Üzeyir bəyin "Koroğlu" uvertürasının sədalarını eşidəndə mənə elə gəldi ki, məktəbdə əlavə bir tədbir də keçirilir. Təəccübümü görən direktor Arizə Mahmudova dedi ki, əslində bu, məktəbin zəngidir.
Tədbir başlayana qədər məktəblə tanış olub, uşaqlarla söhbət etdim. Onlara yaxın-uzaq tariximizdən, xüsusən də ordumuzun əldə etdiyi uğurlardan sual ünvanlayanda verdikləri cavablardan sonra gələcəyimizi etibar edə biləcəyimiz uşaqların belə vətənpərvər böyüməsində əməyi olan müəllimlərimizə "çox sağ ol" dedim.
Tədbiri şagirdlər açıq elan etdilər. Birbaşa mətləbə keçib mövzu ilə bağlı hazırladıqları səhnəcikdə narkomaniyaya qurşanmış, kitabdan, təhsildən uzaqlaşmış məktəblinin düşdüyü bəlanı əsl aktyorluq bacarığı ilə elə canlandırdılar ki, zaldakılar heyrətlərini gizlədə bilmədilər.
A.Mahmudova narkomaniya ilə mübarizəyə həsr olunmuş və mütəmadi olaraq keçirilən tədbirlərdən, görülən işlərdən danışdı.
Sabunçu Rayon İcra Hakimiyyəti başçısının I müavini, Narkomanlığa və Narkotik vasitələrin qanunsuz dövriyyəsinə qarşı mübarizə üzrə komissiyanin sədri Güloğlan Məmmədov narkomaniyanın fəsadlarından, maarifləndirmənin vacibliyindən, aparılan mübarizədən danışarkən dedi ki, bu bəla cəmiyyətin mənəvi, əxlaqi dəyərlərini sarsıdır, sosial-iqtisadi inkişafa mənfi təsir gostərir, insanların həyat və sağlamlığına ciddi təhlükə yaradır və cinayətkarlığın artmasına səbəb olur.
Rayon Polis İdarəsinin rəisi, polis polkovniki Eldar İlyasov narkomaniyanın təkcə bir nəfəri deyil, yüzlərlə insanı ağuşuna almasını əsl fəlakət adlandırdı və qeyd etdi ki, bu gün ölkəmizdə narkopmaniyaya qarşı çox ciddi mübarizə aparılır və maarifləndirmə tədbirləri həyata keçirilir. İdarə rəisi narkotikə aludəçiliyin əsasən gənclik dövründə başlandığını, buna görə də elə məktəb dövründən profilaktik işlərin aparılmasının vacibliyinə diqqət çəkdi. Bildirildi ki, narkomanlığın yayılması, narkotik vasitələrin dövriyyəsinə qarşı mübarizədə polis davamlı işlər aparır. Çünki bu, insan cəmiyyətinin mənəvi və əxlaqi dəyərlərinə ciddi zərbə vuran, sosial-iqtisadi inkişafa mənfi təsir göstərən, insanların həyat və sağlamlığına böyük təhlükə yaradan, həmçinin cinayətkarlığın artmasına səbəb olan əsas amillərdən biridir. Narkotik qəbul edənlərin, xüsusilə yeniyetmənin kriminal meylləri daha təhlükəlidir. Xarakterin zəifliyi, mənəvi özünənəzarətin hələ tam formalaşmaması onların cinayət əməllərinə sövq edilməsini asanlaşdırır.
Həkim-narkoloq Qalib Məmmədov narkomaniyanın birbaşa genofonda zərərindən danışdı.
RPİ-nin bölmə rəisi, polis mayoru Əli Babayev, Rayon Gənclər və İdman İdarəsinin rəisi Rakif Əliyev, Narkotiklərlə mübarizə üzrə Dövlət Komissiyasının İşçi Qrupunun böyük referenti Şahin İsmayılov yeniyetmə və gənclərin narkomanlıq və digər zərərli vərdişlərdən qorunması istiqamətində aparılan işlər barədə söhbət açaraq gənc nəslin savadlı, vətənpərvər ruhda böyüməsi, sağlam inkişaf etməsi, zərərli vərdişlərdən uzaq olması üçün görülməli işlərdən danışdılar və müntəzəm olaraq maarifləndirici tədbirlərin keçirlməsinin vacibliyini vurğuladılar.
Sonda şagirdləri maraqlandıran suallar cavablandırıldı.
Hafiz Təmirov polis mayoru
