Aprelin 14-də "Polisə Dəstək" İctimai Birliyi Lənkəran Dövlət Universitetində və Masallı Dövlət Regional Kollecində tələbə və pedoqoji heyətin qarşısında "İnsan alveri cinayətlərinin profilaktikası və xəbərdarlığında ictimaiyyətin rolu" mövzusunda geniş tədbir keçirib.
Tədbirdə çıxış edən Lənkəran Dövlət Universitetinin prorektorları - dos. İdrak Əsgərov və tarix üzrə fəlsəfə doktoru Yədulla Ağazadə insan alveri cinayətləri ilə mübarizənin aktuallığından danışaraq, bu cinayətlərə qarşı geniş ictimaiyyətin iştirakını vətəndaşlıq borcu kimi önə çəkiblər. Qeyd olunub ki, tarixən cəmiyyət köləliyin əleyhinə olub. Bu mənada, hər birimizin insan alverinə qarşı mübarizədə geniş məlumata malik olması maarifləndirmə işinin həyata keçirilməsi üçün zəruri şərtlərdəndir. Beynəlxalq aləmdə qloballaşmanın geniş vüsət aldığı bir dövrdə belə cinayətlərin statistikada yer alması təəssüf doğurur.
Sonra mühazirə üçün söz "Polisə Dəstək" İctimai Birliyinin sədri Şəmsəddin Əliyevə verilib. O, insan alveri və digər cinayətlərə qarşı mübarizədə, cinayətləri doğuran səbəb və şəraitin aradan qaldırılması və profilaktikasında geniş ictimaiyyətin rolundan danışaraq, pedoqoji və tələbə heyətinə insan alverinin tarixi, insanın köləliyə xas tərzdə əşya kimi alınıb-satılması və statistik rəqəmlər barədə məlumat verib.
Tədbir həmin gün Masallı Dövlət Regional Kollecində davam etdirilib. Tədbirdə kollecin direktoru Vidadi Nəzərov, Masallı rayon "Yeni Həyat" qəzetinin məsul katibi Rəsul Rzayev, tələbələrdən isə Səməd Məmmədov çıxış edib.
Mövzu ətrafında QHT sədri Şəmsəddin Əliyev seminar iştirakçılarına geniş məlumat verib, suallar mahiyyəti üzrə cavablandırılıb və iştirakçılara "İnsan alveri ilə mübarizə" kitabçaları paylanıb. Seminar-mühazirədə rayon İH-nin nümayəndələri, şəhər-rayon polis şöbəsinin əməkdaşları, region üzrə KİV-lər və ictimai şuraların nümayəndələri iştirak edib.
Məlumatı "Polisə Dəstək" İB-nin mətbuat xidməti yayıb.
Baki-xeber.com
