İlqar Hüseynli: “Qonşu ölkələrdən Azərbaycana müalicə məqsədilə gələn turistlərin sayı artacaq”
Hələ Sovet dövründə insanlar ildə bir dəfə kurort və sanatoriyalara üz tutur, həm dincəlir, həm də müalicə alırdılar. Həm xaricdə, həm də ölkəmizdəki sanatoriyalar ilin müxtəlif fəsillərində insanlarla dolu olurdu. İndi isə tibbi turizm adlı anlayış var, artıq bir çox otel həm də müalicəxana kimi fəaliyyət göstərir.
Tibbi turizm yaşadığın ölkənin hüdudlarından kənarda tibbi xidmət almaq, istirahətlə yüksək səviyyəli tibbi xidmət almağı özündə əks etdirən bir termindir. Hazırda artıq qlobal “tibbi xidmət bazarı” formalaşıb. Bu bazarın özünəməxsus menecerlik xidmətləri, akreditasiya orqanları, tibbi turizm agentlikləri, öz mütəxəssisləri formalaşıb və hətta maliyyə böhranı şərtlərində belə sürətlə inkişaf edib. Hazırda ölkəmizdə də tibbi turizm sahəsi inkişaf etməkdədir.
Bir neçə il bundan əvvələ qədər xəstələr tibbi turizm xidmətlərindən istifadə etməyə çəkinirdilərsə, tibbi turizm şirkətlərinə etibar etmirdilərsə, artıq bu tendensiya aradan qalxır. Tibbi turizm şirkətləri xəstəliyə uyğun xəstəxana seçməkdə, eləcə də xəstənin maddi vəziyyətinə uyğun xəstəxana seçimində, həkimə xəstənin şikayətlərinin daha dəqiq şəkildə çatdırılmasında, ən yaxşı ixtisas həkiminin seçilməsində köməklik göstərirlər. Görünən odur ki, Azərbaycanda da ildən-ilə tibbi turizmə maraq çoxalır. İnsanlar həm dincəlmək, həm gəzmək, həm də müalicə almaq üçün xarici ölkələrə üz tuturlar. Ancaq yaxşı olardı ki, ölkənin özündə bu sahənin inkişafına diqqət daha da artırılsın, xarici ölkələrdən bu məqsədlə Azərbaycana gələnlər çoxalsın. Prezident İlham Əliyev bildirib ki, ölkəyə gələn turistlərin sayı ildən-ilə artır. Ölkə başçısı ümid edir ki, bizə tibbi məqsədlər üçün gələn turistlər də olacaq. Bütövlükdə, Azərbaycanda tibbi turizmin inkişaf perspektivlərini ekspertlər necə dəyərləndirirlər?
Məsələyə münasibət bildirən ekspert İlqar Hüseynlinin fikrincə, bu sahənin inkişafı ilə bağlı Azərbaycanda müəyyən perspektivlər var: “Hazırda Azərbaycanda tibbi turizm ciddi şəkildə inkişaf etməyib. Bunun da müəyyən obyektiv və subyektiv səbəbləri var. Məsələ ondadır ki, əvvəllər səhiyyənin inkişafında müəyyən texnoloji geriləmələr var idi. Hansı ki, səhiyyə müəssisələrinin çoxu sovet dönəmindən qalmışdı və bununla bağlı infrastruktur köhnəlmişdi. SSRİ dövründə səhiyyə sahəsi qapalı inkişaf etmişdi. Hazırda səhiyyə müəssisələri yenidən qurulub, texnoloji imkanlar əvvəlki dövrlə müqayisədə xeyli genişlənib. Sadəcə olaraq, ölkədə olan mütəxəssislərin imkanları tibbi turizmin inkişafı ilə əlaqədar dünya standartlarına tam cavab vermir. Ancaq buna baxmayaraq, bu istiqamətdə proses gedir. Məsələ ondadır ki, Kanadada, ABŞ-da, Türkiyənin çox önəmli ali məktəblərində tibb təhsili alan gənclərimiz var. Ümid edirəm ki, onlar geri dönəndən sonra Azərbaycanda tibbi turizm daha sürətlə inkişaf edəcək. Bunun nəticəsində Azərbaycanda kadr potensialı zənginləşəcək. Nəticədə qonşu ölkələrdən Azərbaycana müalicə məqsədilə gələn turistlərin sayı artacaq. Bu gün Naftalan sanatoriyasında çox geniş imkanlar yaradılıb. Rusiyadan, Ukraynadan, Qazaxıstandan və digər ölkələrdən Naftalan müalicə-sanatoriya mərkəzinə turist axını bərpa olunub. Ümid edirəm ki, bu proses davamlı olacaq”.
Vidadi ORDAHALLI
