"Dövlət tərəfindən maaş alan din xadimləri yas mərasiminə dəvət olunarsa, dəfn xərci qismən də olsa azala bilər"
Dini Qurumlarla İş üzrə Dövlət Komitəsi Nazirlər Kabinetinə təqdim etdiyi "Məzar yerləri və məzarlıqlar haqqında" qərar layihəsində dəfn xərclərinin dəfn üçün müavinətin məbləğindən artıq olmamasını təklif edib. Bu barədə Dini Qurumlarla İş üzrə Dövlət Komitəsinin sədr müavini Gündüz İsmayılov media nümayəndələrinə açıqlamasında deyib.
Onun sözlərinə görə, "dəfn işi" dedikdə yas mərasimi nəzərdə tutulmur. G.İsmayılov qeyd edib ki, "dəfn işi" məzar üçün torpağın ayrılması, qəbrin qazılması, dəfn olunma və abidənin qoyulmasından ibarətdir: "Əgər vəfat etmiş şəxsin iş yeri varsa, "dəfn pulu" dediyimiz vəsait onun iş yerindən verilir. Əgər ölən təqaüdçüdürsə, həmin vəsait Əmək və Əhalinin Sosial Müdafiəsi Nazirliyi tərəfindən ödənilir. Biz "Məzar yerləri və məzarlıqlar haqqında" qərar layihəsində dəfnin məhz bu vəsait hesabına aparılmasını nəzərdə tutmuşuq. Təklifimizin mahiyyəti bundan ibarətdir ki, dəfn üçün xərclər bu vəsaitdən artıq olmasın. Biz nəzərdə tuturuq ki, torpaq pulsuz olacaq. İkincisi, qəbiristanlıqların saxlanması, abadlaşdırılması vətəndaşların deyil, bələdiyyələrin hesabına olacaq. Təklifimizdə də məqsəd odur ki, torpaq pullu olmasın, ikincisi, qəbirüstü abidələr təmtəraqlı olmasın, üçüncüsü isə qəbiristanlıqlar normal bir şəkildə fəaliyyət göstərsin".
Qeyd edək ki, dəfn müavinətinin məbləği 330 manatdır. Dəfn xərclərinin 330 manatdan artıq olmaması inandırıcı görünmür. Hətta dünən sosial şəbəkə istifadəçilərindən biri məscidlərdə yuyucuxanaların istifadə qiymətlərini yayıb. Sosial şəbəkə istifadəçilərindən birinin paylaşdığı elanda məscidin xidmətləri yer alıb. Məsciddə mərhumun (mərhumənin) yuyulması 50 AZN-dir. Bura kəfən istifadəsi, sitir kafur, pambıq və kommunal xərclər daxildir. Meyitxanada fəaliyyət göstərən meyit saxlama kamerasının 1 günlük xərci isə 20 manatdır. Elanda cənazə namazının pulsuz olduğu qeyd edilib.
Mərhum və ya mərhumə yuyulduqdan sonra onun dəfn olunması üçün ayrılacaq məzar yeri, qəbrin qazılması, baş daşının hazırlanması və digər xidmətlərin müavinət hesabına ödəniləcəyi sual doğurur. İqtisadçı-ekspert Rəşad Həsənli "Bakı-Xəbər"ə açıqlamasında qeyd etdi ki, dəfn xərclərinin qiyməti hər kəsə bəllidir: "Qəbiristanlıqlarda məzar yerlərinin ayrılması ilə bağlı müəyyən dövlət rüsumu var. Dövlət rüsumunun qiyməti azala bilər. Ancaq reallıqda isə qəbiristanlıqlarda torpaq satılır. Ərazidən asılı olaraq qəbiristanlıqlarda torpaq yerinin qiyməti dəyişir. Bu prizmadan yanaşsaq, dəfn müavinətinin dəfn xərclərini ödəyəcəyi real görünmür".
İqtisadçının sözlərinə görə, yas xərclərinin azaldılması üçün hökumət tərəfindən müəyyən işlər görülsə də, vəziyyət olduğu kimi qaldı.
Ekspert təklif edir ki, dəfn xərclərinin azaldılması üçün mərasimdə iştirak edəcək din xadimləri məscidlərdə çalışanlar olsun: "Məscidlərdə çalışan din xadimlərinə hüzr mərasimində heç bir məbləğdə pul almaması barədə tapşırıq verilə bilər. Dövlət tərəfindən maaş alan din xadimləri yas mərasiminə dəvət olunarsa, dəfn xərci azala bilər".
Günel CƏLİLOVA
