Yadigar Məmmədli: “...tək qanun tətbiq etməklə istənilən nəticəni əldə etmək mümkün deyil, bu sahəyə cəmiyyətin özünün də reaksiyası olmalıdır”
“Kabel televiziyaları bir xidmət sahəsidir. Bu, abonentlə yayımı təşkil edən arasında olan hüquqi məsələdir və hüquqi cəhətdən tənzimlənməlidir. Milli Televiziya və Radio Şurası isə, sadəcə, abonent və kabel yayımını təşkil edənlər üçün normal şərait yaradır. Biz bu şəraiti yaratmışıq. Bütün dünyada olduğu kimi, Azərbaycanda da qanunsuz kabel şəbəkəsi yayımı ilə problem yaşanır”. Bunu APA-ya açıqlamasında Milli Televiziya və Radio Şurasının (MTRŞ) sədri Nuşirəvan Məhərrəmli bildirib.
O qeyd edib ki, istənilən sahibkar binasında da kabel şəbəkəsi xidməti təşkil edə bilir. Amma mövcud qanunvericiliyə görə, bu sahədə başqalarına xidmət göstərilirsə və vəsait alınırsa, bu, sahibkarlıq fəaliyyətidir. Qanunsuz kabel şəbəkəsi ilə bağlı problemlər çoxdur, amma tək MTRŞ bu problemləri həll etmək iqtidarında deyil: “Çünki bu məsələdə əhalinin də, müvafiq dövlət qurumlarının da yardımı lazımdır. Sahibkar öz binasında hansısa kabel şəbəkəsi qurur və orada yaşayan sakinlərə təqdim edir, amma Şuranın bundan xəbəri yoxdur. Bundan nə sakinlər, nə də digər orqanlar şikayət edir. Biz bu qanunsuz kabel şəbəkəsi yayımını necə öyrənə bilərik? Biz hər bir binanın qarşısına gedib, qapını döyüb bunu insanlardan soruşmalı deyilik. Təbii ki, bu məsələlərdə cəmiyyət fəal olmalıdır”.
Qanunsuz kabel şəbəkəsi ilə bağlı yaranan problemlərin həll olunması mövzusunda Demokratik Jurnalistlər Liqasının rəhbəri Yadigar Məmmədli ilə söhbət etdik. O, “Bakı-Xəbər”ə açıqlamasında qeyd etdi ki, kabel şəbəkəsi ilə bağlı qanun ötən il Milli Məclisdə qəbul olunub: “Hesab edirəm ki, bu gecikmiş qanundur. Nəzərə almaq lazımdır ki, kabel televiziyası uzun müddətdir Azərbaycanda təşəkkül tapıb. O sahədə qanuni tənzimləmə yox idi. Gec olsa da, bu qanun layihəsinin qəbul olunması yaxşı haldır. Ancaq onu da qeyd etmək istəyirəm ki, kabel televiziyası ilə bağlı sahman yaratmaq lazımdır. Kabel televiziyasında hansı telekanalların yayımlanması və Azərbaycan cəmiyyətinə uyğun kanalların seçilməsinə nəzarətə ehtiyac var. Xarici ölkələrdə uşaq kanalı adı ilə fəaliyyət göstərən telekanallarda yayımlanan cizgi filmləri və ya proqramlar bizim cəmiyyətdə kənardan müdaxilə kimi görsənir. Hesab edirəm ki, bu sahədə xüsusi bir nəzarətə ehtiyac yaranıb”.
Y.Məmmədlinin sözlərinə görə, problemin həlli istiqamətində tək qanun tətbiq etməklə istənilən nəticəni əldə etmək mümkün deyil. Bu sahəyə cəmiyyətin özünün də reaksiyası olmalıdır. Əhali qeyd olunan problemə həssas yanaşmalıdır: “Zənnimcə, cəmiyyət bu məsələdə ortaya bir mövqe qoyaraq Nuşirəvan müəllimə kömək etməlidir. Qeyd olunan sektorda boşluqları doldurmaq lazımdır”.
Günel CƏLİLOVA
