Seyid Camal Əzimbəyli: "Azərbaycanda dini, milli, mənəvi dəyərlərimizin, mədəni irsimizin həqiqi təəssübkeşi Azərbaycan dövləti və Prezident İlham Əliyevdir"
Məlum olduğu kimi, Prezident İlham Əliyev Azərbaycanda dini qurumlara maliyyə yardımı göstərilməsi haqqında Sərəncam imzalayıb. Sərəncamda deyilir ki, sivilizasiyaların qovşağında yerləşən və birləşdirici körpü rolunu oynayan Azərbaycan qədim mədəniyyət mərkəzlərindən biri olaraq özünün unikal geosiyasi mövqeyi sayəsində multikultural nailiyyətlər qazanıb və tolerantlıq mühitinin formalaşmasına əvəzsiz töhfələr verib.
Sərəncama əsasən, Azərbaycanda dini qurumlara maliyyə yardımı göstərilməsi üçün 2017-ci il dövlət büdcəsində nəzərdə tutulmuş Prezidentin ehtiyat fondundan Qafqaz Müsəlmanları İdarəsinə 1 milyon manat, Rus Pravoslav Kilsəsinin Bakı və Azərbaycan Yeparxiyası dini qurumuna 250 min manat, Bakı şəhəri Dağ yəhudiləri dini icmasına 250 min manat, Avropa yəhudilərinin Bakı dini icmasına 100 min manat, Azərbaycan Respublikasında Katolik kilsəsinin Apostol Prefekturası dini qurumuna 100 min manat və Azərbaycan Respublikasının Alban-Udi Xristian dini icmasına 100 min manat ayrılıb.
O da məlumdur ki, Azərbaycanda müxtəlif dini konfessiyalar əsrlərdir sərbəst və qarşılıqlı anlaşma şəraitində fəaliyyət göstərir. Bütün ənənəvi dinlərin fəaliyyəti, eyni zamanda, vətəndaşların ibadətlərini sərbəst şəkildə həyata keçirmələri üçün hər cür şərait yaradılıb. Onların dilinə, dininə, mədəniyyətinə daim hörmətlə yanaşılıb, dövlət tərəfindən islam və qeyri-islam dini icmalarına mütəmadi maliyyə yardımı göstərilib. Məhz bu münasibətin sayəsində Azərbaycanda zəngin tolerantlıq və multikultural dəyərlər qorunub.
Bütün bunların fonunda ölkə başçısının bir sıra dini icmalara maliyyə yardımının ayrılmasına sərəncam verməsinə münasibət necədir?
Şərqşünas Seyid Camal Əzimbəylinin sözlərinə görə, Azərbaycanda din-dövlət münasibətləri yüksələn xətlə inkişaf edir: "Bütün bunlar da onun tərkib hissəsidir. Dəfələrlə bildirmişəm ki, Azərbaycanda dini, milli, mənəvi dəyərlərimizin, mədəni irsimizin həqiqi təəssübkeşi Azərbaycan dövləti və Prezident İlham Əliyevdir. Bu bir daha onu sübut etdi. Çünki Azərbaycan dünyəvi ölkə olsa da, özünü müsəlman təəssübkeşi sayan ölkələrlə müqayisəolunmaz dərəcədə dövlətin mənəvi, dini dəyərlərə sahiblənməsi, onu mühafizə etməsi müşahidə olunur. Son qərarı da bunun dəlili kimi qiymətləndirirəm. Dövlət başçısının Ramazan ayında bu qərarı verməsi onun dini inancının nə qədər mükəmməl bir formada olduğunun bir sübutunu ortaya qoyur. Konkret olaraq düşünürəm ki, bu, Azərbaycanda inanclı insanların yad təsirlərdən mühafizə olunması üçün verilən ciddi qərardır. Ona görə də dövlət başçısına ayrıca təşəkkür edirəm".
Vidadi ORDAHALLI
