Ölkəmiz 2010-2014-cü illərdə də bu komitənin üzvü olub Vasif Eyvazzadə: “Azərbaycanın həm UNESCO çərçivəsində qazandığı nüfuzu, həm komitədəki əvvəlki təcrübəsi, həm də əldə etdiyi reputasiyası ona imkan verir ki, yenidən öz namizədliyini irəli sürsün” Fariz Xəlilli: “Dövlətimizin Qeyri-maddi mədəni irsin qorunması üzrə Hökumətlərarası Komitəyə növbəti dəfə üzv olması vacibdir”
Azərbaycan və UNESCO arasında qurulan əməkdaşlıq illərdir uğurla davam etdirilir. Ölkəmiz bu qurumun etibarlı tərəfdaşı kimi fəaliyyətini davam etdirir.
Qeyd edək ki, Azərbaycan Respublikası 3 iyun 1992-ci ildə UNESCO-ya üzv qəbul edilib, 1996-cı ildə isə UNESCO və Azərbaycan arasında əməkdaşlıq haqqında memorandum imzalanıb. Artıq 26 ildir ölkəmiz bu qurumun üzvüdür.
Azərbaycan UNESCO-nun Qeyri-maddi mədəni irsin qorunması üzrə Hökumətlərarası Komitəsinin üzvlüyünə namizədliyini təqdim edib.
Mədəniyyət və Turizm Nazirliyinin yaydığı məlumata görə, Azərbaycan Respublikasının UNESCO yanında Daimi Nümayəndəliyi və Mədəniyyət Nazirliyinin birgə təşkilatçılığı ilə UNESCO-nun mənzil-qərargahında ölkəmizin Qeyri-maddi mədəni irsin qorunması üzrə Hökumətlərarası Komitəyə namizədliyi ilə bağlı tədbir keçirilib. Tədbirdə UNESCO yanında daimi nümayəndə Anar Kərimov Azərbaycanın qurumla əməkdaşlığı haqqında məlumat verib və əməkdaşlığın uğurla inkişaf etməsində Azərbaycan Respublikasının Birinci vitse-prezidenti, UNESCO-nun xoşməramlı səfiri Mehriban xanım Əliyevanın xüsusi rolunu qeyd edib. A.Kərimov bildirib ki, ölkəmiz UNESCO-nun bir sıra qurumlarında üzv qismində fəal iştirak edir və komitəyə üzv seçiləcəyi təqdirdə qeyri-maddi mədəni irsin qorunması sahəsində öz təcrübəsini bölüşməyə və komitənin səmərəli fəaliyyətinə töhfə verməyə hazırdır.
Azərbaycan Respublikası mədəniyyət nazirinin müavini Sevda Məmmədəliyeva tədbir iştirakçılarına ölkəmizdə bu sahədə atılan addımlar haqqında məlumat verib.
Qeyd edilənə görə, UNESCO-nun sözügedən komitəsinə seçkilər iyunun 4-6-da baş tutacaq.
Mədəniyyət və Turizm Nazirliyinin Beynəlxalq əməkdaşlıq şöbəsinin müdiri Vasif Eyvazzadə “Bakı-Xəbər”ə açıqlamasında bildirdi ki, Azərbaycanın UNESCO-nun Qeyri-maddi mədəni irsin qorunması üzrə Hökumətlərarası Komitəsinə növbəti dəfə üzv seçiləcəyinə ümid edir. O bildirdi ki, bu sahədə artıq məqsədyönlü fəaliyyətə başlanıb. “Azərbaycan 2018-2022-ci illər üçün Azərbaycan UNESCO-nun Qeyri-maddi mədəni irsin qorunması üzrə Hökumətlərarası Komitəsinə üzv olmaq üçün yenidən namizədliyini verib. Əslində, bu, Azərbaycan üçün ilk təcrübə deyil, biz 2010-2014-cü illərdə də 4 il müddətinə bu komitənin üzvü olmuşuq. Üzv olduğumuz müddətdə də çox fəal, aktiv fəaliyyət göstərmişik. Həmin dövrdə Azərbaycanın bir sıra nümunələrini UNESCO müvafiq siyahılarına daxil edib. Eyni zamanda da Azərbaycan 2013-cü ilin dekabr ayında UNESCO-nun Hökumətlərarası Komitəsinə evsahibliyi edib. Bu konvensiya qəbul ediləndən sonra artıq Azərbaycanın 11 elementi Qeyri-maddi mədəni irs siyahısına salınıb. 2008-ci ildə Azərbaycan muğamı, 2009-cu ildə Novruz bayramı və aşıq sənəti, 2010-cu ildə Azərbaycan xalça toxuculuğu ənənəvi sənəti və Azərbaycan tar ifaçılıq sənəti və onun hazırlanma ustalığı, 2013-cü ildə Qarabağ atı ilə oynanılan çovqan atüstü oyunu, 2014-cü ildə qadın baş örtüyü kəlağayının düzəldilməsi və geyinilməsi, 2015-ci ildə Lahıc misgərlik sənəti, 2016-cı ildə Azərbaycan lavaşı, 2017-ci ildə kamança və Heyvalı şabalıdlı kələm dolması, dolma hazırlama və paylaşma ənənəsi salınıb. Nəticə etibarilə Azərbaycanın bu illər ərzində qazandığı təcrübə imkan verir ki, o yenidən bu komitəyə üzv olmaq üçün namizədliyini irəli sürsün. Bu komitəyə üzv olmaq üçün yalnız böyük qeyri-maddi mədəni irs potensialına malik olmaq kifayət etmir. Burada həm də təcrübə və ekspert təcrübəsi çox önəmlidir. Çünki komitənin 24 üzvü UNESCO üzvü dövlətləri adından qəbul edilən bütün elementlərə görə cavabdehlik daşıyır. O elementləri təhlil edir, onlara qiymət verir. Bu özü də çox məsuliyyətlidir. Bu baxımdan, Azərbaycanın həm UNESCO çərçivəsində qazandığı nüfuzu, həm komitədəki əvvəlki təcrübəsi, həm də əldə etdiyi reputasiyası ona imkan verir ki, yenidən öz namizədliyini irəli sürsün”.
Hazırda bu komitəyə üzv olmağımız istiqamətində işlər aparıldığını deyən V.Eyvazzadə bildirdi ki, bu günlərdə UNESCO-nun mənzil-qərargahında ölkəmizin Qeyri-maddi mədəni irsin qorunması üzrə Hökumətlərarası Komitəyə namizədliyi ilə bağlı tədbir də keçirilib.
Azərbaycan və UNESCO arasında yüksək səviyyəli əməkdaşlıqdan danışarkən ölkəmizin Birinci vitse-prezidenti, UNESCO-nun Azərbaycandakı xoşməramlı səfiri Mehriban Əliyevanın əməyini, rolunu önə çəkməli olduğumuzu deyən şöbə müdiri qeyd etdi ki, bu sahədə Mehriban xanım böyük işlər görüb: “Təbii ki, bizim növbəti dəfə də komitə üzvlüyünə namizədliyimizi irəli sürməyimiz də bu əməkdaşlığın nəticəsidir”.
V. Eyvazzadə onu da qeyd etdi ki, Azərbaycan qeyri-maddi mədəni irs nümunələri ilə zəngindir və ölkəmizdə bu nümunələr yüksək səviyyədə qorunur və təbliğ edilir. Hazırda quruma üzv olmaq istiqamətində proseslərin davam etdirildiyini vurğulayan V.Eyvazzadə bildirdi ki, Azərbaycan mədəniyyətlərarası dialoqun formalaşmasında, təbliğində dünyaya nümunə olan bir ölkədir. Onun sözlərinə görə, bu və digər göstəricilər Azərbaycanın yenidən komitəyə üzv olmasına əsas verir. O qeyd etdi ki, komitə üzvlüyünə namizədlər sırasında Rumıniya, Polşa və Gürcüstan kimi dövlətlər də var. V.Eyvazzadə hesab edir ki, Azərbaycan dövlətinin, eləcə də Azərbaycanın UNESCO-dakı Nümayəndəliyinin səyləri və davamlı gördüyü işlər nəticəsində ölkəmiz komitəyə üzv qəbul edilə bilər. O ümid edir ki, seçkilərdə Azərbaycan lazımi səsi qazanacaq və komitəyə üzv olacaq.
MİRAS-Mədəni İrsin Öyrənilməsinə Kömək İctimai Birliyinin sədri, ekspert Fariz Xəlilli isə hesab edir ki, Azərbaycanın UNESCO-nun Qeyri-maddi mədəni irsin qorunması üzrə Hökumətlərarası Komitəsinin üzvlüyünə namizədliyinin irəli sürülməsi müsbət haldır. F.Xəlillinin sözlərinə görə, Azərbaycan bu quruma üzv qəbul edilərsə, bunun əhəmiyyəti böyük olacaq. Ölkəmizlə UNESCO arasındakı əməkdaşlıqdan danışan ekspert qeyd etdi ki, artıq Azərbaycana aid bir neçə nümunə bu quruma daxil edilib: “Hesab edirəm ki, Azərbaycanın namizədliyinə dəstək veriləcək və ölkəmiz bu komitənin hüquqlu üzvü olacaq. Dövlətimizin Qeyri-maddi mədəni irsin qorunması üzrə Hökumətlərarası Komitəyə növbəti dəfə üzv olması vacibdir. Bu əlavə olaraq bizim orada söz sahibi olmağımıza təkan verəcək. Onsuz da bu qurumla Azərbaycan arasında ciddi əməkdaşlıq əlaqələri var. Bu həm də ona görə müsbət haldır ki, ermənilərin bizim qeyri-maddi mədəni irs nümunələrimizi mənimsəməsinin qarşısı alınacaq. Azərbaycan bu komitəyə üzv olduqdan sonra ermənilər artıq bizim nümunələri öz adlarına təqdim edə bilməyəcəklər. Mən Azərbaycanla UNESCO arasındakı əməkdaşlığı yüksək qiymətləndirirəm və bu əməkdaşlığın nəticəsidir ki, Azərbaycandan 11 qeyri-maddi mədəni irs obyekti bu quruma daxil edilib”.
İradə SARIYEVA
