hər komanda stadiona öz bayrağı altında daxil olub. Onlar plakat saxlayan kişinin və mis qabda su daşıyan qadının arxasınca gediblər. Azərbaycan komandası stadiona daxil olan kimi Natiq Şirinov və digər 19 nağaraçı ifa etməyə başlayıb. "Bakı 2017" İslam Həmrəyliyi Oyunlarının bayraqları yan-yana dalğalanmağa başlayıb. İslam Həmrəyliyi İdman Federasiyasının bayrağı Azərbaycanın 10 çempionu tərəfindən stadiona gətirilib. İslam Həmrəyliyi İdman Federasiyasının bayrağı hərbçilər tərəfindən qaldırılıb. Bütün idmançılar və hakimlər adından and içilib.
İdmançıların paradından sonra isə atəşfəşanlıq olub.
IV İslam Həmrəyliyi Oyunlarının açılış mərasimində Birinci vitse-prezident və "Bakı 2017" Təşkilat Komitəsinin sədri Mehriban Əliyeva və İslam Əməkdaşlıq Təşkilatının baş katibi Yusif bin Əhməd Əl-Useymin çıxış ediblər.
"İslam Həmrəyliyi Oyunlarına ev sahibliyi etmək bizim üçün böyük şərəfdir". Bunu Oyunların açılış mərasimində çıxış edən Azərbaycanın Birinci vitse-prezidenti, IV İslam Həmrəyliyi Oyunlarının Təşkilat Komitəsinin sədri Mehriban Əliyeva deyib.
Mehriban Əliyeva qeyd edib: "Azərbaycan Respublikasının Prezidenti Zati-aliləri İlham Əliyev! İslam Əməkdaşlıq Təşkilatının Baş katibi Yusif bin Əhməd əl-Useymin! İslam Həmrəyliyi İdman Federasiyasının hörmətli üzvləri! İslam aləminin idmançıları! Xanımlar və cənablar! Hörmətli qonaqlar! Azərbaycana xoş gəlmişsiniz! Bakı-2017 IV İslam Həmrəyliyi Oyunlarına xoş gəlmişsiniz!
Əziz həmvətənlər! Biz birliyin və idmanın təntənəsi olan IV İslam Həmrəyliyi Oyunlarını bu axşam fərəh hissi ilə qəbul edirik. Oyunlara ev sahibliyi etmək bizim üçün böyük şərəfdir.
Bu gün Azərbaycan bütün İslam aləmini qəbul edir. Dörd qitədən gəlmiş minlərlə idmançını və paytaxtımızın qonaqlarını səmimi qəlbdən salamlayır, onlara “Xoş gəlmişsiniz!” deyirəm. Bütün uğurlar münasibətilə gözəl vətənimizin hər bir vətəndaşını təbrik edirəm və minnətdarlığımı bildirirəm. Qoy Ulu Tanrı Azərbaycanı qorusun!
Əziz dostlar! Əllidən artıq ölkənin nümayəndəsi bu axşam Bakıda IV İslam Həmrəyliyi Oyunlarının açılış mərasimini qeyd edir. Sizin burada olmağınız bizim üçün şərəfdir. Qardaşlarımız və bacılarımız, Azərbaycan sizi məmnuniyyətlə salamlayır.
Mən IV İslam Həmrəyliyi Oyunlarının keçirilməsini Bakıya həvalə etdiyinə görə İslam Həmrəyliyi İdman Federasiyasına minnətdarlığımı bildirmək istəyirəm".
Birinci vitse-prezident bildirib ki, Bakı-2017 İslam Həmrəyliyi Oyunları Azərbaycanın dinamik inkişafında yeni parlaq səhifədir və beynəlxalq idman ictimaiyyəti üçün növbəti tarixi hadisədir: "İdmana yatırdığımız böyük sərmayə dünya səviyyəsində bacarıqları mənimsəməklə, qurğuları və infrastrukturları yaratmaqla gələcək üçün böyük irsi təmin etdi. Bu axşam biz İslam aləmini bir araya gətiririk. Azərbaycan bu ali missiyanı öz üzərinə götürməkdən fərəh hissi duyur.
Biz minillikləri əhatə edən mədəniyyətə və güclü İslam ənənələrinə malik qədim diyarıq. Eyni zamanda, biz gənc, müasir və sürətlə inkişaf edən ölkəyik. Ötən il Azərbaycan müstəqilliyinin bərpa olunmasının 25-ci ildönümünü qeyd etdi".
Mehriban Əliyeva vurğulayıb ki, ölkəmizin multikultural tarixi açıq tolerant cəmiyyətimizin ən ülvi hissəsidir: "Biz İslam tarixi və irsinin bir hissəsi olmaqdan, İslam dəyərlərini bölüşməkdən fərəhlənirik. Bu Oyunların qələbə qazanacaq atletlərinin təltif olunacağı medallardan tutmuş möhtəşəm açılış və bağlanış mərasimləri kimi yaradıcı elementləri zəngin mədəniyyətimizi ilhamlandıracaq. Odlar Diyarı Azərbaycan həm də büllur sular ölkəsidir. Bənzərsiz göllərimiz və çaylarmız, şəlalərimiz və bulaqlarımız, Xəzər dənizi əsrlər boyu həyatımızın mənbəyi olub. Ortaq İslam irsimiz, həmçinin əsas yer tutan və həyat mənbəyi olan bu element Qafqaz dağlarından Xəzər dənizinə qədər ölkəmizin təbii gözəlliyinin və özünəməxsusluğunun mühüm hissəsini formalaşdırmaqdadır. Bakı-2017 İslam Həmrəyliyi Oyunlarının rəmzi olan su son beş həftə ərzində Xəzərdən başlayan böyük səyahətdə oldu. O, Azərbaycanın bənzərsiz təbiətini dünyaya nümayiş etdirdi. Hər kəsə sülh və dostluq müjdəsini gətirərək insanları ilhamlandırdı.
Əziz dostlar, mən gözəl, gənc könüllülərimizin hamısını salamlayıram. Biz sizinlə fəxr edirik. Sizin fədakarlığınız və vurğunluğunuz, xeyirxahlığınız və qətiyyətiniz bu Oyunları mümkün etdi. Sizə səmimi qəlbdən təşəkkürümü bildirirəm!"
IV İslam Həmrəyliyi Oyunlarının Təşkilat Komitəsinin sədri əlavə edib: "İslam aləminin idmançıları, sizi burada qonağımız kimi görmək olduqca sevindiricidir. Bütün Azərbaycan sizinlədir və sizə böyük uğurlar arzulayır. Bu sizin Oyunlarınızdır. Gələn on gün ərzində ölkəmiz sizin eviniz olacaq. Bu axşam mən ölkəmizin bütün nailiyyətlərinə görə qarşınızda fərəh hissi ilə çıxış edirəm.
Xalqımızın tərəqqiyə bağlılığı məni ilhamlandırır. Hamımız birgə əldə etdiyimiz nailiyyətlərlə fərəhlənə bilərik. Azərbaycan iki il öncə Birinci Avropa Oyunları çərçivəsində bütün Avropa qitəsini bir araya gətirərək tarix yazdı. İndi isə biz dörd qitənin - İslam dünyasının insanlarını Bakıda IV İslam Hərməyliyi Oyunlarında birləşdiririk".
Mehriban Əliyeva xatırladıb ki, 2017-ci il Azərbaycanda “İslam Həmrəyliyi ili” elan edilib: "Bakı-2017 və idmanın qüdrəti xalqlarımızın İslamın dostluq, sülh, tolerantlıq və mərhəmət ruhu altında bir araya gətirir. Gücümüz həmrəylikdədir! - Bu ruhlandırıcı mesajı Oyunlarımız Azərbaycanın hüdudlarından çox uzaqlara göndərəcək.
İslam aləminin atletləri! Xanımlar və cənablar! Əziz dostlar! Bakı-2017 İslam Həmrəyliyi Oyunlarına xoş gəlmişsiniz! Azərbaycana xoş gəlmişsiniz!"
“Azərbaycan idman vasitəsilə İslam dəyərləri barədə biliklərin qlobal səviyyədə yayılmasında fəallıq nümayiş etdirir”. Bunu isə Bakı-2017 İslam Həmrəyliyi Oyunlarının açılış mərasimində çıxış edən İslam Əməkdaşlıq Təşkilatının baş katibi Yusif bin Əhməd əl-Useymin deyib.
Baş katib möhtəşəm tədbirin təşkilində göstərdikləri səylərinə görə Azərbaycan xalqına, Prezident İlham Əliyevə, Birinci vitse-prezidenti, IV İslam Həmrəyliyi Oyunlarının Təşkilat Komitəsinin sədri Mehriban xanım Əliyevaya və Azərbaycan hökumətinə dərin minnətdarlığını bildirərək, Oyunların İslam Əməkdaşlıq Təşkilatına üzv ölkələrdə idmanın təşviqinə töhfə verəcəyinə, İslam aləmində gənclərə dəstək olacağına əminliyini ifadə edib.
Bakıda IV İslam Həmrəyliyi Oyunlarının keçirilməsinin 2017-ci ilin Azərbaycanda “İslam Həmrəyliyi ili” ilə üst-üstə düşdüyünü vurğulayan əl-Useymin qeyd edir ki, Azərbaycan bununla multikulturalizmin gücləndirilməsində, mədəniyyətlərarası dialoqun və sivilizasiyalararası ünsiyyətin möhkəmləndirilməsində, idman vasitəsilə İslam dəyərləri barədə biliklərin qlobal səviyyədə yayılmasında fəal iştirakını nümayiş etdirir.
İslam Həmrəyliyi Oyunlarının dünyada ən böyük idman tədbirlərindən biri olduğunu diqqətə çatdıran Baş katib deyib: “Bu Oyunlar müxtəlif mədəniyyətlərə malik fərqli ölkələrdən gəlmiş təxminən 4000 atleti bir araya gətirir. Bu, İslam həmrəyliyini əyani şəkildə nümayiş etdirir. Bu, İslamın əsl mahiyyətini, onun sülh və tolerantlıq dini olduğunu əks etdirir. Bu, mədəniyyətlərindən və fərqlərindən asılı olmayaraq, xalqlar arasında birlik, harmoniya, dostluq tellərini və dinc şəraitdə yanaşı yaşamaq tərzini gücləndirir”.
Daha sonra Azərbaycan Prezidenti İlham Əliyev IV İslam Həmrəyliyi Oyunlarını açıq elan edib.
Oyunlarda 54 ölkəni təmsil edən 3 mindən çox idmançı, təqribən 2000 komanda rəsmisi və texniki nümayəndə iştirak edir.
Yarışlar Bakının ən müasir 16 idman meydançasında 21 idman növü üzrə keçirilir (atletika və paratletika, suya tullanma, üzgüçülük, su polosu, basketbol 3x3, boks, futbol, idman gimnastikası, bədii gimnastika, həndbol, cüdo və para cüdo, karate, atıcılıq, stolüstü tennis, taekvando, tennis, voleybol, ağır atletika, güləş (yunan-Roma, sərbəst və qadın), uşu və zorxana).
Atletlər 269 dəst medal uğrunda mübarizə aparırlar. Ən çox medal dəsti atıcılıq və atletika yarışlarındadır. Qaliblərə 1600 medal təqdim ediləcək.
Azərbaycanı bu Oyunlarda 325 atlet təmsil edir. Ən çox idmançı ilə Türkiyə təmsil olunur - 345 nəfər. İdmançıların sayına görə üçüncü yerdə 300 atletlə İran qərarlaşıb.
İslam Həmrəyliyi Oyunları İslam Həmrəyliyi İdman Federasiyası tərəfindən keçirilən çoxmillətli və çoxnövlü idman tədbiridir. İlk Oyunlara 2005-ci ildə Səudiyyə Ərəbistanı ev sahibliyi edib.
IV İslam Həmrəyliyi Oyunlarının Bakıda keçirilməsi barədə qərar 2013-cü ilin iyulunda İslam Həmrəyliyi İdman Federasiyasının Səudiyyə Ərəbistanının Ciddə şəhərində keçirilən VIII Baş Assambleyasında qəbul olunub.
Açılış mərasiminə gəlmiş əcnəbilərin dedikləri…
"Bakıda keçirilən IV İslam Həmrəyliyi Oyunlarından sevginin çoxalmasını gözləyirəm". Bunu Trend-ə Bakıya İslamiada ilə bağlı Türkiyənin İstanbul şəhərindən gələn Məhmət Karakapıçı deyib. Mehmet Karakapıçı artıq 25 ildir daim Bakıya gəldiyini bildirib: "Bakıya tez-tez gəlirəm. Mühəndisəm, vaxtilə indiki Azərbaycan Dövlət Neft və Sənaye Universitetində təhsil almışam. Bakını çox sevirəm".
Türkiyəli qonaq qeyd edib ki, birlik İslam dininin əsas qayəsidir: "İslamda insanın insandan fərqi yoxdur, hamımızın ruhu birdir. Nizami Gəncəvi də belə deyib".
Qonaq İslam Həmrəyliyi Oyunlarından gözləntilərini də bölüşüb: "Bu İslam Həmrəyliyi Oyunlarından sevginin çoxalmasını gözləyirəm. Düşmənçiliyi yaymaq asandır, sevgini yaymaq, paylaşmaq isə çətindir. Bakıda İslam Həmrəyliyi Oyunlarını təşkil edənlər sevgini yaymağa çalışıblar və belə bir çətin işin öhdəsindən uğurla gəliblər. Hər şey çox gözəl, yüksək səviyyədə təşkil olunub".
"Bakıda keçirilən IV İslam Həmrəyliyi Oyunları yüksək səviyyədə təşkil olunub". Bunu isə Oyunların açılışına gələn iranlı qonaqlar deyiblər.
Onlar qeyd ediblər: "Bu, Bakıya ilk səfərimiz deyil. Hər dəfə Bakını daha da gözəl görürük. Oyunların təşkili isə yüksək səviyyədədir. Təşkilatçılara təşəkkür edirik, hər şey çox gözəldir".
İranlı qonaqlar İslam Həmrəyliyi Oyunlarının dostluq, birlik rəmzi olduğunu və Bakının bu rəmzi çox gözəl təqdim etdiyini vurğulayıb.
"Qardaş ölkə Azərbaycan IV İslam Həmrəyliyi Oyunlarında gözəl təşkilatçılıq nümayiş etdirir". Bunu İslamiada ilə bağlı Bakıya Türkiyənin Ankara şəhərindən gəlmiş Tamer Özbay deyib.
Qonaq qeyd edib: "IV İslam Həmrəyliyi Oyunlarının gözəl açılışını görmək üçün Bakıya gəldik. İllər öncə Bakıda olmuşdum, o zaman şəhər belə deyildi. Bu dəfə böyük bir inkişafın şahidi oldum. Bakı artıq çox müasir bir Avropa şəhəridir. Əminəm ki, getdikcə daha da gözəlləşəcək".
"Bakıda keçirilən İslam Həmrəyliyi Oyunları ölkədə idmanın daha da inkişafına yol açacaq". Bunu isə Kot-d’İvuarın güləş üzrə məşqçisi Allyu Onore deyib.
O, yarışların yüksək səviyyədə təşkil olunduğunu deyib: "Hamı üçün - idmançılar və məşqçilər üçün yaxşı şərait yaradılıb".
Məqşçi qeyd edib ki, o, Bakıya birinci dəfə gəlib və şəhər onun çox xoşuna gəlib.
