Adil Qeybulla: "Keyfiyyətsiz Çin istehsalı olan dərmanların Avropada qablaşdırılaraq Azərbaycana gətirilməsi haqqında yayılan məlumatlar əsassız deyil"
Çində istehsal olunan dərmanların Avropada qablaşdırılaraq Azərbaycana göndərildiyi iddia olunur. Belə bir iddianı millət vəkili Musa Quliyev Milli Məclisin Səhiyyə komitəsinin iclasında "Dərman vasitələri haqqında" və "Reklam haqqında" qanunlara, İnzibati Xətalar Məcəlləsinə təklif edilən dəyişikliklərin müzakirəsi zamanı dilə gətirib. O qeyd edib ki, bəzi şirkətlərin Çində istehsal olunan dərmanları Avropaya göndərib orada qablaşdırmaqla Azərbaycana gətirdikləri barədə çoxlu sayda müraciət daxil olur.
M.Quliyev bəzi hallarda həkimlərin xəstəyə təyin etdiyi dərmanların o qədər də effekt vermədiyini bildirib: "Ona görə də xəstələrə qonşu ölkələrdən dərman gətirmələrini tövsiyə edirik. Bu çox ciddi narahatlıq doğuran faktdır. Tarif Şurası buna ciddi əncam çəkməlidir. Bəlkə də 400-500 adda dərmanın qiymətini tənzimləməli, yerdə qalanlarının qiymətini isə şirkətlərin özlərinə həvalə etməliyik".
Çində istehsal olunan dərman preparatlarının Avropada qablaşdırılaraq Azərbaycana göndərilməsini ekspertlər də təsdiqləyir. Onların fikrincə, bu gün ölkədə eyni tərkibli kifayət qədər dərman var. Lakin həmin dərmanların təsiri isə olduqca zəifdir.
Professor, tibbi ekspert Adil Qeybulla "Bakı-Xəbər"ə açıqlamasında qeyd etdi ki, dərmanların qablaşdırılması istənilən ölkədə mümkündür: "Azərbaycanda dərman sahəsində problemlər mövcuddur. Problem təkcə dərmanların qablaşdırılması deyil. Dərman preparatlarının ölkəyə idxalı prosesi tam nəzarətsizdir. Ölkəyə dərman idxalı monopoliyadadır. Və gələn keyfiyyət parametrləri haqqında da etibarlı məlumat yoxdur. Səhiyyə Nazirliyinin analitik laboratoriyası var. Ancaq elə dərman preparatları var ki, onlar həmin laboratoriyadan keçmir. Laboratoriyadan keçməyən preparatların keyfiyyətsiz olması göz önündədir. Əsasən Çində istehsal olunan dərmanlar, eyni zamanda preparatın içində təsiredici maddə tam təmizlənməmiş həblərin keyfiyyət testindən keçmir".
Həmsöhbətimiz təklif edir ki, dərman farmokepiyası, dərman maddələrinin reyestri yaradılmalıdır ki, ölkəyə gələn hər bir preparata nəzarət olunsun. Dərman farmokepiyası ilə əhali istifadə etdiyi preparatın tərkibi haqqında məlumatlı ola bilər.
A.Qeybulla bildirdi ki, keyfiyyətsiz Çin istehsalı olan dərmanların Avropada qablaşdırılaraq Azərbaycana gətirilməsi haqqında yayılan məlumatlar əsassız deyil.
Günel CƏLİLOVA
