İlqar Orucov: “Tələbə kreditlərinin verilməsi tək dövlətin deyil, eyni zamanda, böyük müəssisələrin, sahibkarların da marağında olmalıdır”
Azərbaycanda sahibkarların tələbələrə təhsil kreditləri verilməsini təmin edən "Maarifçi" Tələbə Kredit Fonduna sərmayə qoyması, iş adamlarının bu işə qoşulması təklif edilir. Bu təklifi Milli Məclisin Elm və təhsil komitəsinin sədri, Azərbaycan Milli Elmlər Akademiyasının vitse-prezidenti İsa Həbibbəyli media nümayəndələrinə açıqlaması zamanı irəli sürüb.
O bildirib ki, Təhsil Nazirliyi "Maarifçi" Tələbə Kredit Fondunu yaratmaqla aztəminatlı tələbələrin təhsil haqları borcunu ödəyə bilməsinə yardım istiqamətində ilk addımlarını atıb: "Müşahidələrimizə görə, "Maarifçi" Kredit Fondunun yükünü bir çox ali məktəblər öz üzərlərinə götürüblər. Təəssüf ki, bu fonda sahibkarlar sərmayə qoymurlar. Amma bu işə sahibkarların qoşulmasına ehtiyac var. Bu, əslində, iş adamları üçün də bir çox tərəfdən sərfəlidir. Bununla sahibkarlar həm ölkənin gələcəyi olan yeni savadlı nəslin hazırlanmasına kömək edəcəklər, həm də bir neçə ildən sonra tələbələr kreditləri qaytardıqları zaman onun faizləri hesabına gəlir əldə edəcəklər. Bəlkə də sahibkarlar bu işin əsl mahiyyətindən tam xəbərdar deyillər. Bu məsələnin sahibkarların diqqətinə çatdırılmasına, maarifləndirmə işinin aparılmasına ehtiyac var".
"Maarifçi" Tələbə Kredit Fondundan isə bildirilib ki, təhsil kreditləri üzrə sahibkarlar tərəfindən fonda indiyə qədər maliyyə qoyulmayıb: "Fondla bu çərçivədə əməkdaşlıq etmək kifayət qədər sadədir. Bu barədə məlumat fondun veb saytının müvafiq bölməsində yerləşdirilib".
Azərbaycan Gənc Alim, Aspirant və Magistrlər Cəmiyyətinin sədri, AMEA Gənclərin İntellektual İnkişaf Mərkəzinin direktoru İlqar Orucov “Bakı-Xəbər”ə açıqlamasında qeyd etdi ki, tələbə kreditlərinin verilməsi tək dövlətin deyil, eyni zamanda, böyük müəssisələrin, sahibkarların da marağında olmalıdır: “Dünya təcrübəsində belə hallar mövcuddur. Böyük Britaniyada universitet tələbələri daha çox özəl qurumlar tərəfindən maliyyələşdirilir. Tələbə mütəxəssis olandan sonra həmin müəssisə gələcəkdə onu işçi kimi özünə cəlb edir. Hesab edirəm ki, analoji addımlar Azərbaycanda da atıla bilər. Təhsildə yeni kadrların yaranması ilə bağlı rəqabət mühiti formalaşar”.
Həmsöhbətimizin fikrincə, sahibkarlar tələbələrin təhsil kreditinin verilməsində fəal olmalıdırlar. Təhsil alan gənclərin yetişməsi ilə bağlı sahibkarlar bu sahəyə sərmayə yatıra bilərlər. Bu addım yalnız müsbət sonluqla nəticələnər.
Günel CƏLİLOVA
