İlqar Hüseynli: "Yerli icra hakimiyyəti orqanlarına parklara nəzarətin tapşırılması bu sahədə hər hansı bir köklü dəyişikliyə səbəb olmayacaq"
Xəbər verildiyi kimi, Azərbaycanda mədəniyyət və istirahət parkları icra hakimiyyəti orqanlarının tabeliyinə verilib. Bununla bağlı Nazirlər Kabineti "Azərbaycan Respublikası Mədəniyyət və Turizm Nazirliyinin strukturuna daxil olmayan tabeliyindəki qurumların Siyahısı"nda dəyişiklik edib.
Dəyişikliyə əsasən, mədəniyyət və istirahət parkları "Azərbaycan Respublikası Mədəniyyət və Turizm Nazirliyinin strukturuna daxil olmayan tabeliyindəki qurumların Siyahısı"ndan çıxarılıb. Həmin parklar onlara məxsus əmlakla birlikdə ərazi üzrə aidiyyəti yerli icra hakimiyyəti orqanlarının tabeliyinə verilib.
Mədəniyyət və Turizm Nazirliyinə Əmlak Məsələləri Dövlət Komitəsi və ərazi üzrə aidiyyəti yerli icra hakimiyyəti orqanları ilə birlikdə bu qərardan irəli gələn məsələləri həll etmək tapşırılıb.
İstirahət parklarının yerli icra hakimiyyətlərinə tapşırılmasına münasibət bildirən sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki, istirahət məkanları, parklar bələdiyyələrin nəzdinə verilməlidir. Çünki icra hakimiyyətlərinin səlahiyyətində çoxlu məsələlər var.
Həmsöhbətimizin sözlərinə görə, parkların icra hakimiyyətlərinin balansına verilməsində məqsəd onlardan düzgün istifadə olunmasıdır. Balansın dəyişməsi mahiyyətcə heç nəyi dəyişmir. Əsas məsələ parklara lazımi vəsait xərcləyib düzgün qulluq edilməsidir".
Ekspertin sözlərinə görə, xarici ölkələrdə parklar və ya istirahət obyektlərinin böyük əksəriyyəti yerli bələdiyyə orqanlarının nəzarətinə verilir. Parklar bələdiyyələrə verilsə, onların cəmiyyət qarşısında öhdəlikləri yaranar, tez bir zamanda işlək quruma çevrilmək imkanları artar.
Müsahibimizin fikrincə, yerli icra hakimiyyəti orqanlarına parklara nəzarətin tapşırılması bu sahədə hər hansı bir köklü dəyişikliyə səbəb olmayacaq. Günel CƏLİLOVA
