"Azərbaycanda uşaqlarını asılı vəziyyətdə saxlayan, qız uşaqlarına qarşı ayrıseçkilik edən valideynlərlə bağlı qanunvericilikdə xüsusi bir maddənin olması məqsədəuyğundur"
Azərbaycanda uşaqlarını asılı vəziyyətdə saxlayan, qız uşaqlarına qarşı ayrıseçkilik edən valideynlərlə bağlı İnzibati Xətalar Məcəlləsinə əlavələrin edilməsi təklif edilir. Bu barədə Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov "Trend"ə açıqlamasında bildirib.
O qeyd edib ki, hazırda Cinayət Məcəlləsində qadınları nikaha daxil olmağa məcburetmə ilə bağlı xüsusi maddə (176-1-ci maddə) var.
Komitə rəsmisi hesab edir ki, İnzibati Xətalar Məcəlləsinə bir sıra hallarla bağlı əlavələrin edilməsi vacibdir:
"Bəzən görürük ki, ailədə qadınlara qarşı ayrıseçkilik edilir. Onları nikaha qədər və nikahdan sonra idmana və s. yerlərə buraxmırlar. Qızının (o cümlədən oğlunun) orta təhsil almasına imkan verməyən, qızını cəmiyyət arasına buraxmayan, onu asılı vəziyyətdə saxlayan valideynlərlə bağlı məsələlərin İnzibati Xətalar Məcəlləsində əks etdirilməsi vacibdir. Bu halların kim tərəfindən törədilməsinin fərqi yoxdur. Bu halları ata, qardaş, ər də edə bilər. Bu baxımdan belə hallar məcəlləyə xüsusi hallar kimi əlavə edilməli, qohumluq münasibətləri həmin müddəalarda ağırlaşdırıcı hal kimi göstərilməlidir. Çünki psixoloji zorakılığı qohum törətdikdə zorakılıq qurbanı olan şəxs həm qohumlardan, həm də ətraf aləmdən təcrid olunmuş vəziyyətdə yaşamağa məcbur olur".
E.Səfərov qeyd edib ki, sadalanan məsələlərlə bağlı artıq komitə tərəfindən təkliflər hazırlanıb. Bu təkliflərin hazırlanmasında məqsəd məişət zorakılığı ilə bağlı qanunvericiliyin təkmilləşdirilməsidir.
Mövzu ilə bağlı ekspertlərə müraciət etdik. "Təmiz Dünya" İctimai Birliyinin rəhbəri Mehriban Zeynalova "Bakı-Xəbər"ə açıqlamasında qeyd etdi ki, qız uşaqlarına qarşı ayrıseçkilik hələ də davam edir: "Hər bir qadın öz əməyinə görə irəli çəkilsə, qız uşaqlarına qarşı ayrıseçkilik olmayacaq. Hər bir məsələnin kökündə psixoloji, siyasi və mənəvi amil dayanır".
M.Zeynalova hesab edir ki, Azərbaycanda uşaqlarını asılı vəziyyətdə saxlayan, qız uşaqlarına qarşı ayrıseçkilik edən valideynlərlə bağlı qanunvericilikdə xüsusi bir maddənin olması məqsədəuyğundur. Ancaq əsas mahiyyət odur ki, qız uşaqlarına ailə tərəfindən hansısa qadağanın qoyulması necə müəyyən olunacaq: "Qızın özünün müraciəti əsasında, yoxsa sübutlar toplanacaq? Hər şeyin qadağan olunması düzgün deyil. Elə məsələlər var ki, ailə qızına və ya oğluna nəzarət etməlidir. Dünyanın hər bir yerində uşaqlara qarşı müəyyən davranışlar var ki, o qadağa olaraq qəbul olunur. Ancaq bu qadağalar uşaqlara zorakılıq kimi tətbiq olunmamalıdır. Uşaqları onların anladığı dildə başa salmaq lazımdır.
Konkret amillər müəyyən olunmalıdır. O amillərin hansı əsaslarla icra olunması maraqlıdır".
Günel CƏLİLOVA
