Fatimə Hacıbəyli: "Məişət zorakılığının cinayət olduğunu hər kəs qəbul etsə, bunun qarşısının alınması bir o qədər sürətli olar"
Hər bir cəmiyyətdə olduğu kimi, Azərbaycan cəmiyyətində də məişət zorakılığının qurbanları daha çox qadınlar və uşaqlardır. Ancaq çox təəssüf ki, məişət zorakılığı ilə bağlı məlumatlar ailənin daxili işi kimi gizli saxlanır.
Zorakılığa məruz qalan qadınlar yaşadıqları əziyyəti kiminsə bilməsini istəmir. Aparılan araşdırmalara görə, zorakılığa məruz qalanlar düşünür ki, ailə sirrini kiməsə danışmaq düzgün deyil. Ümumiyyətlə, zorakılığa məruz qalmış qadınlar zorakılıq hallarını gizlətməyə çalışır. Bu barədə Bakıda "Gender problemləri və media" mövzusunda keçirilən seminarda jurnalistlərə açıqlamasında Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva bildirib. O qeyd edib ki, məişət zorakılığı qurbanlarının müdafiəsi, onlara hüquqi təminatın verilməsi sahəsində bu gün qanunvericilik bazası var: "Statistik rəqəmlərə baxanda məişət zorakılığı faktının azaldığını görürük. Amma reallıqda faktlar daha çoxdur və biz bunu qəbul etməliyik. Elə olur ki, zorakılıq baş verir, amma ailədən kənara çıxmır. Bizim siyasətimizdə əsas məqsəd budur ki, ailədə baş verən problemləri əvvəlcədən aşkarlaya bilək və ağırlaşmadan onu həll edək. Bu gün komitənin təşəbbüsü ilə hər bir rayonda icra hakimiyyətlərinin nəzdində monitorinq qrupları yaranıb. Onlar risq qrupundan olan ailələrlə müəyyən işlər aparır və onları nəzarətdə saxlayırlar. Azərbaycanda qurbanların müdafiəsi və digər problemlərin həlli istiqamətində qanunvericilik bazası var. Bir neçə il əvvəl isə Azərbaycanda məişət zorakılığının qarşısının alınması ilə bağlı qanun qəbul edilib".
Maraqlıdır, məişət zorakılığı ailə sirri hesab olunurmu? Ümumiyyətlə, məişət zorakılığının qarşısını necə almaq olar?
"Vəfa" Sosial-İctimai Birliyinin sədri Fatimə Hacıbəyli "Bakı-Xəbər"ə açıqlamasında qeyd etdi ki, zorakılıq heç bir halda ailə sirri hesab oluna bilməz: "Zorakılığa dözmək olmaz. Zorakılığa məruz qalıb bu barədə heç kimə bir söz deməmək düzgün deyil. Çünki bunun sonu faciə ilə bitir. Bu hala bir-iki dəfə dözən 3-4 dəfə də dözür, amma faciə ilə nəticələnir. Ailə daxilində zorakılıq halları mütəmadi olaraq baş verirsə, bunu kim bilirsə, susmamalı, bu haqda danışmalı, lazım olan yerlərə müraciət etməlidir".
Həmsöhbətimizin sözlərinə görə, bəzi bölgələrdə belə bir fikir hələ də qalır: "Əvvəllər belə deyirdilər ki, ər adamı döysə də, söysə də, gərək oturub dözəsən. Təəssüf ki, bəzi rayonlarda hələ də bu fikrə əməl edirlər. Hər şeyin həddi var. Əgər məsələ qəddarlığa, əl qaldırmağa çatırsa, dözmək olmaz.
Bu gün xanımına sillə vuran, sabah daha ağır döyəcək. Qarşısı vaxtında alınmadıqda, faciələrlə nəticələnə bilir. Qadın dözür, amma sonda da qətlə yetirilir. Kişi qadını qətlə yetirir, özü həbsə gedir, uşaqlar valideynsiz qalır. Baxın, əsl faciə budur. Uşaqların mənafeyini düşünəndə görürük ki, ailə məsələləri sivil qaydada həll olunanda bütün tərəflər üçün yaxşıdır".
F.Hacıbəyli qeyd etdi ki, məişət zorakılığının cinayət olduğunu hər kəs qəbul etsə, bunun qarşısının alınması da bir o qədər sürətli olar: "Xüsusi təbliğat vasitələri ilə cəmiyyətin maarifləndirilməsinin həyata keçirilməsi çox vacibdir. Bu işdə dövlət də xüsusi maraqlıdır. Bəllidir ki, hər il ailədaxili zorakılığın azaldılmasına yönəlmiş kifayət qədər layihə həyata keçirilir. Ancaq bu işdə dövlətlə yanaşı, cəmiyyət də maraqlı olmalıdır. Normal, sağlam cəmiyyətin formalaşmasına zorakılıqlar birbaşa mənfi təsir göstərir".
Günel CƏLİLOVA
