Azər Həsrət: "Bu cür addımların atılması zamanın tələbidir"
Azərbaycanda şəxsi həyata müdaxilə ilə bağlı cəza ağırlaşdırılır. Bununla bağlı Cinayət Məcəlləsinin 156-cı (Şəxsi həyatın toxunulmazlığını pozma) maddəsinə dəyişiklik təklif edilib. Dəyişikliyə əsasən, maddənin sanksiyasında nəzərdə tutulan "100 manatdan 500 manata qədər cərimə" "1000 manatdan 2000 manata qədər cərimə" ilə əvəzlənir.
Layihə Milli Məclisin plenar iclasına tövsiyə olunub və aprelin 25-də müzakirəyə çıxarılacaq.
Şəxsi həyata müdaxilə ilə bağlı cəzaların sərtləşdirilməsini düzgün sayan media eksperti Azər Həsrət "Bakı-Xəbər"ə açıqlamasında qeyd etdi ki, bu məsələ bir neçə dəfə müzakirəyə çıxarılıb: "Cinayət Məcəlləsinə edilən dəyişiklik əsasında internet üzərindən təhqir və böhtanla bağlı cəzalar sərtləşdirildi. 147 və 148-ci maddələr sərtləşdiriləndən sonra bəzi şəxslər iddia edirdi ki, guya Azərbaycan dövləti vətəndaşların səsini boğmaq və onların ifadə azadlığına müdaxilə etmək istəyir. Ancaq, əslində, burada ifadə azadlığının boğulmasından söhbət getmirdi. Bu gün də bəzi şəxslər eyni düşüncədədir. Biz dəfələrlə məlum məsələ ilə bağlı bildirmişik ki, söhbət məsuliyyət hissini itirən, başqa insanların sinir sisteminin pozulmasına səbəb olan, məqsədli şəkildə material yaymağı özünə peşə seçən şəxslərdən gedir. Yəni bu cəzalar o şəxslər üçün nəzərdə tutulub ki, onlar öz davranışına diqqət edə bilmir, başqa insanların hüquqlarını pozur. Cəzanın sərtləşdirilməsindən normal insanlar narahat olmamalıdır. Cəza qanunlar çərçivəsində yaşaya bilməyən, islah olunmayan insanlar üçündür. Bu baxımdan şəxsi həyata müdaxilə ilə bağlı cəzanın ağırlaşdırılmasının tərəfdarıyam".
Həmsöhbətimizin fikrincə, bu cür addımların atılması zamanın tələbidir: "Dövlətimiz insanların normal yaşaması üçün, anormal düşüncəyə malik insanlardan qorumaq üçün bu cür sərt addımlara əl atır".
Günel CƏLİLOVA
