Əhməd Qəşəmoğlu: "Su festivalının təntənəli şəkildə keçirilməsi insanların İslam Oyunları barədə daha çox məlumat əldə etməsinə səbəb olub"
Bir neçə gündən sonra Bakı möhtəşəm bir tədbirə - IV İslam Həmrəyli Oyunlarına ev sahibliyi edəcək. İslam Həmrəyliyi Oyunları ərəfəsində aprelin 5-dən mayın 5-dək davam edən, Xəzərdən başlayan su səyahətinin sonuncu ünvanı Sumqayıt şəhəri olub.
Xatırladaq ki, Xəzərdən başlayan səyahətin ilkin təqdimat mərasimi aprelin 5-də Bakı şəhərinin Daş Salnamə Muzeyində keçirilib. Azərbaycan Prezidenti İlham Əliyev Xəzər dənizindən götürülmüş suyu Azərbaycanın bütün guşələrindən gəlmiş uşaqlara təqdim edib. Daha sonra, səyahət proqramının tərkib hissəsi olaraq, uşaqlar həmin suyu özləri ilə birlikdə yaşadıqları rayonlara aparıb. Bu su Bakı şəhərinin və İslam Oyunlarının Azərbaycanın rayonlarına xatirə hədiyyəsidir.
Qeyd edək ki, 50-dən çox İslam ölkəsindən olan üç mindən artıq atlet idmanın 20 növü üzrə mübarizə aparacaq. Mayın 12-dən 22-dək davam edəcək yarışlar Bakının ən müasir 16 idman meydançasında təşkil olunacaq. İslam Həmrəyliyi Oyunlarının təşkilinin əsas məqsədi İslam ölkələri arasında həmrəylik və əməkdaşlıq ruhunun möhkəmləndirilməsi və müsəlman gəncləri arasında əlaqələrin inkişaf etdirilməsidir.
Bir ay ərzində davam edən su səyahətinin nəticələri barədə danışan sosioloq Əhməd Qəşəmoğlu "Bakı-Xəbər"ə açıqlamasında qeyd etdi ki, ölkədə beynəlxalq səviyyəli tədbirlərin keçirilməsi insanlarda xoş ovqat yaradır: "Bəllidir ki, su müqəddəsdir. İnsan uzaq səfərə gedən zaman onun arxasınca hər zaman su tökülüb. Su ilə bağlı bizim çoxlu adətlərimiz var".
Həmsöhbətimizin sözlərinə görə, İslam Oyunları ilə bağlı su səyahətinin təşkil olunması bölgələrdə yaşayan insanlar tərəfindən yüksək əhval-ruhiyyə ilə qarşılanıb: "Bu hal daha çox rayonlarda hiss olunur. Su festivalının təntənəli şəkildə keçirilməsi insanların İslam Oyunları barədə daha çox məlumat əldə etməsinə səbəb olub".
Günel CƏLİLOVA
