Kamran Əsədov: “Ali təhsil müəssisələrinin əksəriyyəti keyfiyyətin artırılması istiqamətində heç bir iş görmür”
Bu günlərdə Avropa Komissiyasının “Erasmus +” proqramı çərçivəsində Bakı Biznes Universiteti (BBU) tərəfindən hazırlanmış “Azərbaycan universitetlərində keyfiyyət təminatı mərkəzlərinin yaradılması və inkişaf etdirilməsi” (“EQAC”) layihəsinin təqdimatı keçirilib.
Layihənin məqsədi keyfiyyət təminatı mərkəzləri olan universitetlərdə həmin mərkəzlərin yenidən qurulması, iş prinsiplərinin Avropa standartlarına uyğunlaşdırılması, keyfiyyətə nəzarət mərkəzləri olmayan universitetlərdə isə yeni mərkəzlərin yaradılmasıdır. Qeyd edək ki, layihənin icra müddəti 36 aydır. Bu müddətdə Azərbaycanın 11 universitetinin hər birindən 4 nümayəndə Avropanın 4 universitetində təlimlərə cəlb ediləcək. Təlimlərdə Azərbaycan nümayəndə heyəti Avropanın qabaqcıl universitetlərində keyfiyyət təminatı mərkəzlərinin iş prinsiplərini və onların bu sahədəki təcrübələrini öyrənəcək. Eyni zamanda, Litvanın “EKT” akkreditasiya təşkilatı tərəfindən Bakı Biznes Universitetində layihədə iştirak edəcək Azərbaycan universitetlərinin keyfiyyət təminatı mərkəzlərinin işçi heyəti və tədrislə əlaqəli işçiləri üçün biraylıq təlimlər keçiriləcək.
Maraqlıdır, Azərbaycanın bütün ali təhsil müəssisələrində keyfiyyətə nəzarət mexanizmi yaradıla bilərmi? Yaradılarsa, bunun nə kimi faydası olar?
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, hazırda Azərbaycanda 54 ali təhsil müəssisəsi var. Həmin universitetlərdə 164 min tələbə təhsil alır: “Təəssüflər olsun ki, kifayət qədər əhatə kütləsi olan ali təhsil müəssisələri dünya reytinq cədvəlində əks olunmayıb. Bir sıra dünya ölkələri Azərbaycanda ali təhsilin keyfiyyətini artırmaq üçün müəyyən təkliflər irəli sürürlər. Ancaq bizim ali məktəblər “Erasmus +” və digər beynəlxalq layihələrə görüntü naminə qoşulurlar. Ali təhsil müəssisələrinin əksəriyyəti keyfiyyətin artırılması istiqamətində heç bir iş görmür. Əsasən “Erasmus +” proqramında israrla qeyd olunur ki, universitetlər xarici ölkələrdən tələbə qəbulunu həyata keçirməlidirlər. Təəssüf ki, Azərbaycanda bu rəqəm olduqca aşağıdır. 54 ali təhsil müəssisəsində təhsil alan əcnəbi tələbələrin sayı cəmi 5400 nəfərdir. Bu sayın artmasına ehtiyac var”.
Həmsöhbətimiz xüsusi olaraq vurğuladı ki, Prezident İlham Əliyevin 2013-cü ildə imzaladığı “Təhsilin inkişafı üzrə Dövlət Strategiyası”nın əsas istiqamətlərindən biri də ali təhsilin keyfiyyətinin artırılmasıdır: “Ancaq universitetlər bu konsepsiyanı yerinə yetirmirlər. Ali təhsil müəssisələrinin tədris resursları əsasən 1970-1980-ci illərdən qalıb, müasir standartlara cavab vermir. Hazırlanan kadrlar əmək bazarında tələb olunan ixtisaslar üzrə olmalıdır. Yeni təhsil nazirimizdən də gözləntim odur ki, “Erasmus +”, “Tembus” və digər layihələrinin ali təhsil müəssisələrində keyfiyyətinin artırılmasına maraqlı olmalıdır”.
K.Əsədov hesab edir ki, qarşıdakı illərdə ali təhsil müəssisələrinin keyfiyyətinə nəzarət prioritet məsələ olmalıdır: “Bir sıra ali təhsil ocaqları var ki, onlar keyfiyyətin artmasında maraqlıdırlar. O universitetlərdə müasir tələblərə cavab verən infrastruktur formalaşır, tədris tamamilə müasir standartlara uyğunlaşır”.
Günel CƏLİLOVA
