Azər Həsrət: "Cənab Prezident bütün bunları bizim hər birimizdən yaxşı görür və yaxşı anlayır"
Təxminən bir aydan sonra jurnalistlər üçün tikilən ikinci bina öz sahiblərinə paylanacaq. Məlum olduğu kimi, bütün bu işlər ölkə başçısının verdiyi tapşırıq əsasında aparılır və başlıca məqsəd media nümayəndələrinin mənzil şəraitinin yaxşılaşdırılmasından ibarətdir. Təbii ki, mənzil almaq istəyən jurnalistlər çoxdur və bütün arzu edənləri mənzillə təmin etmək də mümkün deyil.
Məhz bunun üçün də müxtəlif qurumları əhatə edən şəxslərdən ibarət xüsusi komissiya yaradılıb. Hansı jurnalistlərin ev almaqla bağlı iddia ortaya qoya biləcəyinə dair xüsusi kriteriyalar da müəyyənləşib. Hiss edilir ki, şəffaflığın təmin olunmasına xüsusi önəm verilir. Hətta fərdi müraciətlərin də qəbul edildiyi məlumdur. Artıq sənədlərin qəbulu üçün elan olunmuş vaxt da bitdi. Son sözü isə Prezident Administrasiyası deyəcək. Maraqlıdır ki, indidən Prezidentin bu nəcib təşəbbüsünü qaralamaq istəyən qüvvələr meydana çıxıb. Onların əksəriyyəti isə jurnalistlərdən ibarətdir. Başlıca arqumentləri bundan ibarətdir ki, dövlət jurnalistə niyə mənzil verməlidir? Bunu əsas gətirərək bildirirlər ki, bu addımla hakimiyyət jurnalistləri susdurmaq istəyir. Jurnalistlərin mənzil şəraitinin yaxşılaşdırılması ilə bağlı əks kampaniyada səslənən fikirləri nə dərəcədə əsaslı saymaq olar?
Media eksperti Azər Həsrətin sözlərinə görə, hələ evlər verilməmiş, biz bu məsələni müzakirə edəndə heç də bugünkü kimi "dövlət niyə jurnalistə ev verməlidir" deyib yaxasını cıranlar yox idi: "Bəlkə də vardı, amma gözə dəymirdilər. İndi isə bəzi şəxslər iddia edir ki, dövlət jurnalistlərə mənzil verməklə onları nəzarət altına almaq istəyir.
Doğrudanmı belədir? Təbii ki, deyil. Elə ilk bina təhvil veriləndə də bu fikirləri səsləndirmişdim. Demişdim ki, dövlətimizin öz vətəndaş-jurnalistimizi mənzillə təmin etməsi heç də media əhlini buxovlamayacaq. Əksinə, daha yaxşı işləməsi üçün imkan yaradacaq. Aradan illər keçib və dediyim təsdiqini tapır. Nə dövlət o mənzillərdə yaşayan jurnalistlərin işinə müdaxilə edir, nə də orada yaşayan jurnalistlər öz siyasi seçimlərindən vaz keçir. Yəni o binadan mənzil alanlar buna qədər hansı mövqedə idilərsə, indi də o mövqedədir. Dövlətsə heç bir şəkildə onların işinə qarışmır.
Demək istəyirəm ki, dövlətin öz jurnalist vətəndaşlarını mənzillə təmin etməsi tam təbiidir və bunu edən dövlətə sadəcə minnətdar olmaq lazımdır".
Azər Həsrətin qənətincə, dövlətin və özəlliklə də Prezident İlham Əliyevin bu bənzərsiz təşəbbüsü, dünyada bənzəri olmayan xoş məramı, təəssüflər olsun ki, bəzən doğru yozulmur: "Hətta bu nəcib əməli gözdən salmaq üçün davamlı fəaliyyət göstərənlər var. Halbuki, cənab Prezident bu təşəbbüsü gerçəkləşdirməsəydi, həmin adamlar onu jurnalistlərin səsinə səs verməməkdə ittiham edəcəkdi.
Cənab Prezident bütün bunları bizim hər birimizdən yaxşı görür və yaxşı anlayır. Ona görə də humanist davranır, indiki mərhələdə jurnalistlərin mənzil problemini həll etmək üçün təşəbbüsü ələ alır. Mənzilləri bölüşdürmək haqqı varkən bu prosesi belə bizim öhdəmizə buraxmaqla bir daha göstərir ki, məqsədi bizə mənzil verib təsir altına salmaq deyil, doğrudan da haqqı və ehtiyacı olanları mənzillə təmin etməkdir".
Məhəmmədəli QƏRİBLİ
