Hansı sənətin sahibi olursa-olsun, insan özünü ifadə etməyi bacarmalıdır. Özünü ifadə etməyin bir adına da istedad deyilir. Elə insanlar var ki, istedadını zəhmətlə cilalayaraq təkcə bir sahədə deyil, bir çox sahələrdə yeniliyə imza atır, sayılır və seçilirlər.
Bəs fərqli peşə sahibləri nə üçün ədəbiyyata üz tuturlar? Ədəbiyyat bu qədərmi hər kəsə asan gəlir görəsən?
Yaradılış özü də ədəbiyyatdır, çünki hər şey Sözlə yaradılıb. Ədəbiyyat bəşəriyyətin xilaskarı ola bilər. Bu isə bir başqa mövzudur...
İnsan həyatının xilaskarlarına biz fərqli adlarla müraciət edirik. Həkim adı isə daha doğmadır, daha munisdir. Bəşəriyyətin yaradılışını özündə ehtiva edən "Qurani-Kərim"də "Loğman" surəsinin olması da bu ada, bu sənətə verilən İlahi bir dəyərdir.
İnsanın ilk kitabı ucsuz-bucaqsız yer üzü və sirrinə-sehrinə bələndiyi göylər olub. Təbiəti onun dilində danışmaqla kəşf etmək, oxumaq istəyib yer üzünün əşrəfi...
Masamın üstündəki kitabın adı insan sözü ilə sinonim olmasa da, içindəkilər günümüzün reallığıdır. Dünən təbiətdən qopan, bu gün dünyanı bəlalara qərq eləyən və gələcəyi təhlükəyə atan insana "Bəla"nın içindən baxanda ona düçar olanların acizliyini, ondan qurtulanların isə böyüklüyünü görərik.
Göylərdən gələn bəla yerə çatınca Allahın mərhəmət qalxanına dəyib çilik-çilik olur. Amma biz yenə də bundan ibrət almırıq. Bu fikirləri də kitabı oxuduqdan sonra yazmaq qərarına gəldim.
Həkim-yazıçı Asif Gəngərlinin "Bəla"sı, əslində, balalarımızı qorumaq üçün haraydır, çağırışdır. İnsanlığın məhvinə yönəlmiş, qapımızı səssiz, özü də namərdcəsinə döyən ölümə həkim baxışı onun neştərindən deyil, qələmindən boylanır. Adətən həkimlər resept yazar, şeir, hekayə, povest yazmaz. Biz belə bilirik, nədənsə...
"Bəla" ilə tanış olandan sonra gördüm ki, burada övladının, doğmasının, əzizinin sabahını düşünən bir insan ürəyinin nisgili ayaq açıb yeriyir.
"Sənin üstünə üçbaşlı əjdaha hücum çəkmək istəyir. Əjdahanın birinci başı Siqaret, ikinci başı Alkoqol, üçüncü başı isə Narkotik adlanır. Əgər sən siqaret, alkoqol və narkotikdən uzaq olsan, onda əjdahaya qalib gələ bilərsən, yox, zəiflik etsən, yəqin bil ki, o əjdaha səni udacaq"...
Oxucuya səslənən müəllif sanki günümüzün mənzərəsini çəkib. Əlində siqaret azyaşlı birini görəndə sol tərəfimizdən qopan ağrı vücüdumuza hakim kəsilir. Gələcəyimiz olan uşaqların siqaretin ağuşunda can verməsi isə faciənin böyüklüyündən xəbər verir. Siqaret çəkərkən haray çəkən toxumalarının, hüceyrələrinin yandığını hiss etməyən gənci, yeniyetməni xilas etmək, getdiyi qaranlıq yoldan döndərmək üçün "nəyimə lazım"ları unutmalıyıq...
Elə müəllifi, həkim-yazıçını da bu yandırır və görün o, nələri dilə gətirir: "Vaxtilə sağlam olan bir gəncin narkotikə uyması bir əsgərin itirilməsi, yaxud bir qızın "boş" qalması deməkdir. Əgər o, ailəlidirsə, onda o ailənin başı üzərində Damokl qılıncı asılmış kimidir: boşanma təhlükəsi anbaan artır. Onu da deyim ki, ölkəmizdə ailəli narkomanlardan törəyən, müxtəlif fiziki və psixi qüsurlu uşaqların problemləri də əmələ gəlib. O uşaqlar böyüdükcə problemlər də artacaq, böyüyəcək"...
Mən "Bəla"nı birnəfəsə oxudum. Bir narkomanın, zərərli vərdişi həyat tərzinə çevirən, narkotik vasitənin fiziki və psixoloji asılılığından dəli olmaq həddinə çatan insanlarla yanaşı, onların doğmalarının, əzizlərinin taleyinə acıdım. "Bəla", "Zəhrimar" pyesləri həm aktuallığı, həm də dilinin şirinliyi ilə ruhumu oxşadı. Asif Gəngərli həkim kimi müşahidələrini bu kitaba cəm eləyib. O demək istəyir ki, narkomaniya soyqırımıdır, qurtulmaq asan olmasa da, ondan qurtulmanın bir yolunu arayıb-tapmalıyıq...
Və bizləri gözləyən bəlaları ürəyinin qanı ilə yazıb ərsəyə gətirən Asif Gəngərliyə isə həm də polisin adından təşəkkürümü bildirirəm ki, narkotiklərlə və zərərli vərdişlərlə apardığımız qətiyyətli mübarizəyə dəstək verir, vətəndaş yanğısı ilə bilik və bacarığını əsirgəmir.
Bəladan qurtulmaq, ona düçar olmaq istəmirsinizsə, "Bəla"nı tapın və oxuyun. Özünüz oxuyandan sonra verin uşaqlarınız da oxusun. Çünki "Mürəkkəbin axmadığı yerdə qan axar".
Hafiz Təmirov polis mayoru
