“Bu gün Avropada gedib Azərbaycanı söyənlərin əksəriyyəti ora oxumağa gedən gənclərdir. Vaxtı ilə burdan ora oxumağa göndərdiklərimizdir”. APA-nın məlumatına görə, bunu deputat Eldar İbrahimov Milli Məclisin dünən keçirilən iclasında bildirib.
O qeyd edib ki, bu həmin gənclərin böyük yanlışlığıdır: “Bir var erməni danışır, bir də var azərbaycanlılar. Həmkarımız Adil Əliyev tədbir keçirərkən orada baş verənləri gördüm, təəssüf etdim. Onlar kimdir? Vaxtilə bizim ora təhsil almaq üçün göndərdiyimiz şəxslərdir. Təbii ki, bizim də nöqsanlarımız var. Heç bir dövlət nöqsansız deyil. Təkcə deputatlar yox, hər kəs belə çirkin, alçaq insanların cavabını verməlidir. Mən Azərbaycanı təhqir edənlərə “ar olsun!” deyirəm”.
Deputat Ağacan Abıyev isə deyib ki, Azərbaycanı təhqir edənlərə azərbaycanlı adını qoymaq düzgün deyil: “Onlar azərbaycanlı deyillər, Azərbaycanın düşmənləridir. Hər bir azərbaycanlı onlara “lənət” deməlidir”.
Hüquq siyasəti və dövlət quruculuğu komitəsinin sədri Əli Hüseynli bildirib ki, ölkə prezidentinin, Azərbaycan hakimiyyətinin ünvanına səslənən təhqirlərin xalqa ünvanlandığını hamı bilməlidir: “Bu məsələdə həmrəy olmalıyıq. Azərbaycanlı olmağın tək şərti burada doğulub böyümək deyil. Bəzi insanlar azərbaycançılıq təfəkküründən uzaqdırlar. Avropada da hazırda Azərbaycanın milli-mənəvi maraqlarından uzaq olanlar var. Bizim həmrəyliyimiz də bu məsələdə ölkəyə, ölkə prezidentinə, xalqa, dövlətə sədaqətimizi göstərərək təhqirlərlə barışmayan mövqeyimizin olmasını göstərir. Bu məsələdə hər kəsin mövqeyi xalqın mövqeyi deməkdir. Spiker Oqtay Əsədov da bildirib ki, onlar Azərbaycan xalqına xas olan xüsusiyyətlərə malik insan deyillər, çünki bizim xalq mərddir”.
Siyavuş Novruzov susan deputatlara da irad tutdu…
“Bu günə qədər bir dənə də Ermənistan səfirliyi qarşısında aksiya keçirməyən adını azərbaycanlı qoyanlar Fransada Azərbaycan səfirliyi qarşısında etiraz aksiyası keçirirlər. Belə çıxır ki, ermənilər artıq istirahət edə bilərlər, çünki artıq onların funksiyasını yerinə yetirən var”. Yeni Azərbaycan Partiyasının (YAP) icra katibinin müavini, deputat Siyavuş Novruzov Milli Məclisin iclasında belə deyib.
O qeyd edib ki, bu yaxınlarda Kölndə azərbaycanlıların 31 Mart soyqırımının 100 illiyi ilə bağlı keçirilən tədbirdə də həmin şəxslərin təxribat cəhdi bunu sübut edib: “Bu insanlara azərbaycanlı demək mümkün deyil. Onlar Azərbaycanı, xalqı, milləti təhqir edirlər. Səfirliyimiz Azərbaycanın orada bir parçasıdır, bizim səfirliyimizi təhqir edirlər. Azərbaycanlı olan torpağını, ordusunu təhqir etməz, ona qarşı bu şəkildə müxaliflik etməz. Eyni zamanda buna qarşı susan bəzi şəxsləri də başa düşmürəm. Avropadan Azərbaycana qarşı təhqirlərlə bağıranlara niyə susursunuz? Burada təriflə bağlı mövzu olsaydı, növbə əlindən mənə çıxış çatmazdı. Səsinizi çıxarın, mövqeyinizi bildirin!”
Deputatlar iclas zalını vaxtsız tərk etdiyi üçün səsvermə baş tutmadı, ancaq…
Milli Məclisin dünən keçirilən iclasında “Peşə təhsili haqqında” qanun layihəsinin ikinci oxunuşda müzakirəsi zamanı səsvermə baş tutmayıb. Buna isə iclas zalında deputatların sayının az olması səbəb olub.
Səsvermə zamanı zalda cəmi 78 deputatın olması spiker Oqtay Əsədovun ciddi iradına səbəb olub.
"Haradadır bunların qalanı? İclas bitməmiş boğazları quruyub ki, çaya qaçıblar? Çağırın, gəlib səs versinlər heç olmasa", - deyə o bildirib.
Deputatların iclas zalına qayıtmasından sonra səsvermə baş tutub.
Layihə ikinci oxunuşda qəbul olunub.
