Avropa Şurası Parlament Assambleyası (AŞ PA) ikili standartların tətbiqindən əl çəkməlidir. Trend-in məlumatına görə, bunu Milli Məclisin deputatı Qənirə Paşayeva AŞ PA-nın qış sessiyasında deyib. Q.Paşayeva Dağlıq Qarabağ münaqişəsi üzrə 1416 saylı qətnamənin hələ də Ermənistan tərəfindən yerinə yetirilmədiyini qeyd edərək, AŞ PA-nı bu məsələyə nəzər yetirməyə çağırıb.
AŞ PA-da azad müzakirələrdə çıxış edən Azərbaycan nümayəndə heyətinin üzvü ildönümü yaxınlaşan Xocalı soyqırımından danışıb, işğalçı Ermənistanın prezidentini təşkilata dəvət edən AŞ PA rəhbərliyinə etirazını bildirib və Sarkisyanın səsləndirdiyi yalanlara sərt cavab verib.
Ermənistan nümayəndə heyətinə etiraz edən Q.Paşayeva onları Assambleyaya yalan məlumatlar verməkdə ittiham edib və Xocalıdan danışıb: "Düz bir ay sonra biz Ermənistanın 1992-ci ildə törətdiyi Xocalı soyqırımının ildönümünü qeyd edəcəyik. Bu cinayəti törədənlər hələ də azad şəkildə Ermənistanda gəzirlər və ədalət qarşısında cavab verməyiblər. Ermənistan silahlı qüvvələrinin işğal edilmiş Azərbaycan torpaqlarından, o cümlədən Xocalıdan çıxarılmasını tələb edən Assambleyanın 1416 saylı qətnaməsi Ermənistan rəhbərliyi tərəfindən son 13 ildə yerinə yetirilməmiş qalır. Buna baxmayaraq, AŞ PA tərəfindən Ermənistanın bu cür hərəkətinə qarşı heç bir ciddi addım atılmayıb. Ermənistan silahlı qüvvələrinin növbəti təxribatının qarşısını almağa çalışarkən 2 gənc azərbaycanlı təkcə yanvar ayı ərzində həyatlarını itirib. Bu qətnamənin qəbul edilməsinə baxmayaraq, Ermənistan silahlı qüvvələri Zəhra, Fariz, Aygün adlı körpə uşaqları və onlarla mülki vətəndaşı vəhşicəsinə öldürüb və yaralayıb, onların evlərini dağıdıb və yandırıb. Mən parlamentdə cəbhəboyu yerləşən regionlardan birinin təmsilçisi kimi həqiqəti öz gözləri ilə görmək arzusunda olan həmkarlarımı regionumuza dəvət edirəm. Siz Ermənistanın cəbhəboyu törətdiyi cinayətləri öz gözlərinizlə görəcəksiniz. Əgər bu qətnamə yerinə yetirilsəydi, çoxlu sayda insan, onlarla körpə və mülki vətəndaşlar öz həyatlarını itirməyəcəkdi. Təəssüflər olsun ki, bu qətnamələrin yerinə yetirilməsi üçün Ermənistana təzyiq göstərmək əvəzinə, AŞ PA bu işğalçı dövlətin prezidentini bizim təşkilata dəvət edib və ona yalanlar üzərində qurulan nitq söyləmək imkanı verilib. Biz bunu kəskin şəkildə qınayır və etirazımızı bildiririk. Çünki Ermənistan prezidenti Azərbaycan torpaqlarının işğalında və Xocalı soyqırımının törədilməsində birbaşa iştirak etmiş şəxsdir".
Q.Paşayeva əlavə edib ki, eyni zamanda, Ermənistan prezidenti neçə illərdir ki işğal edilmiş Azərbaycan torpaqlarından erməni silahlı qüvvələrinin çıxarılmasını və bir milyondan artıq azərbaycanlı qaçqın və məcburi köçkünün öz doğma evlərinə qayıtmasına imkan verilməsini tələb edən AŞ PA və BMT qətnamələrini yerinə yetirməkdən boyun qaçırır: "Azərbaycan xalqı AŞ PA-dakı ikili standartların səbəbini anlaya bilmir. Çox təəssüflər olsun ki, Assambleya işğal edilmiş Azərbaycan torpaqlarından erməni silahlı qüvvələrinin çıxarılmasını və bir milyondan artıq azərbaycanlı qaçqın və məcburi köçkünün öz doğma evlərinə qayıtmasına imkan verilməsini tələb edən qətnamələri yerinə yetirməyən işğalçı dövlətin rəhbərindən onun Avropa Şurasına səfəri müddətində bu cür hərəkətləri dayandırmağı və qətnamələri yerinə yetirməyi tələb etmədi. Biz Assambleyanı bu cür ikili standartlara son qoymağa çağırırıq. Biz Assambleyanı öz qətnamələrinə hörmət etməyə və 1416 saylı qətnamənin və Sərsəng su anbarı ilə bağlı qətnamənin yerinə yetirilməsi üçün Ermənistana qarşı ciddi tədbirlər görməyə, təzyiq göstərməyə çağırırıq. Bunu sizdən 25 ildir öz evlərinə qayıda bilməyən və insan haqları Ermənistan tərəfindən pozulmuş bir milyondan çox azərbaycanlı qaçqın və məcburi köçkün gözləyir".
Millət vəkili həmçinin bildirib ki, Ermənistan Avropa Şurasının çağırışlarına məhəl qoymur və girovluqda saxlanılan azərbaycanlılar - Dilqəm Əsgərovu və Şahbaz Quliyevi azad etməyi rədd edir: "Bizim təşkilatın rəhbərləri Ermənistandan onları azad etməyi ciddi şəkildə tələb etməli və onların insan haqlarını qorumalıdır. Eyni zamanda, biz Assambleyanı, təşkilat rəhbərlərini Xocalı soyqırımının ildönümü ərəfəsində bu dəhşətli cinayəti qınayan bəyanat qəbul etməyə çağırırıq. Birlikdə bu dəhşətli cinayəti törədənlərin ədalət qarşısında cavab vermələrinə nail olmalıyıq. İlk növbədə, biz bunu bəşəriyyət naminə etməliyik. Hörmətli Assambleya üzvləri, bir neçə gün əvvəl Azərbaycan, Gürcüstan və Türkiyə birlikdə Avropanı Asiya ilə birləşdirən Bakı-Tbilisi-Qars dəmir yolu layihəsini işə saldılar. Bu böyük layihə tək bizim üçün deyil, həm də bütün Avropa üçün vacibdir. Ermənistan tərəfindən Azərbaycan torpaqlarının işğal edilməsindən irəli gələn gərginliyin davam etməsi təkcə bizim maraqlara deyil, həm də Avropanın maraqlarına böyük hədədir. Ona görə də AŞ PA bu məsələnin həllində daha fəal rol oynamalıdır”.
