“Dostluq”- Udmurtiya Azərbaycan İctimai Mərkəzi regional ictimai təşkilatının üç illik fəaliyyətin yekununa dair hesabat və seçki yığıncağı keçirilib.
Euarasia Diary xəbər verir ki, “Dostluq”- Udmurtiya Azərbaycan İctimai Mərkəzinin üzvlərindən başqa, hesabat-seçki yığıncağında Udmurtiya Respublikasının Milli Siyasət nazirinin birinci müavini Pavel Orlov, “Təhsilin inkişafı İnstitutu”nun direktoru, Rusiya Federasiyası ictimai palatasının üzvü, Udmurtiya Xalqlar Assambleyasının nümayəndəsi Vladimir Baymetov, Respublika Xalqlar Dostluğu Evinin direktoru Vadim Yeroşenko iştirak edib.
Təşkilatın üç illik fəaliyyətilə bağlı “Dostluq”- Udmurtiya Azərbaycan Regional İctimai Mərkəzi”nin sədri Zülfüqar Mirzəyev hesabat verib. O qeyd edib ki, 1998-ci ildə yaradılmış Azərbaycan icması bugün Udmurtiya Respublikasında mövcud olan digər mədəni birliklər arasında layiqli yer tutur. Hazırda Sarapul və Votkinsk, Şarkan, Kezsk, Balezinsk, İqrinsk, Debesk, Yakşur-Bodinsk, Vavojsk və Karakulinsk rayonlarında diaspora təşkilatları aktiv fəaliyyət göstərir. 2016-cı ilin aprel ayında isə Malopurqinsk rayonunda yeni regional bölmə yaradılıb.
Zülfüqar Mirzəyev bildirib ki, təşkilatın sədri seçildiyi andan (23.10.2014) millətlərarası münasibətlərin möhkəmlənməsinə həsr olunan 150-dən çox tədbir keçirilib, “Dostluq”un fəaliyyəti haqqında KİV-də 120-dən artıq məqalə dərc olunub. Diasporanın nümayəndələri respublikanın ictimai həyatında layiqli yer tutur və Udmurtiyanın inkişafına mühüm töhfələr verir. 2014-17-ci illərdə Azərbaycan diasporasının nümayəndələrinə 30-dan çox diplom, fəxri fərman və digər mükafatlar verilib. Bu, şübhəsiz ki, bizim işimizin nəticəsidir.
Mühüm tədbirlərdən biri də 2016-cı ilin yanvar ayında “Bayram Hümbətov” adına dərnəyin, 2016-cı ilin fevral ayında isə Azərbaycan rəqslərinin öyrədildiyi məktəbin açılmasını qeyd etmək olar. Hər il dama və nərd üzrə beynəlxalq turnir həyata keçirilir. Həmçinin, respublika mədəni birliklərinin nümayəndələri arasında “Nə? Harada? Nə zaman? intellektual oyunları keçirilir.
“Dostluq”- Udmurtiya Azərbaycan İctimai Mərkəzi xeyriyyəçilik fəaliyyətinə xüsusi diqqət ayırır, imkan daxilində qocalar evi, uşaq evləri və əlillər cəmiyyətinə yardım edir. “Bu il də biz onları diqqətdən kənarda qoymayacağıq və hesab edirik ki, bu bizim işimizin vacib istiqamətidir”, deyə Zülfüqar Mirzəyev yekun çıxışında qeyd edib.
Milli Siyasət nazirinin birinci müavini Pavel Orlovun, Udmurtiya Xalqlar Assambleyasının nümayəndəsi Vladimir Baymetovun və Respublika Xalqlar Dostluğu Evinin direktoru Vadim Yeroşenkonun çıxışlarında isti və minnətdarlıq ifadə edən fikirlər səsləndirilib. Onlar qeyd edib ki, Azərbaycan diasporası respublikanın ən fəal milli-mədəni birliklərindən biridir. Onlar, demək olar ki, respublikanın Milli Siyasət Nazirliyi tərəfindən keçirilən bütün tədbirlərdə iştirak edirlər.
Cari məsələlərin müzakirə olunmasından və diasporanın fəaliyyəti barədə foto hesabatın nümayişindən əlavə İdarə Heyətinin, Ağsaqqallar Şurasının və təftiş komissiyasının yeni tərkibi müəyyən olunub. Diasporanın sədri İdarə Heyətinin yekdil qərarı ilə yenidən Zülfüqar Mirzəyev seçilib. O, iştirakçılara göstərdikləri etimada görə təşəkkür edib və həmkarlarını doğma dilin və milli mədəniyyətin inkişaf etdirilməsi üçün şəraitin əvvəlki kimi qorunub saxlanacağına söz verib. Zülfüqar Mirzəyev həmçinin, qeyd edib ki, Udmurtiya və Azərbaycan xalqları arasındakı dost münasibətlərin möhkəmləndirilməsi, Udmurtiya Respublikası və Azərbaycan Respublikası arasında iqtisadiyyat, mədəniyyət, təhsil və s. sferalarda sıx əlaqələrin yaradılması istiqamətində səy göstərəcək. Yeni millətlərarası layihələr işləyib hazırlanacaq və həyata keçiriləcək.
