"Bəzən elə hal olur ki, sürücü günlük planı verə bilmir"
Günün müəyyən saatlarında marşrut avtobuslarında sərnişin sıxlığı yaranır. Bəzən sıxlıq elə həddə çatır ki, avtobusun qapısı güclə bağlanır. Bu vəziyyəti səhər və axşam saatlarında müşahidə etmək olar. Ancaq nəqliyyat vasitələrində sərnişinlərin daşınması üçün müəyyən limit var. Yəni hər nəqliyyat vasitəsi müəyyən sayda sərnişin daşıya bilər. Artıq sayda sərnişindaşıma nəqliyyat vasitəsinin sıradan çıxmasına səbəb olur və qəza baş verə bilər. Baş verən yol-nəqliyyat hadisələrinin müəyyən bir hissəsi normadan artıq sərnişin daşınması ilə bağlıdır.
Məlumat üçün bildirək ki, bütün avtomobillərin texniki pasportunda həmin avtomobillərə nə qədər sərnişinin minə bilməsi barədə məlumat göstərilir. Həmin saydan artıq sərnişinin avtomobilə mindirilməsi qanunun tələbinin pozulmasına gətirib çıxarır. Bu halda həmin sürücülər 3 bal, 60 manat cərimə edilə bilər.
Məsələ ilə bağlı fikir bildirən sosial sahə üzrə ekspert İlqar Hüseynli qeyd etdi ki, nəzərdə tutulduğundan artıq sərnişinin avtobusa mindirilməsi qanunaziddir. Normadan artıq sərnişin minik vasitəsinə mindirilərsə, sürücü cərimələnməlidir: "Sərnişin daşıyan nəqliyyat vasitəsində konstruksiyada nəzərdə tutulan normadan artıq sərnişin daşımaq olmaz. Konstruksiyanı istehsalçı müəyyən edir. Oturacaq yerlərinə, ölçülərinə, təyinatına görə avtobusa nə qədər insanın minə bilməsi müəyyən olunur".
Həmsöhbətimiz onu da bildirdi ki, avtobus sürücülərinin əksəriyyəti qeyri-peşəkardır: "Elə sürücülər var ki, onların avtobus sürmək üçün kateqoriyası yoxdur, lakin marşrut idarə edir. Bu kimi hallar araşdırılmalıdır. Marşrut sürücülərinin normadan artıq sərnişin mindirməsi səbəblərindən biri də onların planı tamamlamaq marağı ilə bağlıdır. Bəzən elə hal olur ki, sürücü günlük planı verə bilmir. Planı vermək üçün idarə etdiyi nəqliyyat vasitəsinə normadan artıq sərnişin mindirir ki, günün sonunda marşrut sahibinin pulunu verə bilsin. Həmçinin, bəzi ərazilər üzrə marşrut xəttinin az olması da vəziyyəti çətinləşdirir. Elə marşrut var ki, 20-30 dəqiqədən bir gəlir. Çöldə günün və ya soyuğun altında avtobus gözləməkdənsə, ayaq üstə sıxılaraq mənzil başına çatmaq istəyənlər də az deyil. Marşrut xətlərinin sayı çox olarsa, avtobuslara normadan artıq sərnişin mindirilməz".
Günel CƏLİLOVA
