Adil Qeybulla: "Tibb işçilərinin maddi-texniki imkanlarının, həyat səviyyəsinin yüksəldilməsi istiqamətində hələ xeyli görüləsi işlər var"
Xəbər verildiyi kimi, Azərbaycan Respublikasının Birinci vitse-prezidenti Mehriban Əliyeva İ.M.Seçenov adına Birinci Moskva Dövlət Tibb Universitetinin rektoru Pyotr Qlıboçko ilə görüşüb. M.Əliyeva İ.M.Seçenov adına BMDTU ilə qurulan əməkdaşlıqdan, bu təhsil ocağının Bakıdakı filialının fəaliyyətindən danışıb. Onun fikrincə, filialın yaradılması ilə bağlı layihə çox uğurlu olub.
Son illərdə ölkəmizin səhiyyə sistemində mühüm işlərin görüldüyünü, bu sahədə böyük nailiyyətlərin əldə olunduğunu vurğulayan Azərbaycanın Birinci vitse-prezidenti bildirib ki, indi əsas vəzifə səhiyyə sistemində çalışanların peşəkarlığını daha da artırmaqdır. M.Əliyeva bu baxımdan BMDTU-nun Bakı filialının fəaliyyətinin əhəmiyyətinə toxunub və burada təhsil alan tələbələrin gələcəkdə Azərbaycanın səhiyyə sisteminə töhfələr verəcəyinə əminliyini ifadə edib.
Ümumilikdə, həkimlərin peşəkarlığının artırılması hər zaman vacib məsələlərdən biridir. Müasir dövrün tələbləri, elmi-texniki tərəqqinin inkişafı həkimlərin peşəkarlığına xüsusi önəm verilməsini zərurətə çevirir. Bütövlükdə, bu sahədə hansı problemlər var və bunlar necə həll oluna bilər?
Məsələyə münasibət bildirən tibb elmləri doktoru, professor Adil Qeybullanın sözlərinə görə, həkimlərin peşəkarlığını artırmaq üçün Qərb standartlarına üstünlük vermək lazımdır: "Ümumilikdə, səhiyyənin prioritet sahə olması sosial həyatın çox mühüm elementidir. Bu sahədə bir sıra işlərin görülməsi vacibdir. Səhiyyə sahəsində maddi-texniki bazanın möhkəmləndirilməsi üçün ötən illər ərzində xeyli işlər görülüb. Ancaq hələlik kadr məsələsində, həkimlərin peşəkarlığının artırılması ilə bağlı xeyli görüləsi işlər var. Tibb işçilərinin maddi-texniki imkanlarının, həyat səviyyəsinin yüksəldilməsi istiqamətində hələ xeyli görüləsi işlər var. Bu sahədə islahatlar apararkən Qərb standartlarını nəzərə almalıyıq. Həkimlərin peşəkarlığının artırılmasına yönəlik addımlar məhz Qərb standartlarına uyğun aparılmalıdır. Səhiyyəmiz o standartlara yaxınlaşa bilsə, o zaman həkimlərin peşəkarlıq səviyyəsi daha da artacaq. Əks halda, görülən işlərin effekti arzuolunan səviyyədə olmayacaq. O baxımdan, Mehriban xanım tərəfindən bunun prioritet olaraq səsləndirilməsi aktualdır. Bu istiqamətdə işlərin necə görüləcəyindən çox şey asılıdır".
Vidadi ORDAHALLI
