Aytəkin Kamranqızı: "Son illər selektiv abortların hesabına oğlan uşaqlarının sayı sürətlə artmağa başlayıb"
Bu ilin əvvəlindən ölkə əhalisinin sayı 13686 nəfər və yaxud 0,1 faiz artaraq 2017-ci il mart ayının 1-i vəziyyətinə 9823667 nəfərə çatıb.
Dövlət Statistika Komitəsinin yaydığı məlumata əsasən, Ədliyyə Nazirliyinin rayon (şəhər) qeydiyyat şöbələri tərəfindən cari ilin yanvar-fevral ayları ərzində ölkədə 24648, yaxud hər gün orta hesabla 418 doğulmuş körpə qeydə alınıb və əhalinin hər 1000 nəfərinə bu göstərici 15,7 təşkil edib. Körpələrdən 424-ü əkiz, 12-si üçəm doğulanlardır. Yeni doğulan körpələr arasında qızların xüsusi çəkisi 47,3 faiz təşkil edərək, hazırda hər 100 doğulan qıza 112 oğlan düşür (bioloji norma 105-107 təşkil edir).
Hazırda ölkədə əhalinin təkrar istehsalı təmin olunaraq uşaq doğmaq qabiliyyətinə malik olan hər bir qadına bütün ömrü boyu 2 uşaq düşür.
Hazırda 100 doğulan qıza 112 oğlanın düşməsi ekspertlər tərəfindən narahatlıqla qarşılanır. Sosioloq Aytəkin Kamranqızı bizimlə söhbətində bildirdi ki,
hazırda Azərbaycanda əhalinin təqribən 50.5 faizini qadınlar, 49.5 faizini kişilər təşkil edir. Buna subyektiv səbəblər təsir edir: "Son illər selektiv abortların hesabına oğlan uşaqlarının sayı sürətlə artmağa başlayıb. Selektiv abortlarla bağlı məsələ dəfələrlə gündəmə gətirildi, dövlət qurumları tərəfindən müzakirəyə çıxarıldı. Vətəndaş cəmiyyəti tərəfindən məsələnin həlli istiqamətində müəyyən maarifləndirici tədbirlər keçirildi".
Həmsöhbətimizin sözlərinə görə, problemin həlli üçün abortların insan orqanizminə ziyanı barədə maarifləndirmə xarakterli məlumatlar verilməlidir: "Əslində, ultrasəs müayinəsində cinsiyyət barədə məlumat verilməsinə qadağa qoymaq heç nəyi dəyişmir. Uşağın cinsini öyrənmək istəyən qadın istənilən formada buna nail ola bilər. Çində bu məlumatın verilməsi qadağan edilib. Amma yenə də doğulan oğlan uşaqlarıdır".
Sosioloq onu da vurğuladı ki, oğlanların, ya da qızların əcnəbilərlə ailə qurması heç bir dövrdə alqışlanmayıb və müsbət qarşılanmayıb: "Amma problem ondadır ki, gələcəkdə bu, məcburi xarakter daşıyacaq. Oğlanlar istəməsələr belə, ailə qurmaq üçün xaricə üz tutub əcnəbi qızlarla evlənəcək. Əcnəbilərlə ailə quranların sayının çoxalması ölkəmiz üçün ciddi problemlər yaradacaq, etnik tərkibdə ciddi dəyişikliklər olacaq. Digər tərəfdən, əcnəbi qadınların böyütdüyü uşaqlar nə adət-ənənələrimizi, nə də dinimizi biləcək".
Günel CƏLİLOVA
