Bəzi ailələrin uşaqlarına məktəbəqədər təhsil müəssisələrinə qəbul zamanı güzəştlər olacaq
Azərbaycanda məktəbəqədər təhsil müəssisələri əlavə iqtisadi gəlir və sosial səmərə əldə etmək məqsədilə nizamnaməsində nəzərdə tutulmuş qaydada müvafiq icra hakimiyyəti orqanının müəyyən etdiyi sahibkarlıq fəaliyyəti ilə məşğul ola biləcək. Trend-in məlumatına görə, bunu Milli Məclisin Elm və təhsil komitəsinin sədri İsa Həbibbəyli komitənin bugünkü iclasında “Məktəbəqədər təhsil haqqında” qanun layihəsinin II oxunuşda müzakirəsi zamanı deyib.
İ.Həbibbəyli bildirib ki, dövlət məktəbəqədər təhsil müəssisələrinin innovasiya və sahibkarlıq fəaliyyəti həyata keçirməsi yerli və xarici investisiyaların cəlb edilməsinə əlverişli şərait yaradacaq: "Dövlət məktəbəqədər təhsil müəssisəsinin sahibkarlıq fəaliyyətindən əldə etdiyi gəlirlər bilavasitə təhsilin inkişafına və işçilərin sosial müdafiəsinə yönəldiləcək".
Komitə sədrinin sözlərinə görə, əvvəlki layihədə məktəbəqədər təhsil müəssisələrinin özəlləşdirilməsi məsələsi yer alsa da, yeni layihədə bu məsələ çıxarılıb: “Həm Milli Məclisin plenar iclasında, həm də ekspertlərin rəyində və sosial mediada məktəbəqədər təhsil müəssisələrinin özəlləşdirilməsinə birmənalı olaraq “yox” cavabı verildi. Həm deputatların, həm də Təhsil Nazirliyinin fikirlərini əsas götürərək layihədən özəlləşdirmə ilə bağlı maddə çıxarılıb. Lakin nazirliyin bizə göndərdiyi rəydə qeyd olunur ki, məktəbəqədər təhsil müəssisələrinin profili dəyişmədən onlar hüquqi və fiziki şəxslər tərəfindən özünüidarəetməyə verilə bilər. Təbii ki, bu, özəlləşdirmə demək deyil, sadəcə, bu sahənin inkişaf etdirilməsi üçün əlavə imkanlar deməkdir”.
İ.Həbibbəyli deyib ki, bəzi kateqoriyadan olan ailələrin uşaqlarına məktəbəqədər təhsil müəssisələrinə qəbul zamanı güzəştlər olacaq. İ.Həbibbəyli bildirib ki, layihəyə əsasən, dövlət məktəbəqədər təhsil müəssisəsinə ilk növbədə işləyən tək valideynlərin, təhsil alan anaların, I və II qrup əlillərin, Qarabağ müharibəsi iştirakçılarının və əlillərinin, hərbi xidmətdə olan ataların uşaqları, çoxuşaqlı ailələrdən olan uşaqlar, qəyyumluqda olan uşaqlar qəbul ediləcəklər.
O qeyd edib ki, məktəbəqədər təhsil müəssisəsində təhsil alanlar üçün nəzərdə tutulan ödəniş haqqı əmək bazarının tələbatına uyğun olaraq tələb-təklif prinsipi əsasında tənzimlənəcək: “Əvvəllki layihəyə əsasən, məktəbəqədər təhsil müəssisələrində hər bir uşağa görə ödənişlərin müəyyən olunması müvafiq icra hakimiyyəti orqanının müəyyənləşdirdiyi qaydalara uyğun olmalı idi. Nəzərə almışdıq ki, belə olduqda pərakəndəliyin qarşısını ala bilərik və orta qiymətlər müəyən edilər. Lakin birinci oxunuşdan sonra keçirilən müzakirələrdə bildirildi ki, bu məsələdə bir qədər sərbəstliyə şərait yaratmaq lazımdır. Ona görə də indi belə təklif edilir ki, məktəbəqədər təhsil müəssisəsinin təhsil haqları müəyyənləşdirilərkən bazar iqtisadiyyatına uyğun olaraq tələblər və təkliflər əsas götürülsün. Hələ qarşıda üçüncü oxunuş da var. Bu müddət ərzində hər hansı dəqiqləşdirmələr ola bilər. Əslində, biz də bunu gözləyirik”.
İ.Həbibbəyli bildirib ki, dövlət məktəbəqədər təhsil müəssisəsində təlim-tərbiyə alan uşaq üzrsüz səbəbdən 30 gün, üzrlü səbəbdən 60 gün müddətinə təlim-tərbiyə və tədris prosesindən yayınaraq müəssisəyə gəlmədikdə uşaq müəssisədən xaric edilir. Müstəsna hallarda yay dövründə 60 gündən artıq üzrlü səbəbdən və ya valideynin yazılı ərizəsi əsasında müəssisəyə gəlməməsinə icazə verilir.
Komitə sədrinin sözlərinə görə, məktəbəqədər təhsil müəssisələrində tədris dili Azərbaycan dili olmalıdır. Uşaqlara dövlət dilinin öyrədilməsi şərti ilə digər dillərdə təhsil verilə bilər: “Layihədə Azərbaycan dilini əsas tədris dili olaraq qeyd etmişik. Təklifləri nəzərə alaraq, həmin müəssisələrdə xarici qrupların yaradılmasının mümkünlüyünü də məqbul hesab edirik”.
