Tağı Qəmbərov: "Hesab edirəm ki, hüquqi və simvolik məna baxımından belə bir yerdəyişməni etməkdə nəsə problem yoxdu, ancaq texniki aspektdən ola bilər"
Ölkə başçısı İlham Əliyevin sərəncamı ilə Cəbrayılın Cocuq Mərcanlı kəndində aparılan işlərin nəticəsi artıq göz qabağındadır. Ölkə başçısının 15 iyun tarixli sərəncamı ilə Cocuq Mərcanlı kəndində tikinti-bərpa və abadlıq-quruculuq işlərinin davam etdirilməsi, o cümlədən 100 fərdi yaşayış evinin, uşaq bağçasının, həkim məntəqəsinin, digər zəruri sosial və infrastruktur obyektlərinin tikintisi məqsədilə Prezidentin ehtiyat fondundan Qaçqınların və Məcburi Köçkünlərin İşləri üzrə Dövlət Komitəsinə 9 milyon manat ayrılıb.
Bütün bunlar dövlət səviyyəsində Cocuq Mərcanlıda işlərin aparıldığının göstəricisidir. İşğaldan tam azad edilən kəndin Cəbrayıl rayonuna aid olduğunu nəzərə alsaq, həmin rayonun icra hakimiyyətinin də həmin qəsəbəyə köçürülməsi zəruri olmazmı?
Hüquqşünas Tağı Qəmbərov qəzetimizə bildirdi ki, icra hakimiyyətinin binasının Cocuq Mərcanlıya köçürülməsi həm də böyük simvolik məna daşıyar: "Çünki Cocuq Mərcanlı işğal altında olan Cəbrayılın bizdə olan yeganə ərazisidir. Cəbrayılın İcra Hakimiyyətinin binasının Cocuq Mərcanlıya köçürülməsi üçün, mənə elə gəlir ki, heç bir hüquqi baryer yoxdu. Qanunvericilik buna tam imkan verir. Qəsəbədə aparılan quruculuq işləri ilə tanış olanda görünür ki, yüksək səviyyəli infrastruktur yaradılıb. Yəni icra hakimiyyətinin aparatı orda tam fəaliyyət göstərə bilər. Ancaq bunun başqa bir cəhətdən bir qədər problem ola biləcəyini də düşünürəm. Bilirsiniz ki, qaçqın icra hakimiyyətlərinin işçiləri əsasən Biləsuvar və ona yaxın ətrafda cəmləşib. Elə bu səbəbdən də İcra Hakimiyyəti orda yerləşir. İndi məsələnin texniki tərəfinə diqqət edək. Hansısa köçkün ailəsinə icra hakimiyyətindən almağa bir sənəd lazım olacaqsa, həmin adam gərək böyük bir məsafəni qət edib Cocuq Mərcanlıya getsin. Bu da Biləsuvar və ona yaxın ərazilərdə daha kompakt məskunlaşan cəbrayılılar üçün əlavə problem yarada bilər. Hesab edirəm ki, hüquqi və smvolik məna baxımından belə bir yerdəyişməni etməkdə nəsə problem yoxdu, ancaq texniki aspektdən ola bilər".
Xatırladaq ki, Cəbrayıl rayonu 25 avqust 1993-cü il tarixdə rayon Ermənistan ordusu tərəfindən işğal olunub. Cəbrayılın İcra hakimiyyətinin binası hazırda Biləsuvarda yerləşir.
Məhəmmədəli QƏRİBLİ
