Silahlı münaqişələr zamanı istənilən hərəkətlər mülki şəxslərə qarşı deyil, kombatantlara qarşı yönəlməlidir. Trend-in məlumatına görə, bunu Milli Məclisin deputatı Vüsal Hüseynov AŞPA-nın qış sessiyasında deyib.
“Beynəlxalq humanitar hüququn əsas prinsiplərindən biri kombatatntlar və mülki şəxslər arasında sərhəddin müəyyən edilməsidir. Təəssüf ki, biz bir çox hallarda mülki şəxslərə qarşı qəsdən törədilmiş hücumların şahidi oluruq. Bununla əlaqədar bir misal gətirmək istəyirəm: ötən ilin yayında Ermənistan Silahlı Qüvvələri tərəfindən Azərbaycan ərazisinə qəsdən açılmış atəş nəticəsində iki yaşlı Zəhra Quliyeva və onun nənəsi həlak olub. Bunun Ermənistanın öz üzərinə götürdüyü bütün beynəlxalq öhdəliklərə zidd olmasına baxmayaraq, məsələ ilə bağlı araşdırma aparılmayıb və bu cinayəti törədənlər dindirilməyib”,- deyə o xatırladıb.
Deputat xatırladıb ki, AŞPA-nın dünənki sessiyasında Ermənistan prezidenti Azərbaycanın işğal olunmuş ərazisi olan Xocalıda mülki şəxslərin qətlə yetirilməsində şəxsən iştirak etdiyini etiraf edib və bununla da bu aktın soyqırım olduğunu bir daha təsdiqləyib. "Bu cür müzakirələrdə iştirak edərəkən yalnız sözlərlə kifayətlənib, cinayətkarların əsl simasını onların tutduğu vəzifələrdən asılır olmayaraq ifşa etməməklə biz insanlar arasında nüfuzumuzu itiririk ",- deyə Vüsal Hüseynov bildirib.
Deputat vurğulayıb ki, uşaqlar silahlı münaqişələr zamanı əhalinin ən həssas qrupuna aiddir.
“Azərbaycan silahlı münaqişələrin uşaqlar üçün yaratdığı fəsadları təhlil edilməsini təklif edir”. Bu barədə isə Azərbaycan Milli Məclisinin deputatı Sevinc Fətəliyeva AŞPA-nın qış sessiyasında çıxış edərkən deyib.
«Biz bir çox uşağların silahlı münaqişələr zonasında yaşadığını unutmamalıyıq»,- deyə o bildirib.
Sevinc Fətəliyeva əlavə edib ki, onun məruzəsinin məqsədi Suriya, Myanma, Sudan, Dnestryanı bölgə, Dağlıq Qarabağ və Ukraynadakı münaqişələrdən əziyyət çəkən uşağların taleyinə diqqət çəkməkdən ibarətdir.
O həmçinin münaqişələrdən əziyyət çəkən uşağların həyatının təhlükə altında olmasını da qeyd edib.
«Silahlı münaqişə zonalarında uşaqlar Cenevrə Konvensiyası və BMT-in uşaq hüquqlarına dair Konvensiyasına uyğun olaraq xüsusi müdafiə ilə təmin olunmalıdır. Uşaqlar münaqişələrdən əziyyət çəkir və beynəlxalq ictimayyət onları qoruya bilmir. Bu ciddi bir problemdir. Biz silahlı münaqişələrin uşağlar üçün fəsadlarının təhlil olunmasını, onlara fəal müdaxilə edilməsini və bu münaqişələrə son qoyulmasını təklif edirik. Dünyanın bütün regionlarında münaqişələrdən əziyyət çəkən uşağların reabilitasiyası üzrə proqramlar hazırlanmalıdır. Əgər bir çox ölkələrdə olduğu kimi bütöv bir nəsillərin itirilməsini istəmiriksə, biz sadəcə olaraq onların taleyinə acımaqla kifayətlənməməliyik, biz onların taleyinə diqqət yetirməliyik», - deyə o bildirib.
Milli Məclisin deputatı Rövşən Rzayev isə bildirib ki, Ermənistan tərəfindən qoşunların təmas xəttində atəşkəs rejimini pozması nəticəsində böyüklərlə yanaşı uşaqlar da həlak olur. O məruzəçiləri bu məsələyə xüsusi diqqət yetirməyə və onu sessiyanın gündəliyinə daxil edilməsinə çağırıb.
Deputat xatırladıb ki, Azərbaycan torpaqlarının davam edən işğalı nəticəsində Azərbaycan tərəfindən 700-dən çox mülki şəxs, o cümlədən 92 azyaşlı itkin düşüb.
«Məsələnin məruzəyə daxil edilməsi bizim AŞPA və digər beynəlxalq qurumlar çərçivəsində uşaq və qadınların silahlı münaqişələr nəticəsində əziyyət çəkməsinin qarşısının alınması naminə addımlar atmağa qadir olmağımızı nümayiş etdirmiş olar», - deyə Rövşən Rzayev qeyd edib.
Qeyd edək ki, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun başçılıq etdiyi nümayəndə heyəti Avropa Şurası Parlament Assambleyasının qış sessiyasında iştirak etmək üçün Fransanın Strasburq şəhərinə gəlib.
Nümayəndə heyətinə Mədəniyyət komitəsinin sədri Rafael Hüseynov, deputatlardan Sahibə Qafarova, Sevinc Fətəliyeva, Qənirə Paşayeva, Ülviyyə Ağayeva, Sabir Hacıyev, Elşad Həsənov, Vüsal Hüseynov, Fazil Mustafa, Asim Mollazadə, Rövşən Rzayev daxildirlər.
