Fatimə Hacıbəyli: "Bəzi qadınlar elə düşünür ki, siqaret çəkməklə artıq çəkidən azad ola bilər"
"Siqaret çəkmək sizin sağlamlığınıza ziyan vurur". Bu xəbərdarlıq bütün siqaret qutularının üzərində yer alır. Hamıya məlumdur ki, siqaretin aktiv istifadəçisi kişilərdir. Lakin müşahidə etdikdə görürük ki, elə zərif cinsin nümayəndələri də buna az meyl göstərmir.
Araşdırmalara görə, ən çox siqaret çəkən qadınlar çinlilərdir. Ən çox siqaret istehlak edilən ölkələrdən olmasına baxmayaraq, Yunanıstan qadınları "ən az siqaret çəkən qadınlar" hesab olunur. İslandiya, Norveç və İngiltərədə isə siqaret çəkən qadın ilə kişilərin nisbəti bərabərdir. Ən gənc siqaret çəkən qadınlar Çili, Ukrayna və Argentinadadır. Ən çox siqaret çəkən yaşlı qadınlar isə Qvineya, Venesuela və Livan qadınlarıdır.
Etiraf edək ki, Azərbaycanda da son dönəmlərdə siqaret çəkən qadınların sayı heç də az deyil.
Son dövrdə Azərbaycanda qadınların siqaretə marağının artması Milli Məclisdə də müzakirəyə çıxarılıb. Milli Məclisin Əmək və sosial siyasət komitəsinin sədri Hadı Rəcəbli parlamentin iclasında "Tütün məmulatlarının istifadəsinin məhdudlaşdırılması haqqında" qanun layihəsinin müzakirəsi zamanı maraqlı məqamlara toxunub. Deputatın sözlərinə görə, aparılan sorğular nəticəsində müəyyən olunub ki, kişilərin 67.5 faizi, qadınların isə 52.3 faizi ətrafdakı tütün tüstüsündən əziyyət çəkir.
"Vəfa" İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, bu gün Azərbaycanda qadınlar arasında siqaret çəkmək vərdişi geniş yayılıb: "Təəssüf ki, bəzi qadınlar arasında belə bir fikir var ki, siqaret sinir sistemini normallaşdırır. Bir sıra qadınlar elə düşünür ki, onlar hirsini soyutmaq üçün siqaretdən istifadə edir. Amma o an tam ayrı bir proses gedir və bir neçə dəqiqəlik problemdən uzaqlaşırsan. Halbuki, bu zaman su içmək, musiqiyə qulaq asmaq da eyni təsiri göstərir. Unutmaq lazım deyil ki, siqaret damarları sıxır, depressiyaya səbəb olur".
Həmsöhbətimizin fikrincə, qadınların siqaretə meyl etməsi səbəblərindən biri sosial həyatın çətinləşməsidir: "İnsanlar bir neçə il əvvəl daha sakit həyat yaşayırdılarsa, indi onlar informasiya bolluğuna düşüb. Bu isə insanların çox aktiv həyat keçirməsinə səbəb olub. Belə olan halda isə, insanlar fikirləşir ki, stresdən çıxmaq üçün içki və siqaretdən istifadə etmək lazımdır. Bu fikir daha çox qadınların arasında yayılır. Çünki qadınlar stresə daha çox məruz qalır. Onlar fikirləşir ki, siqaret çəkməklə əsəb gərginliyini özlərindən uzaqlaşdıracaq. Bu gün qadınların siqaret çəkməsində artımın müşahidə olunmasının bir səbəbi də odur ki, bəzi qadınlar siqaret çəkməklə arıqlayacağını düşünür. Onlar elə düşünür ki, siqaret çəkməklə artıq çəkidən azad ola bilər. Ancaq bu sahədə uzun illər çalışan ekspertlər bildirir ki, siqareti tərgidə bilməmək qadınların psixoloji durumu ilə bağlıdır. Bunun, qadınların dediyi kimi, çəki ilə heç bir əlaqəsi yoxdur. Siqaret çəkən qadınlar düşünür ki, onlar siqareti atsa, boş vaxtları çoxalacaq və yemək yeməyə başlayacaqlar. Bu fikri özlərinə aşılayanlarda siqaretə meyllilik artır və onlar vərdişkara çevrilir. Onu da deyim ki, siqaretin artıq çəki ilə mübarizədə effektivliyinə təkcə bizdə yox, xarici dövlətlərdə də inananlar çoxdur. Məsələn, Amerikada hər 5 qadından 1-i kökəlməyin qarşısını almaq üçün siqaret çəkir. Siqaret çəkən qadınlar artıq çəkidən ona görə azad ola bilir ki, nikotin iştahanı azaldır".
Günel CƏLİLOVA
