Seyid Camal Əzimbəyli: “Sözügedən səlahiyyətlər imkan verəcək ki, DQİDK bu sahədə daha çevik fəaliyyət göstərsin”
Qədim İpək Yolunun üzərində yerləşən, Şərqlə Qərb arasında körpü rolunu oynayan Azərbaycan tarixən müxtəlif mədəniyyətlərin, sivilizasiyaların, dinlərin qovuşduğu məkan olub. Burada ölkəmizin coğrafi mövqeyi, əhalisinin polietnikliyi kimi amillər böyük rol oynayıb.
Tarixin ayrı-ayrı dönəmlərində bu torpaqlarda bütpərəstlik, zərdüştlüklə bərabər, yəhudilik, xristianlıq və islam kimi səmavi dinlərin nümayəndələri bir-birinə təsir göstərmədən, birgə yaşayıblar. Eyni zamanda, Azərbaycan ərazisi bütün dövrlərdə dini ayrıseçkilikdən əziyyət çəkən insanlar üçün sığınacaq rolunu oynayıb. Azərbaycan fərqli dinlərin mənsubları ilə yanaşı, islam məzhəblərinin daşıyıcıları üçün də pənah yerinə çevrilib. Buna baxmayaraq, etnik və dini icmalar arasında daim möhkəm dözümlülük və dostluq əlaqələri mövcud olub. Milli, irqi və dini zəmində heç bir ayrıseçkilik baş verməyib. Hətta bu müxtəliflik xalqımızın tolerantlıq xüsusiyyətinin formalaşmasına mühüm töhfə olub.
Azərbaycan müstəqillik əldə etdiyi ilk vaxtlarda bu sahədə müəyyən boşluqlar olub. Nəticədə müəyyən xarici dini icmalar necə gəldi ölkədə fəaliyyət göstərib. Xaricə dini təhsil almaq üçün gedənlərin sayı artıb. Bunun yaradacağı zərərli nəticələrin qarşısını almaq üçün sonrakı dövrdə dövlət tərəfindən bir sıra işlər görülüb. Xüsusən 2001-ci ildə Azərbaycanda Dini Qurumlarla İş üzrə Dövlət Komitəsinin yaradılması bu sahədə bir sıra problemlərin həllinə müsbət təsir göstərib.
Bu arada, Prezident İlham Əliyevin fərmanı ilə Dini Qurumlarla İş üzrə Dövlət Komitəsi haqqında Əsasnamədə dəyişiklik edilib. Dəyişikliyə əsasən, dini mərkəz tərəfindən vətəndaşların təhsil almaq üçün xarici ölkələrin dini tədris müəssisələrinə göndərilməsinə, dini tədris müəssisələri tələbələrinin və müəllimlərinin, habelə din xadimlərinin və mütəxəssislərin mübadiləsinə, eləcə də Qafqaz Müsəlmanları İdarəsinin müraciəti əsasında xaricdə dini təhsil almış Azərbaycan vətəndaşlarının islam dininə aid ayin və mərasimlərin aparılmasına buraxılması üçün razılığın verilməsi Dini Qurumlarla İş üzrə Dövlət Komitəsinin vəzifələrinə aid olunub.
Ümumən DQİDK-yə sözügedən səlahiyyətlərin verilməsinə ekspertlər necə yanaşırlar?
Məsələyə münasibət bildirən şərqşünas Seyid Camal Əzimbəylinin sözlərinə görə, DQİDK-ya bir sıra yeni səlahiyyətlərin verilməsi olduqca müsbət addımdır: “Hesab edirəm ki, belə bir qərarın verilməsi çox doğru addımdır. Bu, cəmiyyətdə din-dövlət münasibətlərinin tənzimlənməsinə, digər məsələlərin həllinə öz töhfəsini verəcək. O baxımdan verilən qərarı düzgün və yerində hesab edirəm. Sözügedən səlahiyyətlər imkan verəcək ki, DQİDK bu sahədə daha çevik fəaliyyət göstərsin. Nəticədə Komitənin effektiv fəaliyyət göstərməsi daha qabarıq formada özünü göstərəcək. O da məlumdur ki, xaricdə dini təhsil alanların heç də hamısı tələblərə cavab verəcək mütəxəssis olmur. Onlardan bəziləri təhsilini başa vurduqdan sonra müəyyən xarici qüvvələrin təsiri altına düşürlər. Vacib məsələlərdən biri də ondan ibarətdir ki, hər bir dövlətin özünəməxsus ideologiyası var. Azərbaycançılıq ideologiyası ölkəmizin, xalqımızın inkişafı üçün güclü amildir. Hər bir xarici dövlətin özünün təbliğat metodologiyası var. Biz dindən millətin birləşməsi naminə istifadə etməliyik. Bizim xaricdə təhsil almış çoxsaylı insanımız var. Onlardan bəziləri təhsil alandan sonra yad ideologiyanı Azərbaycana gətirmək istəyirlər. Hesab edirəm ki, məlum qərar bu problemin həllinə ciddi yardım göstərəcək”.
Cəmilə QARAYEVA
