Azərbaycanın işğal altındakı Qarabağ torpaqlarında separatçıların yaratdığı qondarma “respublikanın” qondarma “prezidenti” Bako Saakyan ABŞ səfərinin ardından daha çox erməninin yaşadığı Livana üz tutub.
Bu barədə erməni saytları xəbər yayıb. Bildirilir ki, Beyrutda o, artıq katolikos I Aramla görüşüb və “erməni dövlətçiliyinin” yaranmasının 100 illiyilə bağlı tədbirlərdə iştirak edib. Erməni saytı yazır ki, Rusiyanın “Regnum” agentliyi qondarma rejimin qondarma “prezidenti”nin Moskvaya da rəsmi səfərə dəvət olunmasını vacib sayır. Lakin saytın özünün bu məsələyə münasibəti maraqlıdır. Burada müəllif xatırladır ki, Saakyanın Moskvaya yeganə “rəsmiyəbənzər” səfəri 2015-ci ilin noyabrında baş tutub və onun sərsəm bəyanatı üzündən geniş rezonans doğurub. Belə ki, səfər Moskvada keçirilən “Artsax günləri” ilə bağlı olub. Səfər çərçivəsində Saakyanı “Regnum”a brifinqə dəvət ediblər. Brifinqin ardından isə agentlik belə bir xəbər yayıb:”Stepanakert (Xankəndi) aeroportundan Rusiya HKQ-nin Suriyada apardığı antiterror əməliyyatlarında istifadə oluna bilər. Bu barədə Dağlıq Qarabağın “başçısı” Bako Saakyan bəyan edib”. Üstəlik qeyd olunub ki, qondarma “başçı” aeroportun istifadəyə verilməsinin ardından Dağlıq Qarabağın bu mövzu ilə bağlı Rusiya ilə danışıqlar aparmağa hazır olacağını deyib.
Təbii ki, hətta Ermənistanın elə silsilə terror hadisələrilə işğal etdiyi, lakin bu müddət ərzində onun özü tərəfindən belə tanınmayan “respublikanın” Rusiyanın antiterror əməliyyatına dəstək verməsi qəbul oluna bilməzdi və Azərbaycanın da, münaqişənin tənzimlənməsində məsuliyyətli olan Minsk Qrupunun da sərt reaksiyası özünü çox gözlətmədi. Qondarma rejimin qondarma başçısının sözçüsü isə verilən açıqlamaya düzəliş etməli oldu. Lakin erməni tərəfi bunu Rusiyanın Dağlıq Qarabağa öz sülhməramlılarını yerləşdirmək üçün zəmin hazırlamaq cəhdi kimi qiymətləndirdi. Görünən odur ki, bu məsələdən erməni tərəfinin nigarançılığı hələ də qalmaqdadır. Belə olmasaydı, son zamanlar ABŞ-ın ətəyindən yapışan işğalçı dövlətdə “Reqnum”un “rəsmi səfər” ideyası belə qıcıqla qarşılanmazdı. Axı erməni tərəfi təmas xəttində “müşahidə mexanizmləri”nin tətbiqində maraqlıdır. Bu marağın arxasında hansı “erməni hiyləsinin” gizləndiyi hələlik bəlli deyil və onu zaman göstərəcək. Lakin bir şey bəllidir ki, həmin bu zaman heç də ermənilərin xeyrinə işləmir, həm də qəti şəkildə...
Saakyan isə fürsət varkən dünyanı gəzsin, sabah nə olacağı bəlli(dir) deyil!
SAMİRƏ
