Vahid Əhmədov: "Deputatın statusu var, o, həmin statusa uyğun olaraq hərəkət etməlidir"
Məlahət İbrahimqızı: "Millət vəkilinin davranışı seçildiyi dairə ilə yanaşı, cəmiyyətə də təsir edir"
Milli Məclisin Daxili Nizamnaməsinə dəyişiklik təklif edilir. Nizamnamənin 46-cı (Parlamentdaxili məsuliyyətə cəlb olunan Milli Məclisin deputatına tətbiq edilən intizam tədbirləri) maddəsinə yeni bənd əlavə edilir. Belə ki, mövcud qanunvericiliyə əsasən, hazırda Milli Məclisin deputatına xəbərdarlıq, söz kəsmə, iclas salonundan çıxarma, töhmət, deputat səlahiyyətlərinin itirilməsi kimi intizam tədbirləri tətbiq edilir. Bundan sonra deputatın mandatdan məhrum edilməsi də təklif olunur.
Deputat Milli Məclisin və onun komitə və komissiyalarının iclaslarının aparılmasına mane olduqda parlamentin sədri həmin deputat haqqında məsələni İntizam komissiyasına göndərir. İntizam komissiyası bu məsələyə 2 həftə müddətində baxıb müvafiq rəy qəbul edir. Milli Məclisin növbəti iclasında həmin rəy müzakirə edilir. Parlament deputatın mandatdan məhrum edilməsi barədə qərarı tələb olunan səs çoxluğu ilə qəbul edir.
Deputat Milli Məclisin və onun komitə və komissiyalarının iclaslarında çıxış edənlərin sözünü kəsdikdə parlamentin sədri həmin deputat haqqında məsələni Milli Məclisin İntizam komissiyasına göndərir. İntizam komissiyası bu məsələyə iki həftə müddətində baxıb deputata töhmət verə bilər və ya deputatın etik davranış qaydalarını kobud surətdə pozduğu qənaətinə gəldikdə deputatın mandatdan məhrum edilməsi barədə rəyini Milli Məclisin müzakirəsinə çıxara bilər. Milli Məclisin növbəti iclasında həmin rəy müzakirə edilir. Parlament deputatın mandatdan məhrum edilməsi barədə qərarı tələb olunan səs çoxluğu ilə qəbul edir.
Bildirək ki, layihənin yaxın müddətdə Milli Məclisdə müzakirəyə çıxarılacağı gözlənir.
Milli Məclisin Hüquq siyasəti və dövlət quruculuğu və İnsan hüquqları komitələrinin birgə iclasında "Azərbaycan Milli Məclisi deputatının etik davranış qaydaları haqqında" qanun layihəsi müzakirəyə çıxarılıb.
İclasda çıxış edən Milli Məclisin vitse-spikeri, İnsan hüquqları komitəsinin sədri Bahar Muradova bildirib ki, qanun layihəsinin hazırlanması Azərbaycan Konstitusiyasına edilən dəyişikliklərdən irəli gəlir: "Konstitusiyada göstərilib ki, deputatın etik davranış qaydaları qanunla müəyyən edilməlidir. Parlament seçkisi zamanı deputata 40 mindən çox seçici səs verir. Seçicilər səs verən zaman deputata inanırlar və bu parametrlər üzrə ondan lazımi iş görməsini gözləyirlər. Dünyanın bir çox ölkələrində müvafiq dövlət qurumlarının rəhbərləri, seçkili orqanların rəhbərləri, bələdiyyə üzvləri və dövlət qulluqçularının, o cümlədən parlament üzvlərinin fəaliyyətini tənzimləyən qanunlar var. Qanun layihəsinin əsas məqsədi deputatların fəaliyyətində şəffaflığın və səmərəliliyin artırılması, o cümlədən Milli Məclis üzvünün nüfuzuna xələr gətirə biləcək hərəkətlərdən çəkindirməkdir. Azərbaycanda parlament ənənələri və beynəlxalq təcrübə nəzərə alınaraq bu qanun layihəsi hazırlanıb".
Millət vəkillərinin məlum qanun layihəsinə fikirləri fərqli oldu.
Millət vəkili Vahid Əhmədovun sözlərinə görə, deputatın statusu var: "Deputat həmin statusa uyğun hərəkət etməlidir. Milli Məclisin deputatı məktəb şagirdi, universitet tələbəsi deyil axı?! Deputat kifayət qədər yetişmiş, siyasətdə olan və insanlarla işləyən şəxsdir. Mən belə hesab edirəm ki, bu cür cılız qanunların qəbul olunmasına ehtiyac yoxdur".
Xanım deputat Məlahət İbrahimqızı bildirdi ki, millət vəkili eyni zamanda tək seçildiyi dairəni əhatə etmir. Ölkənin hər bir yerində o, millət vəkili sayılır. Ona görə də millət vəkili hər bir davranışında incəliklərə əməl etməlidir: "Millət vəkilinin davranışı seçildiyi dairə ilə yanaşı, cəmiyyətə də təsir edir. Millət vəkillərinin özü davranışı, insanlara münasibəti ilə nümunə olmalıdır. Hər bir insanın çatışmazlığı var. Amma o çatışmazlıq ictimai yüklü olmamalıdır. İctimaiyyət və ətraf üçün problem yaratmamalıdır. Onun davranışında çatışmazlıq, yaxud da bir boşluq varsa, ictimaiyyət üçün görünməməlidir".
Günel CƏLİLOVA
