Azərbaycan Tibb Universitetində (ATU) "Qadınlar dövlətimizin, dövlətçiliyimizin, müstəqilliyimizin, bugünümüzün və gələcəyimizin dayağıdır" mövzusunda tədbir keçirilib.
Tədbirin açılışında ATU-nun tədris və müalicə işləri üzrə prorektoru, professor Sabir Əliyev Azərbaycanda həm ictimai həyatda, həm də ailədə qadına verilən yüksək qiymət haqqında söz açıb: "Azərbaycan qadınları, dövlətin idarə edilməsi də daxil olmaqla, bütün sahələrdə aktiv fəaliyyət göstərir. Hər bir ailənin intizamlı-nizamlı həyatında, ümumilikdə cəmiyyətin inkişafında qadınların müstəsna yeri var. Bizim ölkəmizdə fəaliyyət göstərən oftalmoloq alimlər arasında xüsusi yeri olan görkəmli elm xadimi, ilk qadın Zərifə Əliyeva bu sahə üzrə ilk qadın akademik olub. Tanınmış oftalmoloq-alim Zərifə xanım Əliyeva yüksək elmi nailiyyətlərinə görə SSRİ Tibb Elmləri Akademiyasının M.İ.Averbax adına mükafatına layiq görülüb. Olduqca gözəl mədəniyyətə malik olan görkəmli alim tibb sahəsində böyük xidmətlər göstərib, monumental əsərlər sahibi olub".
S.Əliyev xatırladıb ki, məhz uümummilli lider Heydər Əlyevin təşəbbüsü və göstərişi ilə Azərbaycanda ilk dəfə Ailə, Qadın və Uşaq Problemləri üzrə Dövlət Komitəsi yaradılıb. Azərbaycanda bütün dövrlərdə çox savadlı, fədəkar qadınlar çalışıb və indi də çalışmaqdadır.
YAP Nəsimi rayon təşkilatının sədri, Milli Məclisin deputatı Məlahət İbrahimqızı çıxışında qadınları nəslimizin bugünü, keçmişi və gələcəyi adlandırıb: "Qadınlar haqqında nə qədər danışsaq da yetməz. Qadın üçün anadan uca bir ad yoxdur. Bu gün Azərbaycan gəncliyi də qadınlara verilən dəyəri anlamalıdır. Digər tərəfdən, əsas vəzifəniz tibbi biliklərə yetərincə yaxşı yiyələnmək, gələcəkdə peşəkar həkim, savadlı bir insan olmaqdır". Millət vəkili qeyd edib ki, tələbələr Azərbaycanı və millətimizi bütün dünyada layiqincə təmsil və təbliğ etməlidir.
Millət vəkili Qənirə Paşayeva Tibb Universitetinin məzunu kimi tələbələrə özünün təhsil illəri haqqında xatirələrindən danışıb: "Mən də bu universitetin tələbəsi olmuşam. Mən oxuduğum illərdə ATU bu vəziyyətdə deyildi, heç mənim ailəm də sizin ailələriniz kimi deyildi. İndiki nəsil bu baxımdan çox şanslıdır". Q.Paşayeva vurğulayıb ki, indiki nəsil müstəqil Azərbaycan üçün, onun bütövlüyü üçün var gücü ilə çalışmalıdır: "Yoxsa nə tarix, nə də gələcək nəsil sizi bağışlayacaq. Digər tərəfdən, ən güclü vətənpərvər özünü təhsilə verən şəxsdir. Bu gün vətən üçün edə biləcəyiniz ən vacib əməl yaxşı oxumaqdır".
Ailə, Qadın və Uşaq Problemləri üzrə Dövlət Komitəsinin gender şöbəsinin baş məsləhətçisi Sevinc Əlizadə müstəqillik qazandığımız ilk illərdə ictimai həyatda qadınlara münasibətin birmənalı olmadığını bildirib. Bu gün Azərbaycan qadınının daha güclü və mübariz olduğunu söyləyən S.Əlizadə gənclər üçün təhsilin əsas amil olduğunu bildirib: "Qadın üçün təhsil daha vacibdir. Çünki qadın heç kimə güvənmədən öz ayaqları üstündə dayanmağı bacarmalıdır. Sabah qadın həyatda tək qalsa, özünü və övladlarını ayaqda saxlamağı bacarmalıdır". Aprel döyüşlərində şəhid olmuş polkovnik Raquf Orucovun həyat yoldaşı olan Sevinc Əlizadə hər kəsə daha mübariz olmağı tövsiyə edib.
Tədbirin davamında ATU-nun əczaçılığın texnalogiyası və idarəçəliyi kafedrasının baş müəllimi Aidə Bəndəliyeva iştirakçılarla mövzu haqqında fikirlərini bölüşüb. Toplantıda Azərbaycan qadınlarının idarəetmədə, siyasi və ictimai həyatındakı rollarından, onların aktiv fəlaiyyətindən, bu sahələrdə mövcud olan problemlərdən söz açılıb.
