Könül Vaqifqızı: "Psixologiya mərkəzlərinin sayının çox olması səbəblərindən biri biznes maraqlarıdır"
Gələcək nəslin sağlam formalaşması istiqamətində hərtərəfli addımların atılması vacibdir. Uşaq və gənclərin fiziki və mənəvi inkişafında mühüm amillərdən biri məhz onların həyata psixoloji cəhətdən sağlam, hazırlıqlı olmasıdır.
Psixologiya elmi fəaliyyət və ünsiyyətin psixoloji problemlərini öyrənir. Bu termin Azərbaycanda XIX əsrin sonu - XX əsrin əvvəllərindən işlənməyə başlanıb. Psixoloq insanın davranış mexanizmini düzgün istiqamətə yönəldir. İnkişaf edən dövlətlərdə nəinki ailələrin, eləcə də müəssisələrin, tədris ocaqlarının psixoloqları var. Son illər ölkəmizdə bu sahənin daha da inkişafı istiqamətində addımlar atılır. Psixoloqlara olan tələbatın ödənilməsi istiqamətində həyata keçirilən tədbirlərdən biri kimi bu gün ali tədris ocaqlarında psixologiya fakültələri fəaliyyət göstərir. Eləcə də psixologiya mərkəzlərinin sayı getdikcə artır. Bu say artımını istənilən şəxs müşahidə edə bilər.
Psixologiya mərkəzlərində çalışan psixoloqlar kağız sertifikat təqdim etməklə, özlərini bu işin peşəkarı adlandırır. Ancaq onlar nə sertifikasiyadan keçir, nə də psixoloji mərkəz üçün xüsusi lisenziya alır.
Qeyd edək ki, bir neçə ay əvvəl Milli Məclisin (MM) Səhiyyə komitəsinin sədri Əhliman Əmiraslanov komitənin iclaslarının birində çıxış edərək bildirmişdi ki, psixoloji mərkəzlərin lisenziyası qanunsuzdur. Onun dediyinə görə, psixoloji mərkəzlərin fəaliyyəti üçün lisenziyanı Səhiyyə və Təhsil nazirlikləri verməlidir: "Ancaq bu gün fəaliyyət göstərən psixoloji mərkəzlərin lisenziyası kim tərəfindən və hansı məqsədlər üçün verilib, bu bəlli deyil. Bunlar qanunsuzdur və bunlara qarşı mübarizə aparılmalıdır. Hesab edirəm ki, bu sahədə ciddi nizam-intizam yaradılmalıdır. Çünki bu gün heç də hamının psixoloji yardım almaq imkanı yoxdur və bunun üçün şərait yaradılmalıdır".
Psixoloq Könül Vaqifqızı bizimlə söhbətində bildirdi ki,
bu gün psixoloji mərkəzlərin sayı həddindən artıq çoxdur: "Həmin mərkəzlərdə çalışan psixoloqların nə dərəcədə savadlı olması isə sual doğurur. Psixologiya mərkəzlərinin sayının çox olması səbəblərindən biri də biznes maraqlarıdır. Bəzi psixoloqlar bu tip mərkəzlərdən sui-istifadəyə yol verir. Psixologiya kursunu qurtaran hər şəxs psixoloq deyil. Hansısa kursda iştirak edən şəxs bu gün sərbəst şəkildə psixoloq kimi çalışır. Təbii ki, bu hal onlara müraciət edən insanların sağlamlığına öz təsiri göstərir".
Həmsöhbətimizin sözlərinə görə, o, belə mərkəzlərin sayının çoxalmasının tərəfdarı deyil. Onun fikrincə, bu sahəyə xüsusi nəzarət tətbiq olunmalıdır. İnsanlar belə mərkəzlərə üz tutmazdan əvvəl araşdırıb tanısınlar, ondan sonra getsinlər.
Günel CƏLİLOVA
