Nəsimi Paşayev: "Metrodan istifadə edənlər sanitariya qaydalarına riayət etməlidir"
Şahin Camalov: "İctimai nəqliyyatda gigiyenik qaydalara əməl olunmaması problemi metroda deyil, daha çox avtobuslarda var"
Bakıda ən çox istifadə olunan ictimai nəqliyyat metrodur. Mənzil başına tələsənlər günün istənilən saatında metrodan istifadəyə üstünlük verir. Metro stansiyaları, eləcə də qatarlar həm də təmizlik baxımından insanların istifadəsi üçün sərfəlidir.
Ancaq bəzi hallarda metro istifadəçiləri əllərində olan salfeti və ya içdikləri suyun qabını qatarın oturacağına qoyur. Metroda bu kimi xoşagəlməz halların qeydə alınması istifadəçilərin haqlı narazılığına səbəb olur.
"Bakı Metropolitenindən istifadə qaydaları"nın 5.1.18. bəndinə əsasən, stansiyaların vestibül, keçid və platformalarını, eskalatorları, yolları və vaqonların salonunu zibilləmək və çirkləndirmək, 5.1.19. bəndinə əsasən, yollara hər hansı əşya atmaq qadağandır.
Məsələ ilə bağlı fikir bildirən "Bakı Metropoliteni" QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayev qeyd etdi ki, kimsə metronu müxtəlif tullantılarla çirkləndirirsə, bu birbaşa onun mədəniyyət göstəricisidir: "Vaqon və stansiyalar mütəmadi şəkildə təmizlənir. Lakin insanlara nəzarət etmək mümkün deyil. Metrodan istifadə edənlər sanitariya qaydalarına riayət etməlidir. Qatar xəttdən çıxarkən, depoya gedən zaman gün ərzində 1-2 dəfə yuyularaq təmizlənir. Təmiz olmayan qatar xəttə buraxılmır. Onların çirkləndirilməsi də məhz xəttə buraxılarkən baş verir. Qaydaları pozanları 10 manat civarında cərimə gözləyir. Cərimələr metroda fəaliyyət göstərən polis əməkdaşları tərəfindən tətbiq edilir".
"Təhlükəsiz Yol" Alyansının koordinatoru Şahin Camalov qeyd etdi ki, ictimai nəqliyyatda gigiyenik qaydalara əməl olunmaması problemi metroda deyil, daha çox avtobuslarda var. Metroda səliqə-sahman işinə baxan xanımlar gün ərzində hərəkətdədir, təmizləyirlər. Amma avtobuslar səhər qarajlardan çıxır və axşam saat 12-də qayıdır. Gecəyarı onların işçilər tərəfindən təmizlənməsi sual doğurur. Həmsöhbətimizin fikrincə, metro daha əlverişli, sıx istifadə edilən nəqliyyat vasitəsi olduğuna görə ona diqqət yetirilməli, təmizlik qaydalarına riayət olunmalıdır.
Günel CƏLİLOVA
