Rasif Bağırov: "Bəzi həkimlər xəstəyə bioaktiv maddə adı ilə hansısa dərmanı yazır"
Milli Məclisin Səhiyyə komitəsinin son iclasında həkimlər tərəfindən xəstələrə müalicə üçün lazım olmayan preparatların yazılması müzakirə olunub. Səhiyyə komitəsinin sədri Əhliman Əmiraslanov çıxışı zamanı bildirib ki, bəzən həkimlər tərəfindən xəstələrə müalicə üçün lazım olan əsas preparatların yazılması, əsas müalicənin aparılması kənarda qalır, amma 2-3-cü dərəcəli preparatların xəstələrə yazılması ön plana çıxır.
Məsələ ondadır ki, bu preparatların qiyməti əsas dərmanların qiymətindən çox baha olur. O qeyd edib ki, həkimlərin dərman sayılmayan bioloji aktiv maddələrdən istifadə etməsinin əleyhinə deyillər: "Lakin söhbət ondan gedir ki, bunun arxasında başqa məqsədlər dayanır. Xəstə müalicə olunmaq üçün həkim yanına gəlir. Həkim deyir ki, səni müalicə edəcəyəm, amma xəstə müalicə edildikdən 2 il sonra həkim yanına təkrar gəlir və görür ki, onun bədənində metostazlar var. Belə hallar az deyil".
Milli Məclisin Səhiyyə komitəsinin üzvü Rəşad Mahmudov isə bildirib ki, İnzibati Xətalar Məcəlləsinə təklif olunan dəyişikliyə əsasən, bioloji fəallığa malik qida əlavələrinin həkim reseptinə yazılmasına görə vəzifəli şəxslər 50 manatdan 100 manatadək, hüquqi şəxslər 150 manatdan 200 manatadək məbləğdə cərimə ediləcək.
Əhliman Əmiraslanovun Milli Məclisdə səsləndirdiyi iradların haqlı olduğunu bildirən tibbi ekspert Rasif Bağırov qeyd etdi ki, bu gün bəzi həkimlər tərəfindən xəstəyə aidiyyəti olmayan müalicə təyin olunur: "İkinci-üçüncü dərəcəli preparatları xəstələrə yazan həkimlər, tibb sahəsində hər hansı bir yer tuta bilməyən şəxslər pul əldə etmək üçün bu vasitəyə əl atır. İkinci-üçüncü dərəcəli preparatı xəstəyə təyin edən həkimlər tez bir zamanda tanınır. O cür tibb işçilərinə müraciət edən xəstələrin sayı az olur. Bunun da səbəbi müalicənin effekt verməməsi ilə bağlıdır.
Tam əminliklə deyirəm ki, müalicə işində bu cür həkimlərin sayı az faiz təşkil edir. Özünə hörmət edən müalicə həkimi buna yol verməz. Müalicə həkimi çalışmalıdır ki, onun müalicə etdiyi şəxs tez bir zamanda sağalsın və həmin həkimin peşəkarlığı barədə öz yaxınlarına məlumat versin. Həkimə xəstəni xəstə gətirər. Öz təcrübəmdə də tibb sahəsinə yaraşmayan həkimləri görmüşəm. O həkimlər qısa zaman içərisində sıradan çıxır".
Bioloji aktiv maddələrin istifadəsinə gəlincə, həmsöhbətimiz qeyd etdi ki, adıçəkilən maddələr Avropanın bütün ölkələrində insanların gündəlik qəbul etdikləri dərmanlardır: "Aktiv maddələr insan orqanizmində çatışmayan maddələri yerinə qoymaqla, orqanizmin tam şəkildə fəaliyyət göstərməsinə şərait yaradır. Bioaktiv maddələr müalicə deyil. Sadəcə, qida vasitələrindən orqanizmdə çatmayan mineral, vitamin və digər maddələri orqanizmə yerləşdirməklə insan ömrünü uzadır. Avropa ölkələrində bioaktiv maddələrdən mütəmadi istifadə olunur. Ancaq Azərbaycanda isə bioaktiv maddələrin qiyməti olduqca baha olduğu üçün, hər kəs bundan istifadə edə bilmir. Bəzi həkimlər xəstəyə bioaktiv maddə adı ilə hansısa dərmanı yazır. Ancaq, əslində, xəstəyə yazılan dərman bioaktiv maddə deyil. Çünki, dediyim ki, adıçəkilən preparatların qiyməti olduqca bahadır".
Günel CƏLİLOVA
