Ombudsmanın Gəncə, Cəlilabad, Quba və Şəki regional mərkəzləri tərəfindən 31 mart - Azərbaycanlıların Soyqırımı Günü ilə bağlı silsilə tədbirlər keçirilib. Bu barədə Trend-ə Ombudsman Aparatından məlumat verilib.
Azərbaycan Respublikasının İnsan Hüquqları üzrə Müvəkkili Elmira Süleymanova hər il olduğu kimi, 31 mart - Azərbaycanlıların Soyqırımı Günü ilə bağlı silsilə tədbirlər təşkil etmişdir.
Ombudsmanın Gəncə, Şəki, Quba və Cəlilabad regional mərkəzləri nümayəndələrinin bu istiqamətdə fəaliyyəti də qeyd olunmalıdır.
Ombudsmanın Gəncə Regional Mərkəzi Göygöl rayonu İbrahim Hüseynov adına orta məktəbdə, Cəlilabad Regional Mərkəzi Cəlilabad rayonunun 2, 4, 8 saylı tam orta və Musiqi-İncəsənət məktəblərində, habelə Lənkəran rayonunun Girdəni bələdiyyəsində, Quba Regional Mərkəzi Quba Rayon Gənclər Mərkəzində, bu rayonun 2 və 4 saylı tam orta məktəblərində, həmçinin Şəki Regional Mərkəzi Şəki rayonunun Aran və Zunut kəndlərində silsilə tədbirlər keçirmişlər.
Yerli icra və özünüidarəetmə orqanları əməkdaşlarının, ictimaiyyət nümayəndələrinin, fəal gənclərin, çoxsaylı sakinlərin və icmaların, müəllim və şagirdlərin iştirakı ilə keçirilmiş tədbirlərdə faciə qurbanlarının əziz xatirəsi bir dəqiqəlik sükutla yad olunmuşdur.
Ombudsmanın adı çəkilən regional mərkəzlərinin nümayəndələri çıxışlar edərək Ermənistanın Azərbaycana qarşı təcavüzü, erməni millətçilərinin və onların havadarlarının azərbaycanlılara qarşı məqsədyönlü şəkildə həyata keçirdikləri soyqırımı, etnik təmizləmə və deportasiya siyasəti, tarixi torpaqlarımız olan Qarabağa, Zəngəzura, İrəvan quberniyasına, Naxçıvana və digər bölgələrə İran və Türkiyədən minlərlə erməni ailəsinin köçürülməsi barədə geniş məlumat vermişlər.
Onlar 1918-ci il martın 30-da erməni-bolşevik birləşmələrinin Bakını gəmilərdən yaylım atəşinə tutması ilə başlanan hadisələrin ardınca 31 mart və 1-2 aprel tarixlərində qırğınların kütləvi şəkil alması, silahlanmış erməni əsgərlərinin dinc azərbaycanlıları amansızcasına qətlə yetirmələri, qırğınların davam etdiyi dövrdə Azərbaycan ərazisində yüz minlərlə soydaşımızın, o cümlədən Bakıda və ətraf kəndlərdə 30 mindən çox şəxsin öldürülməsi, tarixi binaların, məscidlərin, məktəblərin dağıdılması haqqında danışmışlar.
Son dövrdə Qubada bu hadisələr zamanı ermənilərin törətdikləri kütləvi insan qətllərini aşkarlayan faktların üzə çıxarılması, orada tapılmış çoxsaylı insan sümüklərinin bu qırğınlar zamanı erməni vəhşiliyini təsdiqləyən əyani dəlillər olması tədbir iştirakçılarının nəzərinə çatdırılmış və bu ərazidə mart hadisələri zamanı qətlə yetirilmiş on minlərlə insanın xatirəsinə ehtiram əlaməti olaraq Quba Soyqırımı Memorial Kompleksinin yaradılması diqqətə çatdırılmışdır.
Ümummilli lider Heydər Əliyevin "Azərbaycanlıların soyqırımı haqqında” 26 mart 1998-ci tarixli Fərmanı ilə bu hadisələrə siyasi qiymət verildiyi və azərbaycanlıların ermənilər tərəfindən soyqırımına məruz qalmasının ilk dəfə rəsmi surətdə bəyan edildiyi, eyni zamanda 31 mart - Azərbaycanlıların Soyqırımı Gününün hər il ölkəmizdə dövlət səviyyəsində qeyd olunduğu, ölkə Prezidenti cənab İlham Əliyevin ərazi bütövlüyümüzün və suverenliyimizin bərpasına, soyqırımı həyata keçirənlərin, xalqlar arasında nifaq və düşmənçilik salanların ifşasına nail olacağımızı dəfələrlə vurğuladığı və digər mühüm məqamlar bildirilmişdir.
Qeyd olunmuşdur ki, Azərbaycan Respublikasının İnsan Hüquqları üzrə Müvəkkili Elmira Süleymanova hər il 31 mart - Azərbaycanlıların Soyqırımı Günü ilə bağlı BMT-nin Baş Katibinə, BMT-nin Təhlükəsizlik Şurasına, BMT-nin İnsan Hüquqları üzrə Ali Komissarına, Avropa Komissiyasına, Avropa Şurasına, ATƏT-ə, Beynəlxalq və Avropa Ombudsmanlar İnstitutlarına, Asiya Ombudsmanlar Assosiasiyasına, Beynəlxalq Sülh Bürosuna, müxtəlif ölkələrin ombudsmanlarına, Azərbaycan Respublikasının xarici ölkələrdəki və xarici ölkələrin respublikamızdakı səfirliklərinə bəyanat göndərərək, beynəlxalq təşkilatları ikili standartlara yol vermədən Azərbaycanın haqlı mövqeyini dəstəkləməyə çağırır, ədalətin tezliklə öz yerini tapacağına, soyqırımı törətmiş Ermənistan dövlətinə qarşı səlahiyyətli beynəlxalq qurumlar tərəfindən sanksiyaların tətbiq olunacağına, Azərbaycanın ərazi bütövlüyünün, qaçqın və məcburi köçkünlərin kütləvi şəkildə pozulmuş hüquqlarının bərpa ediləcəyinə, əsir və girovların azad olunacağına inandığını, habelə torpaqlarımızda sülhün və əmin-amanlığın bərqərar edilməsində bütün nüfuzlu beynəlxalq qurumların, sülhməramlı insanların imkanlarını səfərbər etməklə böyük səylər göstərəcəklərinə ümidlərini ifadə edir.
Tədbirlərdə Ombudsmanın 31 mart - Azərbaycanlıların Soyqırımı Günü ilə əlaqədar Bəyanatının mətni səsləndirilmişdir.
İştirakçılar belə tədbirlərin keçirilməsinin əhəmiyyətini vurğulamış və minnətdarlıqlarını bildirmişlər.
Habelə 31 mart 2016-cı il tarixdə Ombudsmanın Quba Regional Mərkəzinin əməkdaşları tərəfindən Quba Soyqırımı Memorial Kompleksi ziyarət olunmuşdur.
