ATU-dan baki-xeber.com-a verilən məlumata görə, Cibuti səhiyyə nazirinin başçılıq etdiyi nümayəndə heyəti Azərbaycan Tibb Universitetində (ATU) qonaq olub.
Nazir Dr. Cama Elmi Okieh, Səhiyyə Nazirliyinin nümayəndələri, Cibutinin ölkəmizdəki səfiri Məhəmməd Ali Kamil, o cümlədən Azərbaycanın Cibutidəki səfiri Elman Abdullayevin daxil olduğu nümayəndə heyəti ilə ATU rektoru, professor Gəray Gəraybəyli arasında bir çox məsələlərlə bağlı müzakirə aparılıb.
Görüşdə professor Gəray Gəraybəyli qonaqlara universitetin fəaliyyəti, ATU-dakı mövcud tədris və təhsil sistemi, tələbələrin keyfiyyətli təhsili üçün yaradılan şərait haqqında ətraflı məlumat verib. Qeyd edilib ki, hazırda ATU Azərbaycanda tibb təhsili verən yeganə ali təhsil ocağıdır: "Universitetimiz təkcə Azərbaycan deyil, dünya üzrə də tanınan təhsil ocağına çevrilməkdədir. Məhz bu səbəbdən bir çox xarici ölkədən olan tələbələrimiz var və hər il əcnəbi tələbələrin sayı artır. Xarici tələbə sayına görə ATU digər universitetlərlə müqayisədə, demək olar, birincidir. Universitetimiz son illər beynəlxalq əlaqələrin genişlənməsinə böyük diqqət yetirir. Bir çox xarici universitetlərlə sıx əlaqələrimiz, qarşılıqlı əməkdaşlıq sazişlərimiz var". Rektor bildirib ki, ATU-nun beynəlxalq əlaqələri yalnız tələbə mübadiləsi ilə məhdudlaşmır. Həmçinin, universitet nəzdindəki klinikalar bir çox ölkələrdən mütəxəssislər qəbul edir, onların iştirakı ilə elmi konfranslar, seminar və təlimlər keçirilir.
Rektor G.Gəraybəyli bu görüşün gələcəkdə iki ölkənin səhiyyə və təhsil sahəsində ciddi əlaqələrin qurulması istiqamətində atılmış böyük addım olacağından əminliyini qeyd edib:"Azərbaycan və Cibuti arasında yüksək səviyyəli münasibətlər mövcuddur və bu əlaqələr inkişaf edir. İnanıram ki, həm səhiyyə sistemində, həm də təhsil sektorunda əməkdaşlıq, birgə layihələrin aparılması hər iki tərəf üçün faydalı olacaq".
Cibutinin səhiyyə naziri Dr.Djama Elmi Okieh Azərbaycanda olmasından məmnunluğunu bildirib. O, səhiyyə naziri Oqtay Şirəliyevlə görüş haqqında məlumat verərək səhiyyə və tibb təhsili sahəsində əməkdaşlıqda maraqlı olduqlarını deyib: "Bizim ən böyük sərvətimiz insan resurslarıdır. ATU Azərbaycanda özünün nüfuzu ilə tanınan, seçilən universitetlərdəndir. Çox istərdik ki, ATU-nun əcnəbi tələbələri arasında bizim ölkənin gəncləri də olsun".
Daha sonra ATU-nun beynəlxalq əlaqələr üzrə prorektoru Nadir Zeynalov görüş iştirakçılarına ATU-da xarici vətəndaşların təhsil şərtləri, qaydaları haqqında geniş məlumat verib. O, ATU-da ümumilikdə 7000-ə yaxın tələbənin təhsil aldığını, bunlardan 1500-nün xarici tələbə olduğunu deyib. Qeyd olunub ki, hazırda ATU-da 26 ölkədən tələbələr müxtəlif əsaslarla təhsil alır. N.Zeynalov həmçinin qonaqlara ATU-nun xarici tələbə yataqxanası, tələbələrin asudə vaxtlarının səmərəli keçirilməsi üçün təşkil olunan tədbirlər haqqında da danışıb.
Görüşdə qarşılıqlı əməkdaşlığın yaranması və inkişaf etdirilməsinə dair maraqlı müzakirələr aparılıb.
Baki-xeber.com
