Fransada Azərbaycanın Dostları Assosiasiyası da Ermənistan qoşunlarının Azərbaycanın dinc əhalisinə qarşı hücumunu kəskin pislədi
Mülki əhalinin qəsdən atəşə tutulması mənfur hərəkətdir. Baki-xeber.com-un məlumatına görə, bu barədə iyulun 4-də Ermənistan silahlı qüvvələrinin Azərbaycanın Füzuli rayonun Alxanlı kəndinin mülki əhalisinin atəşə tutması nəticəsində Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna münasibət bildirən Böyük Britaniya-Azərbaycan Parlamentlərarası Dostluq Qrupunun sədri, millət vəkili Bob Bləkman bəyan edib.
“İstənilən insan tələfatı təəssüf hissi doğurur. Lakin iki insanın ölümü ilə nəticələnən dinc sakinlərin qəsdən hədəfə alınması mənfur hərəkətdir. Ermənistan silahlı qüvvələri “təmas xətti” boyunca atəşi dayandırmalı və sülh danışıqlar üçün zəmin yaratmalıdır”, deyə B.Bləkman bildirib.
“BMT-nin məlum 4 qətnaməsinə görə, beynəlxalq hüquq Dağlıq Qarabağı Azərbaycanın tərkib hissəsi kimi tanıyır. Bu qətnamələrin yerinə yetitirilməsi üçün Ermənistan Silahlı Qüvvələrinin işğal olunmuş ərazilərdən çıxarılması zəruridir”.
Trend-in məlumatına görə, bunu isə iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması, Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna münasibət bildirən Almaniya Bundestaqının CDU/CSU koalisiyasından olan deputatı Katrin Albsteiger bəyan edib.
O qeyd edib ki, Azərbaycan da daxil olmaqla hər bir dövlətin ərazi bütövlüyü və siyasi müstəqilliyi toxunulmazdır: "Dövlətlərin ərazi bütövlüyünün qorunması bütün beynəlxalq ictimaiyyətin marağında olmalıdır. Qaçqın və məcburi köçkünlərin öz yurd-yuvalarına qayıtmaq hüququ var. Onların öz yurdlarına qayıdışı yalnız Azərbaycanın ərazisi bütövlüyünün və toxunulmazlığının təmin edilməsi ilə mümkündür".
Deputat bildirib ki, Avropa İttifaqı kimi Almaniya Federativ Respublikası da Dağlıq Qarabağ münaqişəsinin sülh yolu ilə həllinin tərəfdarıdır: "O, regionda sülhün bərqərar olunması və Azərbaycanın ərazi bütövlüyünün bərpası üçün lazımi töhfələr verməyə hazırdır. Almaniya Federativ Respublikası Dağlıq Qarabağ münaqişəsi zamanı baş verən zorakı toqquşmaları pisləyir, onların dərhal dayandırılmasını və atəşkəs razılaşmasına əməl olunmasını tələb edir. Mülki əhali zorakı toqquşmaların əsas qurbanı olmamalıdır.
Fransada Azərbaycanın Dostları Assosiasiyası Ermənistan qoşunlarının Azərbaycanın dinc əhalisinə qarşı təxribat xarakterli fəaliyyətini kəskin şəkildə pisləyir. Trend-in məlumatına görə, assosiasiyanın prezidenti Jan-Fransua Mansel tərəfindən imzalanan bəyanatda dinc sakinlərin həlak olması ilə əlaqədar başsağlığı verilir.
Bəyanatda qeyd olunur ki, Ermənistan qoşunlarının hücumları beynəlxalq hüququn, insan hüquqlarının, o cümlədən 1949-cu il Cenevrə Konvensiyasının, Uşaq Hüquqları Haqqında Konvensiya və İnsan Hüquqlarının Müdafiəsi Konvensiyasının ciddi pozulması deməkdir.
Azərbaycanın Dostları Assosiasiyası Ermənistan-Azərbaycan, Dağlıq Qarabağ münaqişəsinin həlli məsələsində ATƏT-in Minsk qrupunun fəaliyyətsizliyindən təəssüfləndiyini ifadə edir.
Bəyanatda deyilir: "Dağlıq Qarabağ münaqişəsində status-kvo yalnız faciəvi konfrantasiyaya gətirib çıxarır. Ümid edirik ki, beynəlxalq ictimaiyyət yaxın günlərdə Ermənistan təxribatına reaksiya verəcək və BMT Təhlükəsizlik Şurasının müvafiq qətnamələrinin yerinə yetirilməsini tələb edəcək. Ermənistan anlamalıdır ki, beynəlxalq ictimaiyyətə özünü bu münaqişənin qurbanı kimi təqdim etməklə, Azərbaycan torpaqlarının qanunsuz işğalını daim davam etdirə bilməz".
Qeyd edək ki, iyulun 4-də axşam saatlarında erməni silahlı birləşmələri Füzuli rayonunun Alıxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Sərvinaz İltifat qızı isə ağır yaralanıb.
