Günel Fərhadqızı: "İqtisadi aspektdən yanaşanda bu ikiqat qazanc deməkdir"
Prezident İlham Əliyev Yevlaxda qeyri-neft ixracatçılarının respublika müşavirəsində deyib ki, bizim yeni bir ixrac istiqamətimiz yaradılıb: "Hərbi texnikanın ixracı bir yenilikdir. On il bundan əvvəl bunu təsəvvür etmək mümkün deyildi ki, Azərbaycan silah, texnika ilə nəinki öz tələbatını özü təmin edəcək, eyni zamanda, bunu ixrac edəcək. Bu gün bu, reallıqdır, biz buna nail olmuşuq. On il bundan əvvəl Müdafiə Sənayesi Nazirliyi yarananda biz artıq bilirdik ki, bu gün gələcək və gəldi. Bu gün nəinki biz ordumuzun əsas tələbatını özümüz ödəyirik, biz ixrac da edirik. Biz beynəlxalq sərgilərdə iştirak etmişik. Bax, bu, bir daha göstərir ki, sərgilərdə iştirak etmək nə qədər əhəmiyyətlidir. Bakıda iki dəfə beynəlxalq silah sərgisi təşkil edilib. Bizim silah ticarətimiz artır. Bu da ölkəyə böyük valyuta gətirir. Hazırda Azərbaycanda mindən çox adda, o cümlədən ən son texnologiyalara əsaslanan hərbi təyinatlı məhsullar istehsal olunur. Ona görə bu sahə də daim diqqət mərkəzində olmalıdır və burada ixrac potensialı artır".
Bu sahədə ixrac olunan məhsullardan Azərbaycan nə qədər gəlir əldə edə bilər?
İqtisadçı Günel Fərhadqızı qəzetimizə açıqlamasında bildirdi ki, bu yaxınlarda müdafiə sənayesi naziri Yavər Camalovun verdiyi məlumata görə, ölkəmiz 10-dan çox dövlətə hərbi məhsul ixrac edir: "Bu, Azərbaycan üçün böyük bir göstəricidir. Çünki adətən silah ixracı ilə dünyanın hegemon ölkələri məşğul olur. Bilirsiniz ki, bu olduqca ciddi sahədir. Hərbi sənaye məhsullarının satışı böyük məbləğdə qazanc gətirir. Bu kateqoriyadan olan məhsullara hər zaman yüksək tələbat olur. Bizim ölkə üçün bunun ikiqat əhəmiyyəti var. Çünki müharibə şəraitində yaşayan ölkə kimi, bizim deyilən adda məhsulları almağa böyük ehtiyacımız var. Bu da ölkədən valyutanın xaricə çıxması deməkdir. Müdafiə sənayesi kompleksini inkişaf etdirməklə biz öz tələbatımızı ödəməklə yanaşı, həm də xaricə məhsul sata bilirik. İqtisadi aspektdən yanaşanda bu ikiqat qazanc deməkdir. Ötən ilin sentyabr ayında Bakıda keçirilən "ADEX-2016" Beynəlxalq müdafiə sərgisində Azərbaycanın istehsalı olan hərbi məhsullar nümayiş olundu. Biz tez-tez xarici sərgilərdə də böyük ölkələrlə yanaşı, pavilionlarda iştirak edirik. Nə qədər təəccüblü olsa da, artıq Azərbaycan bu sahədə öz sözünü deyib.
Konkret gəlirin məbləğinə gəldikdə isə, nəsə demək çətindir. Çünki bu barədə müfəssəl məlumat verilmir. Hesab edirəm ki, kifayət qədər rentabelli sahə sayıla bilər".
Məhəmmədəli QƏRİBLİ
