Əliməmməd Nuriyev: "Məhbusların istehsal müəssisələrində əməklə məşğul olması onları zərərli vərdiş düşüncələrindən uzaqlaşdıracaq"
Məlum olduğu kimi, Azərbaycan Respublikasının Prezidenti penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə Sərəncam imzalayıb.
Sərəncama əsasən, azadlıqdan məhrum olunmuş şəxslərin ictimai faydalı əməyə cəlb olunması üçün cəzaçəkmə müəssisələrində istehsal sahələri bərpa edilməli, həmçinin, yeni istehsal sahələri yaradılmalıdır.
Penitensiar müəssisələrin fəaliyyətinin müasirləşdirilməsi, infrastrukturun yenilənməsi və idarəçilik mexanizminin təkmilləşdirilməsi tədbirlərinin davam etdirilməsi qeyd olunub.
Cəzaçəkmə müəssisələrində istehsal müəssisələrinin bərpa olunması və yenilərinin yaradılması nəticəsində azadlıqdan məhrum olunan məhkumlar vaxtını faydalı işə sərf edəcək.
Ədliyyə Nazirliyi yanında Penitensiar Xidmətə Nəzarət İctimai Komitəsinin üzvü Əliməmməd Nuriyev "Bakı-Xəbər"ə açıqlamasında qeyd etdi ki, ölkə başçısı İlham Əliyevin məlum sərəncamı tarixi əhəmiyyətə malikdir. Həmin sərəncamda hüquq-mühafizə orqanlarının qarşısında bir sıra vəzifələr qoyulub. O vəzifələrdən biri də məhkumların əməyə cəlb olunmasıdır: "Hazırda cəzaçəkmə müəssisələrində istehsal sahələri ilə bağlı müəyyən problemlər mövcuddur. Baxmayaraq ki, Penitensiar Xidmətin rəhbərliyi bu istiqamətdə xeyli iş görüb. Əvvəllər məhkumlar arasında məşğulluq səviyyəsi 5-10 faiz təşkil edirdisə, indi 20 faizə qədər yüksəliş var. İndi 7000-dən artıq məhkum müəyyən əmək işlərinə cəlb olunub. Daha doğrusu, burada məcburi əməkdən söhbət gedə bilməz. Cəzaların İcrası Məcəlləsinin əsas prinsiplərindən biri də məhkumların islah edilməsidir. Əmək prosesi könüllülüyə əsaslanır".
Həmsöhbətimizin sözlərinə görə, cəzaçəkmə müəssisələrində peşə məktəbləri fəaliyyət göstərir. Həmin peşə məktəblərində məhkumlara yeni peşələr öyrədirlər: "Eyni zamanda, azadlıqdan məhrum olunan şəxslər kompyuter və mühasib kurslarına cəlb olunur. Qadın cəzaçəkmə müəssisələrində xalçaçılıqla bağlı böyük bir sex fəaliyyət göstərir. Bununla yanaşı, cəzaçəkmə müəssisələrində məşğulluq istənilən səviyyədə deyil. Bu baxımdan daha çox məhkum işləmək istəyir. Onlar işləməklə həm özünün gündəlik xərcini ödəmək, həm də ailəsinə yardım göstərmək istəyir. Məhbusların istehsal müəssisələrində əməklə məşğul olması onları zərərli vərdiş düşüncələrindən uzaqlaşdıracaq".
Ekspertin fikrincə, cəzaçəkmə müəssisələrində yeni istehsal müəssisələrinin yaradılması üçün özəl sektoru bu sahəyə yönəltmək lazımdır. Özəl sektoru bu sahəyə yönəltmək üçün qanunvericiliyə müəyyən dəyişikliklər etmək lazımdır: "Bu, islah prosesinə müsbət təsir etməklə yanaşı, cinayətkarlığın qarşısının alınmasında mühüm vasitələrdən biri kimi dəyərləndirilməlidir".
Günel CƏLİLOVA
