Martın 31-də Nəsimi Rayon İcra Hakimiyyəti Azərbaycan Respublikası Təhsil Nazirliyinin Estetik Tərbiyə üzrə Respublika Tədris-Metodik Mərkəzinin Təsviri Sənət qalereyasında anım tədbiri keçirib.
Tədbirdə rayon məktəblilərinin və gənclərinin azərbaycanlıların soyqrımına həsr olunmuş rəsmləri nümayiş olunub.
Nəsimi Rayon İcra Hakimiyyəti başçısının birinci müavini Gülarə Verdiyeva çıxış edərək bildirib ki, 1998-ci ildən 31 Mart Azərbaycan Respublikasında dövlət səviyyəsində Azərbaycanlıların Soyqırım Günü kimi qeyd edilir. Azərbaycanlıların kütləvi surətdə qırğına, repressiyalara məruz qalması, doğma yurdlarından sürgün edilməsi və didərgin salınmasını XX əsr tarixinin ən faciəli və dəhşətli səhifələri adlandıran RİH rəsmisi bildirib ki,“Böyük Ermənistan” yaratmaq xülyasında olan ermənilər 1905-1907-ci illərdə azərbaycanlılara qarşı açıq şəkildə genişmiqyaslı qanlı aksiyalar həyata keçirib. 1918-ci ilin mart ayında isə əksinqilabçı ünsürlərlə mübarizə şüarı altında Bakı Kommunası tərəfindən ümumən Bakı quberniyasını azərbaycanlılardan təmizləmək məqsədi güdən mənfur plan həyata keçirilməyə başlanıb ki, həmin günlərdə ermənilər Bakı, Şamaxı, Quba qəzalarında, Qarabağda, Zəngəzurda, Naxçıvanda, Lənkəranda və Azərbaycanın başqa bölgələrində azərbaycanlılara qarşı xüsusi qəddarlıqla soyqırım törədib.
Natiq xatırlatdı ki, həmin siyasət sonra da davam etdirilərək, SSRİ Nazirlər Sovetinin 23 dekabr 1947-ci il “Ermənistan SSR-dən kolxozçuların və başqa azərbaycanlı əhalinin Azərbaycan SSR-in Kür-Araz ovalığına köçürülməsi haqqında” xüsusi qərar verilib və bunun əsasında ermənilər1948-1953-cü illərdə azərbaycanlıların öz tarixi torpaqlarından kütləvi surətdə deportasiyasına nail olub.
1988-ci ildə ortaya atılan qondarma Dağlıq Qarabağ konfliktinin ilkin mərhələsində isə 100 minlərlə azərbaycanlının öz tarixi torpaqlarından qovulduğunu diqqətə çatdıran Gülarə Verdiyeva 1992-ci ilin fevralında ermənilərin Xocalı faciəsini törətməsini tarixdə misli görünməmiş faciə adlandırıb.
Tədbirdə çıxış edənlər - Qarabağ müharibəsi veteranları, əlillləri və şəhid ailələri İctimai Birliyinin Nəsimi rayon şöbəsinin sədri Azər Quliyev, Böyük Vətən Müharibəsi, Əmək və Silahlı Qüvvələr Veteranlar Şurasının Nəsimi rayon şöbəsinin sədri İsmayıl Fərəcov və 46 saylı tam orta məktəbin direktoru Sevinc Budaqova Nəsimi rayonunda azərbaycanlıların soyqırımının 100 illiyi ilə bağlı keçirilən tədbirlərin əhəmiyyətini qeyd edərək, hər zaman xalqımıza qarşı edilən cinayətlərin, qırğınların yaddaşlara həkk olunduğunu bildirib.
Sonda 31 Mart - azərbaycanlıların soyqırımına həsr olunmuş videoçarx nümayiş olunub və çəkdikləri rəsmlərə görə bir qrup məktəbliyə Nəsimi Rayon İcra Hakimiyyətinin xatirə hədiyyələri təqdim edilib.
