Adil Qeybulla: "Son vaxtlar ünsiyyətlərin məhdudlaşdırılması insanların daha çox özünə qapanmasına gətirib çıxarır"
Ötən il Azərbaycanda 2234 nəfər kimyəvi zəhərlənməyə məruz qalıb, 57 nəfər isə kimyəvi zəhərlənmədən dünyasını dəyişib.
Bu barədə Bakı Şəhər Baş Səhiyyə İdarəsinin baş toksikoloqu, Kliniki Tibbi Mərkəzin Toksikologiya şöbəsinin həkimi, dosent İsmayıl Əfəndiyev media nümayəndələrinə açıqlamasında deyib. Onun sözlərinə görə, kimyəvi zəhərlənməyə məruz qalanların və bu zəhərlənmələrdən ölənlərin sayı 2015-ci illə müqayisədə azalıb. 2015-ci ildə kimyəvi zəhərlənmədən 68 nəfər dünyasını dəyişib. Kimyəvi zəhərlənmələr daha çox 20-29 yaş qrupu insanlar arasında qeydə alınıb. Bu yaşda kimyəvi zəhərlənməyə məruz qalanlar ümumilikdə kimyəvi zəhərlənənlərin 27 faizini (618 nəfər) təşkil edib.
İ.Əfəndiyev əlavə edib ki, kimyəvi zəhərlənmələrin çoxu dərmanlardan baş verib: "Xəstələrin 32 faizi dərmanlardan zəhərlənib. Dərman zəhərlənmələri daha çox əsəbə qarşı - sedativ tərkibli dərmanlardan baş verib. Onların əksəriyyəti intihar xarakterli zəhərlənmələr olub. Ümumiyyətlə, böyüklərdə dərman zəhərlənmələri əsasən sui-qəsd xarakterli olur".
İ.Əfəndiyev qeyd edib ki, ötən il kimyəvi zəhərlənməyə məruz qalanların 893 nəfəri, yəni 40 faizi (ötən il 30 faizi) bunu özünə qəsd etmək məqsədilə edib. Həmin xəstələrin çoxu qadınlar, xüsusilə cavan qadınlar olub. Qadınlar dərman və sirkə turşusu içməklə sui-qəsd etmək istəyib.
İ.Əfəndiyev bildirib ki, 2016-cı ildə 253 nəfər, 2015-ci ildə isə 278 nəfər sirkə turşusu içməklə özünü zəhərləyib.
Kimyəvi zəhərlənmə yolu ilə intihar edənlərin üstünlük təşkil etməsinə dair fikir bildirən professor, tibbi ekspert Adil Qeybulla bizimlə söhbətində bunları dedi: "Ümumiyyətlə, intihar vasitələri çoxdur. Özünəqəsd üçün bu vasitələrdən, toksiki maddələrdən, zəhərlərdən istifadə etmək dünya praktikasında geniş yayılıb. Dərman vasitələrindən, müxtəlif zəhərli maddələrdən istifadə edərək intihar etmək daha asan yol olduğu üçün, əksəriyyət bu yola əl atır.
Bildirim ki, dərman maddəsini normadan artıq istifadə etmək olmaz. Elə dərmanlar var ki, onlar güclü təsirə malikdir. Hər halda, bu intiharların Azərbaycanda geniş yayılması çox ciddi hadisədir. Azərbaycan həmişə sosial ölkə olub. İnsanlar daim ünsiyyətdə olub. Son vaxtlar bu ünsiyyətlərin məhdudlaşdırılması insanların daha çox özünə qapanmasına, çıxış yolu tapmamasına gətirib çıxarır. Bu, intiharların əsasında dayanan faktorlardan biridir".
Həmsöhbətimizin sözlərinə görə, bir neçə dərman preparatı var ki, onlardan dozadan artıq istifadə olunduqda fəsadlar törədir: "Dərmanlar var ki, onlar ürək-damar sisteminə təsir edir. Bu cür dərmanlar çoxdur. İstənilən dərman vasitəsi müəyyən dozada toksiki effektə malikdir. Yəni bir dozada dərmandır, digər dozada zəhər".
Günel CƏLİLOVA
