"Vacib faktorlar Azərbaycanın böyük idman mərkəzinə çevrildiyini səciyyələndirir"
Sentyabrın 2-də "Bakı Kristal Sarayı"nda 42-ci Ümumdünya Şahmat Olimpiadasının birinci turuna start verilməsi ilə əlaqədar tədbirdə iştirak edən Prezident İlham Əliyev mətbuat nümayəndələrinə müsahibəsində bildirib ki, Azərbaycan dünyanın idman mərkəzlərindən birinə çevrilir. Dövlət başçısı qeyd edib ki, bu tədbir Azərbaycanın tanıdılması baxımından çox əhəmiyyətlidir, bizim üçün böyük şərəfdir: "Ümumdünya Şahmat Olimpiadasının Azərbaycanda keçirilməsi, əlbəttə ki, bizi çox sevindirir. Şadam ki, bütün təşkilati məsələlər yüksək səviyyədə öz həllini tapıb".
İlham Əliyev bildirib: "Əlbəttə, Azərbaycan bir daha özünü dünyaya müasir, inkişaf edən ölkə kimi təqdim edir. Əminəm ki, bütün qonaqlar öz vətənlərinə ən xoş təəssüratlarla qayıdacaqlar və Azərbaycan haqqında dünya şahmat ictimaiyyətinin daha da dolğun təəssüratı olacaqdır. Ona görə bunun çox böyük əhəmiyyəti var. Azərbaycanda artıq mötəbər beynəlxalq yarışlar ənənəvi olaraq keçirilir. Avropa Oyunları, Şahmat Olimpiadası, "Formula-1" yarışı, gələn il İslam Həmrəyliyi Oyunları. Yəni Azərbaycan dünyanın idman mərkəzlərindən birinə çevrilir".
Azərbaycanın dünya idman mərkəzlərindən birinə çevrilməsi nə ilə səciyyələndirilir?
İdman mütəxəssisi Ceyhun Məmmədov qəzetimizə açıqlamasında bildirdi ki, ölkə başçısının bu cür təqdimatında böyük həqiqət var: "Son illər ərzində Azərbaycan doğrudan da olduqca mötəbər idman yarışlarına ev sahibliyi edib. Gənc bir dövlət üçün bu böyük göstəricidir. Təsəvvür edin, bəzən dünyanın ən inkişaf etmiş ölkələri belə miqyaslı yarışların təşkil olunmasında çətinlik çəkir. Bunun üçün böyük maddi vəsait və idman infrastrukturu tələb edilir. Ölkəmizdə aparılan inkişaf nəticəsində biz bunların yaradılmasına nail olmuşuq. Hazırda Azərbaycanda elə idman qurğuları mövcuddur ki, ölkəmiz istənilən həcmli və təyinatlı idman yarışına ev sahibliyi edə bilər. Bizim bu sahədə təcrübəmiz də var. Avropa Oyunları, "Formula-1" kimi yarışları yüksək səviyyədə təşkil etdik. İslam Həmrəylik Oyunlarını keçirmək üçün infrastrukturumuz tam hazır vəziyyətdədir. Bütün sadaladığımız vacib faktorlar Azərbaycanın böyük idman mərkəzinə çevrildiyini səciyyələndirir".
Məhəmmədəli QƏRİBLİ
