İlqar Hüseynli: “Nöqsanlara yol verənlər, birmənalı olaraq, cəzalandırılmalıdır”
Ötən ilin ortalarında Bayraq Meydanında söküntü işlərinin aparılması, dirəyin yerindən çıxarılması bəzi müzakirələrə səbəb oldu. O vaxt iddialar səsləndi ki, ərazi aktiv sürüşmə zonası olduğuna, meydanda çatlar əmələ gəldiyinə görə sözügedən dirək sökülür. Daha sonra açıqlama verildi ki, dirək ətrafında aparılan işlər texniki xarakterlidir. Ümumən bununla bağlı konkret açıqlama verilmədi.
Ancaq baş nazirin müavini Abid Şərifovun məlum açıqlamasından aydın oldu ki, bayraq dirəyinin tikintisi zamanı nöqsanlara yol verilib. Onun sözlərinə görə, yəqin ki, bayraq dirəyi zavodda hazırlanarkən küləyə davamlılıqla bağlı müəyyən nöqsanlara yol verilib: “Bayraq Meydanında bayraq dirəyinin sökülməsi küləyə davamlılıqda nöqsanların üzə çıxması ilə bağlı olub. Buna görə də xarici ekspertlər də dəvət olundu və bayraq dirəyi söküldü. Bu məsələ ilə başqaları məşğul olduğundan, sonrakı məsələlər barədə məlumatsızam”.
Məlumat üçün qeyd edək ki, Bakıda Dövlət Bayrağı Meydanının yaradılması barədə sərəncam 2003-cü il oktyabrın 5-də imzalanıb. Meydanın açılışı 2010-cu il sentyabrın 1-də baş tutub.
20000 kv. m. ərazisi olan meydanda ucaldılmış dayağın hündürlüyü 162 metr, bünövrəsinin diametri 3,2, bünövrənin üst hissəsinin diametri 1,09 metrdir. Qurğunun ümumi kütləsi 220 tondur. Bayrağın eni 35 metr, uzunluğu 70 metr, ümumi sahəsi 2450 kvadratmetr, kütləsi isə təqribən 350 kiloqramdır. “Ginnes” dünya rekordları təşkilatı 2010-cu il mayın 29-da Azərbaycan Dövlət Bayrağı dirəyinin dünyada ən hündür bayraq dirəyi olduğunu təsdiq edib.
Bütövlükdə, meydanın ərsəyə gəlməsi bir neçə il çəkib və bu məqsədlə milyonlarla manat dövlət vəsaiti sərf olunub. Rəsmi olaraq bəyan olunanda ki, bayraq dirəyinin tikintisi zamanı nöqsanlara yol verilib, o zaman, istər-istəməz, sual yaranır, buna görə kimsə məsuliyyətə cəlb olunmalıdırmı? Təbii ki, sözügedən nöqsanlar buraxılmasaydı, dirək sökülməzdi və buna görə dövlətə bir belə ziyan dəyməzdi. Nəzərə almaq lazımdır ki, adıçəkilən meydan məhz dövlət vəsaiti hesabına tikilib. Belə olan halda, kimsə buna görə məsuliyyətsiz davranıbsa, qanun qarşısında cavab verməlidir. Maraqlıdır, bəz ekspertlər buna necə yanaşırlar? Məsələyə münasibət bildirən ekspert İlqar Hüseynlinin sözlərənə görə, bayraq dirəyinin tikilməsi zamanı nöqsanlara yol verənlər məsuliyyətə cəlb olunaraq cəzalandırılmalıdırlar: “Nəzərə almaq lazımdır ki, Bayraq Meydanının tikintisi ilə əlaqədar milyonlarla dövlət vəsaiti sərf olunub. Bununla əlaqədar gərək bütün texniki hesablamalar aparılaydı. Mühəndis layihələndirmə və yerin quruluşu ilə bağlı çox ciddi hesablamalar aparılmalıydı. Ondan sonra tikintinin aparılması zamanı çox ciddi şəkildə qaydalara riayət olunmalıydı ki, belə problemlər ortaya çıxmasın. Çünki söhbət böyük tikinti layihəsindən gedir. Özü də dənizə yaxın bir ərazidə inşa olunub. Bütün bunlar ciddi nəzərə alınmalı idi. Ancaq məlum oldu ki, bu heç də belə deyilmiş. Ona görə də nöqsanlara yol verənlər, birmənalı olaraq, cəzalandırılmalıdır. Bu məsələdə cavabdeh olan bütün şəxslər cinayət məsuliyyətinə cəlb olunmalıdır. Gərəkirsə, digər mənalarda da qanuna uyğun olaraq məsuliyyətə cəlb olunmalıdırlar. Eyni zamanda, bununla bağlı ciddi tədbirlər görülməlidir. Sözsüz ki, bununla bağlı müvafiq addımların atılması cəmiyyətin mənafeyinə uyğun olacaq. Nəzərə almaq lazımdır ki, dövlət vəsaiti hesabına tikintilərin sayı artır. Nöqsanlara yol verənlərə qarşı cəza tədbirlərinin görülməsi digərlərinə də dərs olacaq. Onların məsuliyyətini artıracaq və işlərində ciddi olmağa sövq edəcək. Günahkarlar cəzalandırılmalıdır ki, digər şirkətlərin də işlərində belə problemlər yaşanmasın. Ona görə də sözügedən məsələ ilə bağlı müvafiq addımların atılmasının tərəfdarıyam. Buna görə kimin günahı varsa, o cəzalandırılmalıdır. Çünki buna görə dövlətə milyonlarla maddi zərər dəyib”.
Vidadi ORDAHALLI
