Dənizin ortasında olsa da, bineyi-qədimdən insanlar burda yurd-yuva salıb, məskunlaşıblar. Adının mənasındakı müqəddəslik islamdan öncələrə gedib çıxır. Hələ ərəb xilafəti dövründə tərtib edilən xəritələrdə adı qeyd olunmuşdur. Yeraltı və yerüstü sərvətlərlə zəngindir. Ən böyük sərvəti isə neftdir və məhz "qara qızıl"ın burada tapılmasından sonra bu dəniz incisində həyat canlanmağa başlayıb...
Əlbəttə ki, söhbət dəniz boyda xoşbəxtliyi olan Pirallahıdan gedir. Buranın soyuğu qılınc kimi kəsir. Küləyin gücünü isə dənizdəki qayadan dalğaları görəndən sonra bilirsən. Düzü, bu yerlərdə yaşamağın özü də qəhrəmanlıqdır. Yaşamaq demişkən, o yerdə həyat var olur, o yerdə insan məskən salır ki, orda həyat mənbəyi olan şirin su olsun. O da Pirallahıda var...
Tarixin müəyyən dövrlərində adada məhbus olunmuş şəxsləri yerləşdirirdilər ki, onlar burada məskunlaşsınlar. Bu da o zamanın siyasəti idi. Bu gün isə Pirallahıda quruculuq-abadlıq işləri göz oxşayır, yeni salınan yollar insanların rahat şəkildə gediş-gəlişini asanlaşdırır. Qurub-yaratmaq, işləmək üçün hər cür şərait yaradılıb. Əsas odur ki, canında təpər, ürəyində yaşamaq, yaşatmaq eşqi olsun. Ölkəmizin hər yerində olduğu kimi, bu uzaq, "yaşıl ada"da da əminamanlıq, sabitlik var. Elə məni buraya gətirən səbəblərdən biri burada sabitliyi qoruyan həmkarlarımızdan yazmaq, gördüklərimi, eşitdiklərimi, bildiklərimi oxucularımızla bölüşmək istəyi idi...
Pirallahıya qədəm basanda insanı ilk salamlayan dəniz olur. Gözü-könlü tox, ürəyi böyük dəniz. Mirvari qanadlarını ləpələrə çırpa-çırpa sanki qağayılar xoş gəldin eləyir. İlk baxışdan adanın sehrinə düşürsən.
Yeri gəlmişkən, burada yenə də qoçaq adamların çörəyi dənizdən çıxır...
Yuxarıda qeyd etdiyim kimi, bizim də könlümüzə yazmaq düşmüşdü. Pirallahı həm də ona görə müqəddəsdir ki, torpaqlarımız uğrunda qəhrəmancasına döyüşərək şəhidlik zirvəsinə ucalan Azərbaycanın Milli Qəhrəmanları-İbrahimov Elvin Səxavət oğlu, Əliyev Yavər yaqub oğlu, Murtuzəliyev Sergey Murtuzəlieviç kimi mərd oğullar yetirib.
Elə bu gün də Pirallahıda o qəhrəman oğulların qəhrəmanlıq yolunun davamçıları yetişir. Şöbə rəisi, polis polkovnik-leytenantı Çümşüd İsmayılovla söhbət zamanı adadakı kriminal durumla bağlı dedi ki, əməkdaşlar cinayətkarlıqla, xüsusən də narkotiklərlə ciddi mübarizə ilə yanaşı, mütəmadi olaraq narkomaniya ilə mübarizə məqsədilə məktəblərdə, gənclərin üstünlük təşkil etdiyi strukturlarda maarifləndirici tədbirlər keçirir. Rəis əlavə də etdi ki, polisin bu "yaşıl ada"da əsas məqsədi cinayətkarlığın bütünlüklə kökünün kəsilməsidir. Elə buna görə də mübarizə gecə-gündüz səngimir.
Bu yerdə söhbətimizə qoşulan rəis müavini, polis polkovnik-leytenantı Elman Kazımov isə yeri gəlmişkən bir neçə misal gətirdi. Məlum oldu ki, bu rüb ərzində 16-sından 14-ü qeyri-aşkar şəraitdə baş verən cinayətlərin üstü əməkdaşların gərgin zəhməti nəticəsində açılıb.
Cinayətlərin açılmasında xüsusi xidmətləri olan Cinayət-axtarış bölməsinin əməkdaşları gənc olsalar da, sözün əsl mənasında peşəkardılar. Tapşırılan əməliyyat tapşırığının öhdəsindən layiqincə gəlmək bir yana, həm də vətəndaşlıq mövqeyi nümayiş etdirərək cinayətə meylli olan şəxslərlə profilaktik söhbətlər aparıb, xüsusən də gənclərin məhbəsə gedən yolunun qarşısını vaxtında kəsiblər.
Yeri gəlmişkən, şöbənin əməkdaşları tərəfindən keçirilən əməliyyat-axtarış fəaliyyəti nəticəsində Pirallahı sakini, əvvəllər dəfələrlə məhkum olunmuş Elxan Şərifovdan 1005 qram heroin, Boldıryev Vyaçeslavdan kustar üsulla hazırlanmış tapança, Zaur Rzayevdən isə AKMS markalı avtomat silah aşkar olunaraq götürülüb.
Bəli, görünən adada görünən dağa nə bələdçi? Görülən işlər isə, zəhmətin bəhrəsi olmaqla yanaşı, Vətənə, dövlətə xidmətin göstəricisidir.
Hafiz Təmirov, polis mayoru
